ការិយាល័យរបស់ក្រសួងតាមក្រុង-ស្រុក នឹងត្រូវបញ្ចូលទៅក្នុងរដ្ឋបាលក្រុង-ស្រុក

ជាតិ

សង្គមជាតិ

ការិយាល័យរបស់ក្រសួងតាមក្រុង-ស្រុក នឹងត្រូវបញ្ចូលទៅក្នុងរដ្ឋបាលក្រុង-ស្រុក

29, Jan 2019 , 10:09 am

រូបភាព

ដោយ: ថ្មីៗ

ការិយាល័យស្ទើរទាំងអស់របស់ក្រសួងនិងស្ថាប័ន ដែលមាននៅតាមក្រុង-ស្រុក នឹងត្រូវច្របាច់បញ្ចូលទៅក្នុងរចនាសម្ព័ន្ធថ្នាក់ក្រុង-ស្រុក។ លើកលែងតែការិយាល័យមួយចំនួនតូចប៉ុណ្ណោះ នឹងត្រូវរក្សាទុក ដូចជា អប់រំ សុខាភិបាល និង នគរូបនីយកម្ម ជាដើម ដែលរដ្ឋាភិបាលយល់ថាសំខាន់។

សម្តេច ស ខេង រដ្ឋមន្ត្រីក្រសួងមហាផ្ទៃ បានធ្វើសំណើទៅសម្តេច ហ៊ុន សែន នាយករដ្ឋមន្ត្រី ដើម្បីសុំកែសម្រួលរចនាសម្ព័ន្ធនិងប្រព័ន្ធគ្រប់គ្រងក្រុង-ស្រុក។ ក្នុងសំណើ ដែលចុះហត្ថលេខា តាំងពីថ្ងៃទី១៥ ខែមករា ឆ្នាំ២០១៩ សម្តេច ស ខេង សុំលុបចោលការិយាល័យជំនាញរបស់ក្រសួងនិងស្ថាប័នពាក់ព័ន្ធ នៅថ្នាក់ក្រុង-ស្រុក។

ប៉ុន្តែ ការិយាល័យទាំងនេះ មិនមែនលុបចោលឲ្យបាត់ឈឹង ឬរំលាយចោលតែម្តងនោះទេ ពោលគឺ ក្រោយពីលុបហើយ ការិយាល័យទាំងនេះ នឹងត្រូវធ្វើសមាហរណកម្ម បញ្ចូលទៅក្នុងរចនាសម្ព័ន្ធរបស់រដ្ឋបាលក្រុង-ស្រុក។

រដ្ឋមន្ត្រីមហាផ្ទៃ បញ្ជាក់ក្នុងសំណើថា៖«ក្នុងការធ្វើសមាហរណកម្មការិយាល័យជំនាញនេះ រចនាសម្ព័ន្ធគ្រប់គ្រងថ្មីរបស់រដ្ឋបាលក្រុង-ស្រុក ត្រូវបង្កើតជាអង្គភាព ឬការិយាល័យចង្កោមវិស័យ សម្រាប់វិស័យមួយចំនួន ដែលពាក់ព័ន្ធនឹងចង្កោមវិស័យសេដ្ឋកិច្ច និង ចង្កោមសង្គមកិច្ច ដើម្បីធានាដល់ការកាត់បន្ថយបន្ទុកចំណាយ និងពង្រឹងរចនាសម្ព័ន្ធស្ថាប័ន លើកលែងវិស័យអាទិភាពសំខាន់ៗមួយចំនួន ដូចជា អប់រំ សុខាភិបាល និងនគរូបនីយកម្ម ដែលចាំបាច់ត្រូវបង្កើតជាអង្គភាពដាច់ដោយឡែកៗពីគ្នា»។

បើតាមសំណើរបស់រដ្ឋមន្ត្រីមហាផ្ទៃ អ្វីៗទាំងអស់ ដែលរួមមាន មុខងារ ធនធាន ហិរញ្ញវត្ថុ ទ្រព្យសម្បត្តិ និងបុគ្គលិក របស់ការិយាល័យទាំងនេះ ត្រូវផ្ទេរទៅឲ្យរដ្ឋបាលក្រុង-ស្រុក។

ក្រោយលុបចោលការិយាល័យទាំងនេះ អង្គភាពថ្មីមួយចំនួន នឹងត្រូវបង្កើតឡើង នៅក្នុងរដ្ឋបាលក្រុង-ស្រុក។ សំណើនោះ បញ្ជាក់បែបនេះថា៖«អង្គភាពមួយចំនួន ដែលត្រូវរៀបចំថ្មីនៅថ្នាក់ក្រុង-ស្រុក ត្រូវដំឡើងឋានៈឲ្យបានសមស្របទៅនឹងទំហំការងារ និងការទទួលខុសត្រូវក្នុងការផ្តល់សេវាដោយផ្ទាល់ជូនប្រជាពលរដ្ឋ ដើម្បីជំរុញលើកទឹកចិត្ត និងទាក់ទាញមន្ត្រីដែលមានសមត្ថភាព និងមានជំនាញខ្ពស់សមស្របស្ម័គ្រចិត្ត ទៅបម្រើការងារនៅរដ្ឋបាលក្រុង-ស្រុក»។

នៅលើសំណើនោះ គេ ឃើញចំណារឯកភាពរបស់សម្តេច ហ៊ុន សែន ដែលមានន័យថា សម្តេច ហ៊ុន សែន បានយល់ព្រមតាមសំណើរបស់សម្តេច ស ខេង ហើយ។

ក្នុងពិធីជួបសំណេះសំណាលជាមួយកម្មករ-កម្មការិនី នៅខេត្តកំពត កាលពីថ្ងៃទី២៥ ខែមករា ឆ្នាំ២០១៩នេះ ប្រមុខរដ្ឋាភិបាល ក៏បានបង្ហើបពីផែនការនៃការលុបការិយល័យទាំងនេះចោលដែរ ដោយអះអាងថា ជាការធ្វើកំណែទម្រង់ ដើម្បីឲ្យការងារកាន់តែមានប្រសិទ្ធភាព ហើយសេដ្ឋកិច្ចកាន់តែរីកចម្រើន៕

អត្ថបទទាក់ទង

រដ្ឋាភិបាល នឹងលុបចោលការិយាល័យនៅតាមស្រុក-ខណ្ឌ