អន្តរជាតិ
ជប៉ុនគាំទ្រការដើរចេញរបស់អាមេរិកពីសន្ធិសញ្ញានុយក្លេអ៊ែរជាមួយរុស្ស៊ី
រូបភាព The Japan Times
×![]()
រដ្ឋាភិបាលជប៉ុន បានប្រកាសជំហរគាំទ្រចំពោះការសម្រេចចិត្តរបស់សហរដ្ឋអាមេរិក ក្នុងការដើរចេញពីសន្ធិសញ្ញាគ្រប់គ្រងសព្វាអាវុធ ដែលបានបង្កើតឡើងកាលពីសម័យសង្គ្រាមត្រជាក់ជាមួយសហភាពសូវៀត (រុស្ស៊ី)។ ប៉ុន្តែក្រុងតូក្យូបានសង្កត់ធ្ងន់ថា ខ្លួនមិនសូវជាពេញចិត្តចំពោះការបញ្ចប់សន្ធិសញ្ញានេះឡើយ។
ថ្លែងនៅក្នុងសន្និសីទសារព័ត៌មាននៅថ្ងៃចន្ទ ទី០៤ ខែកុម្ភៈ លោក Yoshihide Suga នាយខុទ្ទកាល័យរដ្ឋាភិបាលជប៉ុន បានគូសបញ្ជាក់ថា រដ្ឋាភិបាលជប៉ុនគាំទ្រគោលជំហររបស់ក្រុងវ៉ាស៊ីនតោន ដែលបានប្រកាសនឹងដកខ្លួនចេញពីសន្ធិសញ្ញានុយក្លេអ៊ែរចម្ងាយមធ្យម (INF)។ នេះបើតាមការចុះផ្សាយរបស់ទីភ្នាក់ងារព័ត៌មាន AP ។
ការលើកឡើងរបស់អ្នកនាំពាក្យជាន់ខ្ពស់របស់រដ្ឋាភិបាលជប៉ុនរូបនេះ គឺធ្វើឡើងក្រោយពីរដ្ឋមន្ត្រីការបរទេសអាមេរិក លោក Mike Pompeo បានចេញសេចក្តីថ្លែងការណ៍មួយកាលពីថ្ងៃទី២ ខែកុម្ភៈ ដោយបានប្រកាសថា សហរដ្ឋអាមេរិកបានផ្តល់ដំណឹងទៅកាន់រុស្ស៊ីជាផ្លូវការ ជុំវិញគោលបំណងរបស់ខ្លួនក្នុងការដើរចេញពីសន្ធិសញ្ញា INF ឆ្នាំ១៩៨៧។ សម្រាប់ការដើរចេញនេះ លោកបានចោទប្រកាន់រុស្ស៊ីថា បានរំលោភបំពានលើសន្ធិសញ្ញានេះ ដែលហាមឃាត់ក្នុងការកាន់កាប់ប្រភេទមីស៊ីល ដែលអាចបាញ់ពីលើផ្ទៃដីក្នុងរយៈចម្ងាយពី ៥០០ ទៅ ៥៥០០ គីឡូម៉ែត្រ។
បើតាមសារព័ត៌មានដដែល លោក Suga បាននិយាយទៀតថា៖«ដោយសារតែសន្ធិសញ្ញានេះបានដើរតួរជាប្រវត្តិសាស្ត្រយ៉ាងសំខាន់ក្នុងការគ្រប់គ្រង និងកាត់បន្ថយសព្វាវុធនោះ វាពុំសូវជារឿងល្អប៉ុន្មានទេ ដែលសន្ធិសញ្ញានេះនឹងត្រូវបញ្ចប់នោះ»។ ជប៉ុនជឿជាក់ថា វាពិតជាចាំបាច់ក្នុងការពិចារណាចំពោះការអភិវឌ្ឍន៍ និងដាក់ពង្រាយប្រព័ន្ធមីស៊ីលដោយប្រទេសផ្សេងៗទៀត ក្រៅពីសហរដ្ឋអាមេរិក និងរុស្ស៊ី។ ត្រង់ចំណុចនេះ លោកចង់សំដៅទៅកាន់ប្រទេសចិនតែម្តង។
«បញ្ហាមីស៊ីលស្ថិតក្រោមសន្ធិសញ្ញានេះ គឺជាប់ទាក់ទងដោយផ្ទាល់ទៅនឹងសន្តិសុខនៅក្នុងតំបន់អាស៊ីបូព៌ា។ ជប៉ុននឹងប្រាស្រ័យទាក់ទងជាមួយបណ្តាប្រទេសពាក់ព័ន្ធ រួមមាន រុស្ស៊ី និងចិន ខណៈខ្លួនកំពុងបង្កើតកិច្ចសហប្រតិបត្តិការជាមួយសហរដ្ឋអាមេរិក»។ នេះជាការលើកឡើងរបស់លោក Suga ៕
Tag:
រុស្ស៊ី
ជប៉ុន
កិច្ចព្រមព្រៀងនុយក្លេអ៊ែរ
© រក្សាសិទ្ធិដោយ thmeythmey.com
