អន្តរជាតិ
UN ថា អឺរ៉ុបអាចទាញយកចំណេញច្រើនជាងគេពីសង្គ្រាមពាណិជ្ជកម្មអាមេរិកនិងចិន រូបភាព AP
× បណ្តាក្រុមហ៊ុនក្នុងតំបន់អឺរ៉ុប ទំនងជាទទួលបានផលចំណេញច្រើនជាងគេ ក្នុងសង្គ្រាមពាណិជ្ជកម្មរវាងសហរដ្ឋអាមេរិកនិងចិន ដែលបានឆាបឆេះឡើងចាប់តាំងពីឆ្នាំ ២០១៧ មក។ នេះបើយោងតាមរបាយការណ៍ថ្មីមួយ ដែលបានចេញផ្សាយដោយភ្នាក់ងារពាណិជ្ជកម្មរបស់អង្គការសហប្រជាជាតិ នៅថ្ងៃទី ០៤ ខែកុម្ភៈ ។ យ៉ាងណាមិញ របាយការណ៍ដដែលបានបង្ហាញទៀតថា ប្រទេសទាំងរងគ្រោះខ្លាំងជាងគេក្នុងវិវាទពាណិជ្ជកម្មដ៏តានតឹងមួយនេះ គឺជាបណ្តាប្រទេសនៅក្នុងតំបន់អាស៊ីបូព៌ាតែម្តង។
សន្និសីទរបស់អង្គការសហប្រជាជាតិ សម្រាប់ពាណិជ្ជកម្មនិងការអភិវឌ្ឍន៍ ឬហៅកាត់ថា UNCTADបានប៉ាន់ស្មានថា ប្រមាណ ៨២ ភាគរយនៃទំនិញចិនតម្លៃ ២៥០ ពាន់លានដុល្លារ ដែលបច្ចប្បន្នជាប់ពន្ធរបស់អាមេរិក នឹងត្រូវដណ្តើមយកដោយក្រុមហ៊ុនក្នុងបណ្តាប្រទេសផ្សេងៗទៀត ក្រៅពីសហរដ្ឋអាមេរិក ឬចិន។ ក្នុងនោះត្រឹម ១២ ភាគរយប៉ុណ្ណោះនឹងត្រូវកាន់កាប់ដោយក្រុមហ៊ុនចិន។
ដូចគ្នាអ៊ីចឹងដែរ ប្រមាណ ៨៥ ភាគរយនៃទំនិញអាមេរិកតម្លៃ ១១០ ពាន់លានដុល្លារ ដែលជាប់ពន្ធរបស់ចិន នឹងត្រូវដណ្តើមយកដោយក្រុមហ៊ុនក្នុងបណ្តាប្រទេសផ្សេងៗទៀត ក្រៅពីមហាអំណាចទាំងពីរនេះ។ ក្នុងនោះត្រឹម ១០ ភាគរយប៉ុណ្ណោះ នឹងត្រូវក្តោបក្តាប់ដោយក្រុមហ៊ុនអាមេរិក។ យោងតាមរបាយការណ៍ខាងលើ បណ្តាប្រទេសដែលអាចទទួលផលចំណេញច្រើនពីភាពតានតឹងផ្នែកពាណិជ្ជកម្មគឺជាប្រទេសដែលមានសមត្ថភាពសេដ្ឋកិច្ច និងភាពប្រកួតប្រជែងគ្រប់គ្រាន់អាចជំនួសក្រុមហ៊ុនចិននិងអាមេរិកបាន។
ត្រង់ចំណុចនេះ UNCTAD បានប៉ាន់ប្រមាណថា ការនាំចេញរបស់សហភាពអឺរ៉ុបនឹងហក់ឡើងយ៉ាងខ្លាំង ដ្បិតអាចដណ្តើមយកការនាំចេញផលិតផលក្នុងទំហំទឹកប្រាក់ ៧០ ពាន់លានដុល្លារពីពាណិជ្ជកម្មទ្វេភាគីរវាងអាមេរិកនិងចិន ដែលកំពុងតានតឹង។ បណ្តាក្រុមហ៊ុនរបស់អឺរ៉ុប អាចដណ្តើមកាន់កាប់ការនាំចេញទំនិញពីចិនទៅកាន់អាមេរិកដល់ទៅ ៥០ពាន់លានដុល្លារ និង២០ពាន់លានដុល្លារពីការនាំចេញពីអាមេរិកទៅកាន់ចិន។ ចំណែក ជប៉ុន, ម៉ិកស៊ិក និងកាណាដា នឹងដណ្តើមបានជាង ២០ ពាន់លានដុល្លាររៀងៗខ្លួនផងដែរ។
យ៉ាងណាមិញ របាយការណ៍ដដែលនេះ បានបង្ហាញទៀតថា ខណៈតម្លៃនៃសង្វាក់ផលិតកម្មរបស់តំបន់អាមេរិកខាងជើង និងអាស៊ីបូព៌ាកំពុងរងឥទ្ធិពលអវិជ្ជមានដោយសារសង្គ្រាមពាណិជ្ជកម្ម តម្លៃនៃសង្វាក់ផលិតកម្មរបស់ប្រទេសក្នុងតំបន់អាស៊ីបូព៌ាក៏នឹងត្រូវធ្លាក់ចុះយ៉ាងគំហុកផងដែរ។ តួយ៉ាង ទំហំពាណិជ្ជកម្មក្នុងតំបន់អាស៊ីបូព៌ា ត្រូវរបាយការណ៍នេះបានប៉ាន់ស្មានថា នឹងត្រូវកាត់បន្ថយប្រមាណ ១៦០ ពាន់លានដុល្លារឯណោះ។
ជាចុងក្រោយ UNCTAD ក៏បានបង្ហាញក្តីបារម្ភពីឥទ្ធិពលនៃសង្គ្រាមពាណិជ្ជកម្មទៅលើកំណើនសេដ្ឋកិច្ចរបស់បណ្តាប្រទេសក្នុងតំបន់អាស៊ីបូព៌ា។ ជាក់ស្តែង ប្រមាណជាង ៧០ ភាគរយនៃប្រធានក្រុមហ៊ុនធំៗក្នុងប្រទេសចិន ជប៉ុន និងកូរ៉េខាងត្បូង បានបញ្ជាក់នៅក្នុងការស្ទង់មតិថ្មីៗនេះថា សង្គ្រាមពាណិជ្ជកម្មដែលកំពុងឆាបឆេះនេះ នឹងផ្តល់ផលអាក្រក់ដល់ការធ្វើជំនួញរបស់ពួកគេ៕
Tag:
UN
EU
សង្គ្រាមពាណិជ្ជកម្ម
អាមេរិក
ចិន
© រក្សាសិទ្ធិដោយ thmeythmey.com