ពេលកំណត់នៃបទឈប់បាញ់ក្នុងសង្គ្រាមពាណិជ្ជកម្មកាន់តែខិតកៀកមកដល់ ពោលគឺត្រូវនឹងថ្ងៃទី១ ខែមីនា។ ប្រធានាធិបតីអាមេរិក ដូណាល់ ត្រាំ បានបង្ហាញជំហរចង់ជួបជាមួយសមភាគីចិន ស៊ី ជិនភីង ដើម្បីឈានដល់ការសម្រេចកិច្ចព្រមព្រៀងពាណិជ្ជកម្មគ្រប់ជ្រុងជ្រោយមួយ ក្នុងគោលដៅបិទបញ្ចប់ភាពតានតឹងពាណិជ្ជកម្ម។
ថ្លែងនៅចំពោះមុខឧបនាយករដ្ឋមន្ត្រីចិន Liu He អំឡុងជំនួបនៅសេតវិមានអាមេរិកនៅថ្ងៃទី៣១ ខែមករា លោក ដូណាល់ ត្រាំ បាននិយាយថា លោកមានសុទិដ្ឋិនិយមថាមហាអំណាចសេដ្ឋកិច្ចទាំងពីរអាចនឹងឈានដល់ការបង្កើតកិច្ចព្រមព្រៀងដ៏ធំបំផុតមួយ ដែលពុំធ្លាប់មានពីមុនមក។ លើសពីនេះ លោកក៏បានបញ្ជាក់ទៀតថា លោកនឹងជួបជាមួយប្រធានាធិបតីចិន ស៊ី ជិនភីង នាខែក្រោយ។
យោងតាមការចុះផ្សាយរបស់ទីភ្នាក់ងារព័ត៌មាន Reuters បន្ថែមពីការបង្ហើបពីបំណងចង់ជួបមេដឹកនាំចិន លោក ត្រាំ ក៏បានអះអាងទៀតថា លោកស៊ី ជិនភីង បានត្រៀមខ្លួនក្នុងការផ្លាស់ប្តូរគោលនយោបាយសេដ្ឋកិច្ចសំខាន់ៗមួយចំនួន រួមមាន ការបើកចំហទីផ្សារចិនកាន់តែធំទៅកាន់ក្រុមហ៊ុនអាមេរិក និងទិញផលិតផលពីអាមេរិកបន្ថែមទៀត។
ទោះបីជាពុំទាន់មានគម្រោងច្បាស់លាស់ណាមួយ សម្រាប់ជំនួបជាមួយលោក ស៊ី ក្តី លោកប្រធានាធិបតី ត្រាំ បានបញ្ជាក់ថា ជំនួបជាមួយមេដឹកនាំចិន អាចនឹងមានច្រើនជាងមួយលើក នាពេលខាងមុខឆាប់ៗនេះ។ ការលើកឡើងរបស់លោកត្រាំ គឺធ្វើឡើងបន្ទាប់ពីជំនួបពាណិជ្ជកម្មកម្រិតខ្ពស់ រយៈពេលពីរថ្ងៃជាមួយភាគីចិនដែលទើបតែបានបិទបញ្ចប់ ដោយលោកបានអះអាងថា ជំនួបនេះទទួលបានផ្លែផ្កាល្អ។
ជាមួយគ្នានេះដែរ ក្រោយបញ្ចប់ជំនួបកម្រិតខ្ពស់រយៈពេលពីរថ្ងៃ ដែលចាប់ផ្តើមកាលពីថ្ងៃពុធកន្លងទៅនេះ ឧបនាយករដ្ឋមន្ត្រីចិន លោក Liu He ដែលជាអ្នកចរចាពាណិជ្ជកម្មរបស់ក្រុងប៉េកាំងផងនោះ បានប្រាប់លោកត្រាំថា ចិននឹងបញ្ជាទិញសណ្តែកសៀងរបស់អាមេរិកប្រមាណ ៥ លានតោនក្នុងមួយថ្ងៃបន្ថែមទៀត។ ចំនួននេះគឺកើនឡើងទ្វេដងពីបរិមាណដែលចិនបានទិញ ចាប់តាំងពីខ្លួនចាប់ផ្តើមបញ្ជាទិញផលិតផលកសិកម្មអាមេរិកឡើងវិញ កាលពីខែធ្នូកន្លងទៅ។
