អន្តរជាតិ
×![]()
នាយករដ្ឋមន្ត្រីថៃ ប្រាយុទ្ធ ចន្ទអូចា នៅថ្ងៃទី ៥ ខែកុម្ភៈ បានចេញបញ្ជាបិទរោងចក្រប្រមាណ ៦០០ ទីតាំងជាបណ្តោះអាសន្នសិន ក្រោយរកឃើញថា រោងចក្រទាំងនោះបានបញ្ចេញផ្សែងពុលក្នុងកម្រិតគ្រោះថ្នាក់។ លើសពីនេះលោកបានព្រមានទៀតថា រោងចក្រមួយចំនួនផ្សេងទៀតក៏អាចនឹងត្រូវផ្អាកប្រតិបត្តិការដូចគ្នា ប្រសិនបើជារឿងចាំបាច់ដើម្បីសម្រួលស្ថានភាពខ្យល់នៅទីក្រុងបាងកក និងខេត្តនៅក្បែរៗនោះ។ 
ទាក់ទិននឹងការបញ្ចេញផ្សែងពុលពីរោងចក្រ លោក ប្រាយុទ្ធ បាននិយាយថា ក្រោយត្រួតពិនិត្យលើរោងចក្រប្រមាណ ១០ ម៉ឺនទីតាំង អាជ្ញាធរថៃបានរកឃើញថា រោងចក្រចំនួន ១៧០០ ទីតាំង បានបញ្ចេញផ្សែងពុលក្នុងកម្រិតគ្រោះថ្នាក់។ ជាលទ្ធផល លោក ប្រាយុទ្ធ បានចេញបញ្ជាឲ្យផ្អាកប្រតិបត្តិការរោងចក្រត្រឹម ៦០០ ទីតាំងសិន រហូតដល់ពួកគេកែសម្រួលប្រព័ន្ធបញ្ចេញផ្សែងពីរោងចក្រឲ្យកាន់តែប្រសើរ។
យោងតាមការចុះផ្សាយរបស់សារព័ត៌មានថៃ The Nation លោក ប្រាយុទ្ធ បានបញ្ជាឲ្យក្រសួងដឹកជញ្ជូនថៃរកដំណោះស្រាយដើម្បីកាត់បន្ថយកម្រិតខ្យល់កខ្វក់ ក្នុងនោះរួមមាន ហាមឃាត់ការប្រើប្រាស់រថយន្តចាក់ម៉ាសូត និងជំរុញការប្រើប្រាស់រថយន្តអគ្គិសនីជាដើម។ នេះក៏ដោយសារតែយានយន្តគឺជាមូលហេតុចម្បងនៃបញ្ហាខ្យល់កខ្វក់នៅទីក្រុងបាងកក។
ទន្ទឹមនឹងគ្នានេះដែរ នាយករដ្ឋមន្ត្រីរូបនេះ ក៏បានស្នើសុំឲ្យប្រជាជនកុំចាត់ទុកប្រតិបត្តិការបាញ់ទឺកទៅក្នុងខ្យល់របស់អាជ្ញាធរជារឿងលេងសើច ព្រោះថាយ៉ាងហោចណាស់វាអាចកាត់បន្ថយកម្រិតផ្សែងពុលនៅក្នុងខ្យល់បានផងដែរ។
សូមបញ្ជាក់ថា សាលាក្រុងបាងកកបានរាយការណ៍នៅព្រឹកថ្ងៃអង្គារទី៥ ខែកុម្ភៈថា មានតែសង្កាត់មួយប៉ុណ្ណោះក្នុងរាជធានីបាងកក គឺសង្កាត់ Bang Khen ដែលមានកម្រិតបំណុល PM2.5 លើសពីកម្រិតសុវត្ថិភាព ៥០ មីក្រូក្រាមក្នុងខ្យល់មួយម៉ែត្រគូប។ ទោះបីជាយ៉ាងនេះក្តី អាជ្ញាធរថៃក៏បានព្រមានទៀតថា ផ្សែងពុលអាចនឹងមានកម្រិតពុលកាន់តែខ្លាំង គិតចាប់ពីថ្ងៃពុធ ដល់ ថ្ងៃសុក្រក្នុងសប្តាហ៍នេះ និងចាប់ពីថ្ងៃពុធ ដល់ ថ្ងៃសុក្រសប្តាហ៍ក្រោយ៕
Tag:
ថៃ
ខ្យល់កខ្វក់
ប្រាយុទ្ធចាន់អូចា
© រក្សាសិទ្ធិដោយ thmeythmey.com
