អន្តរជាតិ
តើតំបន់ស្វយ័តទាំងប្រាំរបស់ចិនមានអ្វីខ្លះ? រូបភាព៖ ANU
× ចិន មានផ្ទៃដីធំបំផុតលំដាប់ទីបួនលើពិភពលោកដែលមានទំហំសរុបចំនួន ៩ ៥៩៦ ៩៦១ គីឡូម៉ែត្រការ៉េ។ ជាមួយផ្ទៃដីដ៏ធំបែបនេះ ប្រទេសនេះត្រូវបានបែងចែកជា ខេត្តចំនួន ២៣, តំបន់ស្វយ័តចំនួនប្រាំ, ទីក្រុងពិសេសចំនួន បួន មានសៀងហៃ, ចុងឈីង, ធានជីន, ប៉េកាំង និងតំបន់រដ្ឋបាលពិសេសចំនួនពីរមានហុងកុង និងម៉ាកាវ។ ក្នុងប្រទេសចិន តំបន់ស្វយ័តជាតំបន់ដែលមានរដ្ឋាភិបាលថ្នាក់តំបន់ផ្ទាល់ខ្លួន និងស្ថិតក្រោមការដឹកនាំដោយផ្ទាល់ពីរដ្ឋាភិបាលសហព័ន្ធ។ បន្ថែមពីនេះ តំបន់ស្វយ័តត្រូវបានបង្កើតឡើង សម្រាប់ក្រុមជនជាតិភាគតិច។ ខាងក្រោមនេះ គឺជាតំបន់ស្វយ័តទាំងប្រាំរបស់ចិន៖
១. ស៊ីនជាំង (Xinjiang)
ស្ថិតនៅភាគពាយព្យនៃប្រទេសចិន ស៊ីនជាំង គឺជាតំបន់ស្វយ័តធំបំផុតរបស់ចិន ជាមួយផ្ទៃដីសរុបប្រមាណ ១ ៦៦០ ០០០ គីឡូម៉ែត្រការ៉េ។ តំបន់នេះមានប្រជាជនសរុបចំនួន ២២,១លាននាក់ (ទិន្នន័យធនាគារ ADB ឆ្នាំ ២០១៧)។
២. ទីបេ (Tibet)
ស្ថិតនៅភាគនីរតី ទីបេ គឺជាតំបន់ស្វ័យ័តធំលំដាប់ទីពីររបស់ចិន ជាមួយផ្ទៃដីសរុបប្រមាណ ១ ២២៨ ៤០០ គីឡូម៉ែត្រការ៉េ។ តំបន់នេះមានប្រជាជនសរុបចំនួន ៣,៣ លាននាក់ (ឆ្នាំ២០១៦)។ ទីបេ ត្រូវបានបង្កើតជាតំបន់ស្វយ័តក្នុងឆ្នាំ១៩៦៥។ អ្វីដែលសំខាន់ ភ្នំដែលខ្ពស់ជាងគេលើលោក Everest មានទីតាំងស្ថិតនៅចន្លោះព្រំដែនរវាងតំបន់ទីបេ និងប្រទេសនេប៉ាល់។ ភ្នំ Everest មានកម្ពស់ប្រមាណ ៨ ៨៥០ ម៉ែត្រ។
៣. ម៉ុងហ្គោលីខាងក្នុង (Inner Mongolia)
ម៉ុងហ្គោលីខាងក្នុង គឺជាតំបន់ស្វយ័តមួយរបស់ចិន ដែលស្ថិតនៅភាគខាងជើងនៃប្រទេសចិន។ តំបន់នេះមានព្រំដែនជាប់នឹងប្រទេសម៉ុងហ្គោលី និងរុស្ស៊ី។ ម៉ុងហ្គោលីខាងក្នុង មានផ្ទៃដីសរុបប្រមាណ ១ ១៨៣ ០០០ គីឡូម៉ែត្រការ៉េ និងមានប្រជាជនសរុបជាង ២៤ លាននាក់ (ឆ្នាំ២០១០)។ វាត្រូវបានបង្កើតជាតំបន់ស្វ័យ័តក្នុងឆ្នាំ១៩៤៧។
៤. គ័ងស៊ី (Guangxi)
ស្ថិតនៅភាគអាគ្នេយ៍នៃប្រទេសចិន តំបន់ស្វយ័តគ័ងស៊ីមានព្រំដែនជាប់នឹងប្រទេសវៀតណាម។ តំបន់នេះមានផ្ទៃដីសរុប ២៣៦ ៧០០ គីឡូម៉ែត្រការ៉េ និងមានប្រជាជនសរុបជាង ៤៨ លាននាក់ (ឆ្នាំ២០០៩)។ គ័ងស៊ីត្រូវបានបង្កើតជាតំបន់ស្វយ័តក្នុងឆ្នាំ១៩៥៨។
៥. និងសៀ (Ningxia)
ស្ថិតនៅភាគពាយព្យនៃប្រទេសចិន និងសៀ ជាតំបន់ស្វយ័តតូចជាងគេបង្អស់របស់ចិន ជាមួយផ្ទៃដីសរុប ៦៦ ០០០ គីឡូម៉ែត្រការ៉េ។ តំបន់នេះមានប្រជាជនសរុបជាង ៦ លាននាក់ (ឆ្នាំ២០០៩) ហើយវាត្រូវបានបង្កើតជាតំបន់ស្វយ័តក្នុងឆ្នាំ១៩៥៨៕
© រក្សាសិទ្ធិដោយ thmeythmey.com