រុស្ស៊ី ពិចារណាបង្កើនអាហារូបករណ៍ប្រចាំឆ្នាំ ដល់និស្សិតខ្មែរ

ជាតិ

សង្គមជាតិ

រុស្ស៊ី ពិចារណាបង្កើនអាហារូបករណ៍ប្រចាំឆ្នាំ ដល់និស្សិតខ្មែរ

30, Jan 2019 , 8:59 am

រូបភាព

ជំនួបរវាងរដ្ឋមន្រ្តីការបរទេសកម្ពុជា និង រដ្ឋមន្រ្តីធនធានធម្មជាតិ។ រូបពីក្រសួងការបរទេសកម្ពុជា

ដោយ: ថ្មីៗ

រដ្ឋាភិបាលរុស្ស៊ី នឹងពិចារណាពីការបង្កើនចំនួនអារូបករណ៍ប្រចាំឆ្នាំ សម្រាប់និស្សិតកម្ពុជា។ លោក ឌីមីតទ្រី កូប៊ិលគីន រដ្ឋមន្ត្រីក្រសួងធនធានធម្មជាតិនិងបរិស្ថានរុស្ស៊ី បានប្រាប់លោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា យ៉ាងដូច្នេះថា ក្នុងជំនួបកាលពីថ្ងៃទី២៥ ខែមករា ឆ្នាំ២០១៩ ក្នុងរាជធានីភ្នំពេញ។

សេចក្តីប្រកាសព័ត៌របស់ក្រសួងការបរទេសកម្ពុជាស្តីពីជំនួបនេះ បានសរសេរថា៖«រដ្ឋមន្ត្រីទាំងពីរ បានកំណត់វិធានការជាក់លាក់ ដើម្បីជំរុញបន្ថែមទៀត នូវកិច្ចសហប្រតិបត្តិការប្រកបដោយផ្លែផ្កាក្នុងវិស័យអប់រំ វប្បធម៌ ទេសចរណ៍ និង សុខាភិបាល»។

ក្រៅពីវិស័យអប់រំ រដ្ឋមន្ត្រីបរិស្ថានរុស្ស៊ី ក៏បានប្រាប់លោក ប្រាក់ សុខុន ផងដែរ ថា រដ្ឋាភិបាលរបស់ខ្លួន គាំទ្រការជួសជុលប្រាសាទព្រះវិហារ។ លោក អះអាងទៀតថា ការសិក្សាពីលទ្ធភាពធ្វើទំនើបកម្មមន្ទីរពេទ្យមិត្តភាពខ្មែរ-សូវៀត នឹងត្រូវបញ្ចប់ នៅខែមីនា ឆ្នាំ២០១៩។

លើសពីនេះ រដ្ឋមន្ត្រីទាំងពីរ បានឯកភាពគ្នា បន្តពិភាក្សាពីលទ្ធភាពបើកឲ្យមានជើងហោះហើរត្រង់រវាងកម្ពុជានិងរុស្ស៊ី។ អ្នកទាំងពីរ ក៏បានសង្កត់ធ្ងន់ដែរ ពីការសារៈសំខាន់នៃការអភិវឌ្ឍធនធានមនុស្ស ក្នុងវិស័យថាមពលនុយក្លេអ៊ែរ ការបង្កើតឲ្យបានឆាប់នូវមជ្ឈមណ្ឌលវិទ្យាសាស្ត្រ និងបច្ចេកវិទ្យានុយក្លេអ៊ែរ៕