អន្តរជាតិ
ឧបនាយករដ្ឋមន្ត្រីជប៉ុនសុំទោសក្រោយនិយាយថា ការធ្លាក់ចុះចំនួនប្រជាជនជាកំហុសស្ត្រី
×![]()
ឧបនាយករដ្ឋមន្ត្រីជប៉ុន លោក Taro Aso ត្រូវបានរងព្យុះរិះគន់យ៉ាងខ្លាំង ក្រោយពីលោកបានទម្លាក់កំហុសលើស្ត្រីដែលគ្មានកូន សម្រាប់វិបត្តិប្រជាសាស្ត្រដែលកំពុងកើតឡើងនៅជប៉ុន។ ប៉ុន្តែលោក Aso ក៏បានសុំទោសវិញដែរ។
ថ្លែងអំឡុងសន្ទរកថាមួយកាលពីថ្ងៃអាទិត្យទី៣ ខែកុម្ភៈ លោក Taro Aso ដែលជារដ្ឋមន្ត្រីក្រសួងហិរញ្ញវត្ថុជប៉ុនផងដែរនោះ បានលើកឡើងថា មូលហេតុនៃកំណើនមនុស្សវ័យចំណាស់គឺមកពីការធ្លាក់ចុះនៃអត្រាកំណើត និងការបង្កើនថ្លៃចំណាយលើផ្នែកសន្តិសុខសង្គម។ នេះបើតាមការចុះផ្សាយរបស់សារព័ត៌មាន The Japan Time ។
អ្នកនយោបាយវ័យ ៧៨ ឆ្នាំរូបនេះ បានគូសបញ្ជាក់ទៀតថា មនុស្សជាច្រើនបានទម្លាក់កំហុសលើមនុស្សវ័យចំណាស់សម្រាប់បញ្ហានេះ ប៉ុន្តែលោកមិនយល់ឃើញថាវាគឺជារឿងត្រឹមត្រូវនោះទេ។ ត្រង់ចំណុចនេះលោកបានបកស្រាយថា៖«បញ្ហាគឺកើតឡើងដោយសារតែអ្នកដែលពុំបានផ្តល់កំណើតនោះឯង»។
យ៉ាងណាមិញ មន្ត្រីជាន់ខ្ពស់រដ្ឋាភិបាលរូបនេះក៏សុំទោសវិញ។ បើតាមសារព័ត៌មាន The Guardian លោក Aso ប្រកាសដកសម្ដីវិញ និងប្រុងប្រយ័ត្នមាត់កចាប់ពីពេលនេះទៅ។
ជប៉ុនត្រូវបានគេស្គាល់ថាជា ប្រជាជាតិដែលប្រជាជនវ័យចំណាស់ច្រើនបំផុតមួយពិភពលោក ដ្បិតថាប្រមាណជាង ២០ ភាគរយនៃប្រជាជនសរុបរបស់ជប៉ុនមានអាយុច្រើនជាង ៦៥ ឆ្នាំ។ ហើយអត្រានៃកំណើតប្រជាជនរបស់ប្រទេសនេះបានធ្លាក់ចុះជាលំដាប់ គិតចាប់ពីទសវត្សរ៍ឆ្នាំ ១៩៧០ មកម្ល៉េះ។
យោងតាមទិន្នន័យរបស់ក្រសួងការងារនិងសុខាភិបាលជប៉ុន ក្នុងឆ្នាំ២០១៧ ទារកតិចជាង ៩៥ ម៉ឺននាក់កើត ខណៈដែលចំនួនអ្នកស្លាប់កើនឡើងដល់ ១,៣ លាននាក់។ ទីក្រុងតូក្យូដែលមានប្រជាជនរស់នៅជាង ៩ លាននាក់មានអត្រាកំណើតទាបបំផុត ត្រឹមតែ ១,១៧ ភាគរយប៉ុណ្ណោះ។ អ្វីដែលគួរឲ្យកត់សម្គាល់នោះគឺ ស្ត្រីដែលមានកូនកំពុងជួបនឹងការលំបាកក្នុងការស្វែងរកទីតាំងថែទាំកូនៗរបស់ពួកគេ នៅពេលដែលអ្នកម្តាយទាំងនោះចេញទៅប្រកបការងារនៅខាងក្រៅផ្ទះ។
សូមបញ្ជាក់ថា ក្នុងរយៈពេល៣០ឆ្នាំចុងក្រោយនេះ ភាគរយនៃស្ត្រីជប៉ុនអាយុចាប់ពី ៣០ ទៅ៣៤ ឆ្នាំ ដែលវិលត្រឡប់ទៅប្រកបការងារវិញក្រោយពីក្លាយជាម្តាយ បានកើនឡើងពី ៥០ ភាគរយ ទៅ ៧៥ ភាគរយ។ ប៉ុន្តែភាគច្រើននៃស្ត្រីទាំងនោះត្រូវបានក្រុមហ៊ុនតម្រូវឲ្យទទួលយកប្រាក់កម្រៃទាបជាងមុន។ នេះបើយោងតាមរបាយការណ៍របស់អង្គការសម្រាប់ការអភិវឌ្ឍនិងកិច្ចសហប្រតិបត្តិការ បានចុះផ្សាយកាលពីឆ្នាំ២០១៧៕
Tag:
ជប៉ុន
វិបត្តិមនុស្សសាស្ត្រ
© រក្សាសិទ្ធិដោយ thmeythmey.com