ខណៈចិនបង្កើនការបញ្ជាទិញផលិតផលកសិកម្ម, ថាមពល, និងផលិតផលផ្សេងៗទៀតក្នុងគោលដៅព្យាយាមដោះស្រាយជម្លោះពាណិជ្ជកម្ម ភាគីអាមេរិកក៏បានឆ្លៀតឱកាសលើកឡើងពីបញ្ហារសើបមួយចំនួនផងដែរ។ សហរដ្ឋអាមេរិកទាមទារឲ្យចិនចាត់វិធានការចាំបាច់មួយចំនួន ដើម្បីការពារកម្មសិទ្ធិបញ្ញារបស់ក្រុមហ៊ុនអាមេរិក និងបញ្ចប់គោលនយោបាយដែលក្រុងវ៉ាស៊ីនតោនចោទប្រកាន់ថា បានបង្ខំឲ្យក្រុមហ៊ុនអាមេរិកផ្ទេរបច្ចេកវិទ្យាទៅដល់ក្រុមហ៊ុនចិន។
ក្នុងសេចក្តីថ្លែងការណ៍ដាច់ដោយឡែកមួយ សេតវិមានអាមេរិកបានគូសបញ្ជាក់ថា ការដំឡើងពន្ធពី ១០ ភាគរយទៅ ២៥ ភាគរយលើទំនិញចិន ២០០ ពាន់លានដុល្លារ ដែលគ្រោងនឹងធ្វើឡើងនាថ្ងៃទី២ ខែមីនា នឹងត្រូវអនុវត្ត ប្រសិនបើគ្មានកិច្ចព្រមព្រៀងណាមួយ អាចសម្រេចបានត្រឹមថ្ងៃទី១ ខែមីនាទេនោះ។ ទាក់ទិននឹងរឿងនេះ លោក ត្រាំ ក៏បានបង្ហាញជំហរថា លោកនឹងមិនពន្យារកាលកំណត់នៃបទឈប់បាញ់ក្នុងសង្គ្រាមពាណិជ្ជកម្មនេះឡើយ។ ត្រង់ចំណុចនេះ លោកលើកឡើងថា៖«ខ្ញុំគិតថានៅពេលខ្ញុំនិងប្រធានាធិបតីស៊ីជួបគ្នានោះ គ្រប់ចំណុចទាំងអស់នឹងត្រូវបានយល់ព្រម»។
គួរបញ្ជាក់ផងដែរថា កាលពីដើមខែធ្នូ ឆ្នាំ២០១៨ លោក ត្រាំ និងលោក ស៊ី បានយល់ព្រមផ្អាកការដំឡើងពន្ធលើទំនិញគ្នាទៅវិញទៅមក រយៈពេល៩០ថ្ងៃ ហើយពេលវេលាកំណត់នៃបទឈប់បាញ់នេះ គឺត្រូវនឹងថ្ងៃទី១ ខែមីនាខាងមុខ ពោលគឺនៅសល់តែមួយខែទៀតប៉ុណ្ណោះ។ គោលបំណងនៃការបង្កើតបទឈប់បាញ់ក្នុងសង្គ្រាមពាណិជ្ជកម្ម គឺដើម្បីទុកពេលឲ្យភាគីទាំងពីរបង្កើតការចរចាពាណិជ្ជកម្ម ក្នុងគោលដៅរកច្រកផ្លូវដោះស្រាយជម្លោះដ៏តានតឹងមួយនេះ។
ក្រោយពីការយល់ព្រមផ្អាកដំឡើងពន្ធលើទំនិញគិតជាទឹកប្រាក់រាប់ពាន់លានដុល្លាររវាងមហាអំណាចទាំងពីរនេះ ជំនួបចរចាពាណិជ្ជកម្មត្រូវបានធ្វើឡើងជាបន្តបន្ទាប់។ លទ្ធផលវិជ្ជមានជាច្រើនក៏បានលេចឡើងផងដែរក្រោយជំនួបទាំងនេះ។ តួយ៉ាង ដូចបានលើកឡើងហើយ ចិនបានបង្កើនការបញ្ជាទិញផលិតផលកសិកម្មពីអាមេរិក និងក៏មានជំហរកែប្រែគោលនយោបាយមួយចំនួនផងដែរ ទាក់ទងនឹងការពារកម្មសិទ្ធិបញ្ញា និងការបង្ខំផ្ទេរបច្ចេកវិទ្យាជាដើម ដែលជាបញ្ហារសើបនៅក្នុងសង្គ្រាមពាណិជ្ជកម្ម៕