អន្តរជាតិ
×![]()
ការនាំចេញផលិតផលរបស់វៀតណាមបានធ្លាក់ចុះប្រមាណ ១, ៣ ភាគរយ ក្នុងខែមករាដើមឆ្នាំ២០១៩នេះ បើធៀបទៅនឹងឆ្នាំមុន ដែលស្មើនឹង ២០ ពាន់លានដុល្លារ។ ចំណែកការនាំចូលវិញបានកើនឡើងប្រមាណ ៣,១ ភាគរយឯណោះ ដែលស្មើនឹង ២០,៨ ពាន់លានដុល្លារ។
ការធ្លាក់ចុះយ៉ាងគំហុកនៃការនាំចេញគ្រឿងអេឡិចត្រូនិក ជាមូលហេតុនៃការធ្លាក់ចុះសរុបរបស់វៀតណាម។ យោងតាមការិយាល័យស្ថិតិទូទៅវៀតណាម ការនាំចេញទូរសព្ទដៃបានធ្លាក់ចុះប្រមាណ ២៧, ៥ ភាគរយ គឺមកត្រឹម ២, ៩ ពាន់លានដុល្លារ។ ការនាំចេញកុំព្យូទ័រ និងសម្ភារៈអេឡិចត្រូនិកផ្សេងទៀត បានថយចុះប្រមាណ ៥ ភាគរយ គឺមកត្រឹម ២,៣ ពាន់លានដុល្លារ។ នេះបើតាមការចុះផ្សាយរបស់កាសែត Vietnam Express នៅថ្ងៃទី៣១ ខែមករា។
យ៉ាងណាមិញ ការនាំចេញផលិតផលវាយណភណ្ឌ និងសំលៀកបំពាក់ បានហក់ឡើងចំនួន ៦,៧ ភាគរយ ដែលស្មើនឹង ២, ៧ ពាន់លានដុល្លារ។ ជាមួយគ្នានេះ ការនាំចេញស្បែកជើងគិតជាទឹកប្រាក់ស្មើនឹង ១,៦ ពាន់លានដុល្លារ ដែលកើនឡើង ១២,៨ ភាគរយ។ ចំណែកឯ ការនាំចេញគ្រឿងយន្តផ្សេងទៀត បានកើនឡើងប្រមាណ ១៥,២ ភាគរយ គឺស្មើនឹង ១,៤ ពាន់លានដុល្លារ។
គួរបញ្ជាក់ថា សហរដ្ឋអាមេរិកជាទីផ្សារនាំចូលដ៏ធំបំផុតរបស់វៀតណាម ក្នុងទំហំទឹកប្រាក់ ៤ ពាន់លានដុល្លារ តាមពីក្រោយដោយចិន ក្នុងទំហំទឹកប្រាក់ ៣,៨ ពាន់លានដុល្លារ និងចុងក្រោយគឺសហភាពអឺរ៉ុបក្នុងទំហំទឹកប្រាក់ ៣,២ ពាន់លានដុល្លារ។ ចំណែកឯការនាំចេញរបស់វៀតណាមទៅកាន់ប្រទេសជិតខាង ក្នុងតំបន់អាស៊ីអាគ្នេយ៍គឺមានត្រឹមតែ ២ ពាន់លានដុល្លារប៉ុណ្ណោះ។
យោងតាមរបាយការណ៍របស់រដ្ឋាភិបាលវៀតណាម ការនាំចេញរបស់កាលពីឆ្នាំ២០១៨ មានទំហំទឹកប្រាក់ ២៤៤,៧២ ពាន់លានដុល្លារ ដែលកើនឡើងប្រមាណ ១៣,៨ ភាគរយ បើធៀបនឹងឆ្នាំ២០១៧។ រីឯការនាំចូលវិញគឺមានចំនួន ២៣៧, ៥១ ពាន់លានដុល្លារ។ តួលេខនេះផ្តល់ឲ្យវៀតណាមនូវអតិរេកពាណិជ្ជកម្ម (ផលលើស) ខ្ពស់បំផុតក្នុងកំណត់ត្រារបស់ខ្លួន ដែលស្មើនឹង ៧,២១ ពាន់លានដុល្លារឯណោះ៕
Tag:
វៀតណាម
ពាណិជ្ជកម្ម
© រក្សាសិទ្ធិដោយ thmeythmey.com
