អន្តរជាតិ
ប្រយ័ត្នការស្មើដើម! សមាជិកសភាមីយ៉ាន់ម៉ាប្រាប់រដ្ឋាភិបាលឲ្យសងលុយចិនឲ្យលឿន
× សមាជិកសភាមីយ៉ាន់ម៉ា នៅថ្ងៃទី២៤ ខែមករា បានស្នើឲ្យរដ្ឋាភិបាលប្រញាប់សងប្រាក់ជំពាក់ទៅឲ្យចិនឲ្យបានលឿនតាមតែអាចធ្វើបាន។ សមាជិកសភា Daw Cho Cho ស្នើបែបនេះក្នុងកិច្ចប្រជុំសភាសហភាពនៅទីក្រុងណៃពិដោ ក្រោមហេតុផលថា កម្ចីចិនមានការប្រាក់ខ្ពស់ជាងប្រទេសដទៃទៀត។ សមាជិកសភារូបនេះទំនងចង់បានន័យថា បើសងប្រាក់ជំពាក់ចិនបានឆាប់កាលណា មីយ៉ាន់ម៉ាអាចសន្សំលុយបានច្រើនពីការប្រាក់។
សភាសហភាពមីយ៉ាន់ម៉ា បើកកិច្ចប្រជុំដើម្បីពិភាក្សាពីរបាយការណ៍ស្ថានភាពបំណុលជាតិ៦ខែក្នុងឆ្នាំ២០១៨ ដែលវាយតម្លៃដោយគណៈកម្មាធិការគណនេយ្យរួមនៃសភា។ ក្នុងកិច្ចប្រជុំថ្ងៃទី២៤ ខែមករាសមាជិកសភាមីយ៉ាន់ម៉ាក៏ប្រាប់ឲ្យរដ្ឋាភិបាលរៀបចំសងប្រាក់ទៅឲ្យចិនវិញ សំដៅចៀសវាងការបង់ការប្រាក់ច្រើន។
បើតាមសារព័ត៌មានមីយ៉ាន់ម៉ា The Irrawaddy ចិនគឺជាម្ចាស់បំណុលធំជាងគេមួយរបស់មីយ៉ាន់ម៉ា ដែលកម្ចីចិនមានទំហំ៤០ភាគរយនៃបំណុលជាតិសរុប។ សមាជិកសភាជាន់ទាប Daw Cho Cho និយាយថា មីយ៉ាន់ម៉ាគួរប្រញាប់សងលុយទៅឲ្យចិនវិញឲ្យលឿនបំផុត។ សមាជិកសភារូបនេះអះអាងថា កម្ចីរបស់ចិនមានការប្រាក់ខ្ពស់ជាងគេ ខណៈលុយជំពាក់នេះអាចសងនៅពេលណាក៏បានក្ដី។
ក្នុងរបាយការណ៍ចុងក្រោយរបស់រដ្ឋាភិបាលស្ដីពីបំណុល មីយ៉ាម៉ាមានចំណុលចំនួន៤ ពាន់លានដុល្លារនៅត្រឹមឆ្នាំ១៩៨៨ ហើយកើនចំនួន២,៧ពាន់លានដុល្លារទៀតក្នុងឆ្នាំ២០១១ ដែលក្នុងនោះ៩៧ភាគរយជាកម្ចីរបស់ចិន។ ចន្លោះឆ្នាំ២០១១ ដល់ឆ្នាំ២០១៦ រដ្ឋាភិបាលពាក់កណ្ដាលស៊ីវិលបានជំពាក់លុយបរទេសចំនួន៣,១ពាន់លានដុល្លារទៀត ហើយចាប់ពីពេលនោះមក បំណុលជាតិក៏បន្តកើនចំនួន៩១លានដុល្លារទៀត។
បច្ចុប្បន្ននេះ មីយ៉ាន់ម៉ាជំពាក់បំណុកបរទេសចំនួន១០ពាន់លានដុល្លារ ហើយក្នុងបំណុលមានចំនួនច្រើនជាង៤ ពាន់លានដុល្លារ។ បើតាមសមាជិកសភាមីយ៉ាន់ម៉ា ការប្រាក់កម្ចីរបស់ចិនសម្រាប់មីយ៉ាន់ម៉ាមាន៤,៥ភាគរយ។ សភាមីយ៉ាន់ម៉ាអាណត្តិមុនសម័យរដ្ឋាភិបាលលោក ថេន សេន បានអនុម័តកម្ចីចំនួន៣០០លានដុល្លារពីធនគារអាហរ័ណ-នីហរ័ណចិនក្នុងអត្រាការប្រាក់ចំនួន៤,៥ភាគរយដើម្បីផ្គត់ផ្គង់ក្រុមហ៊ុនក្នុងស្រុក។
ប្រឈមមុខស្ថានភាពបែបនេះ សមាជិកសភាជាន់ខ្ពស់មីយ៉ាន់ម៉ា បានស្នើឲ្យរដ្ឋាភិបាលចាត់ចែងយុទ្ធសាស្ត្រគ្រប់គ្រងបំណុលដើម្បីសងប្រាក់ជំពាក់ឲ្យចិនវិញ។ ជាមួយគោលដៅសងលុយនេះ លោក U Than Soe ក៏លើកយោបល់ឲ្យរដ្ឋាភិបាលធ្វើតាមប្រទេសផ្សេងក្នុងការសងកម្ចីចិនតាមរយៈការកាត់កងជាមួយការនាំចេញស្រូវអង្ករវិញ ដ្បិតភាគច្រើនៃអង្ករមីយ៉ាន់ម៉ានាំចេញទៅកាន់ទីផ្សារចិនតាមរយៈពេលជំនួញតាមព្រំដែនស្រាប់៕
© រក្សាសិទ្ធិដោយ thmeythmey.com