អន្តរជាតិ
មន្ត្រីសន្តិសុខប៉ាគីស្ថានឈរយាមនៅក្រៅតុលាការកំពូលក្នុងរដ្ឋធានី Islamabad កាលពីថ្ងៃទី២៩ ខែមករា ឆ្នាំ ២០១៩។ រូបភាព៖ Straits Time
×![]()
តុលាការកំពូលរបស់ប៉ាគីស្ថាន នៅថ្ងៃទី៦ ខែកុម្ភៈ បានព្រមានកងយោធាដ៏មានឥទ្ធិពល និងភ្នាក់ងារសម្ងាត់ ដោយប្រាប់ឲ្យអ្នកទាំងនោះជៀសឲ្យឆ្ងាយពីសកម្មភាពនយោបាយ និងប្រកាន់ខ្ជាប់នូវសេរីភាពនៃការបញ្ចេញមតិ។ ការព្រមានដ៏កម្រមួយនេះ ធ្វើឡើងដើម្បីរិះគន់លើតួនាទីរបស់យោធានៅក្នុងបាតុកម្មមួយ ដែលបានផ្ទុះឡើងនៅក្នុងរដ្ឋធានីអ៊ីស្លាម៉ាបាដកាលពីឆ្នាំ២០១៧កន្លងទៅ។ 
សាលក្រមមួយដែលបានចុះផ្សាយនៅលើវេបសាយផ្លូវការ របស់តុលាការកំពូលប៉ាគីស្ថានបានលើកឡើងថា៖ «ប្រសិនបើកងទ័ពបណ្តោយខ្លួនឲ្យចូលក្នុងសកម្មភាពគ្រប់ទម្រង់នៃនយោបាយ ឬព្យាយាមគ្រប់គ្រងប្រព័ន្ធផ្សព្វផ្សាយ ពួកគេកំពុងបំផ្លាញបូរណភាពនិងវិជ្ជាជីវរបស់កងប្រដាប់អាវុធ»។
យោងតាមការចុះផ្សាយរបស់ទីភ្នាក់ងារព័ត៌មាន AFP តុលាការកំពូលប៉ាគីស្ថានបានសង្កត់ធ្ងន់ថា រដ្ឋធម្មនុញរបស់ប៉ាគីស្ថានហាមឃាត់សមាជិកនៃកងកម្លាំងប្រដាប់អាវុធពីការចូលរួមនៅក្នុងសកម្មភាពនយោបាយគ្រប់ទម្រង់ទាំងអស់។ ត្រង់ចំណុចនេះ តុលាការចេញបញ្ជាឲ្យរដ្ឋាភិបាលនិងមេបញ្ជាការកងទ័ពទាំងជើងគោក, ជើងអាកាស និងជើងទឹក ចាត់វិធានការប្រឆាំងទៅនឹងបុគ្គលដែលរកឃើញថា បានបំពានសច្ចាប្រណិធានរបស់ពួកគេក្នុងការប្រកាន់ខ្ជាប់នូវបទបញ្ជា។
គួររម្លឹកផងដែរថា បាតកម្មប្រឆាំងរដ្ឋាភិបាលមួយក្នុងឆ្នាំ២០១៧ ត្រូវបានដឹកនាំដោយក្រុមអ៊ីស្លាមមួយឈ្មោះថា Tehreek-e-Labaik Pakistan ( TLP) ។ បាតុកម្មនេះត្រូវបានរាលដាលកាន់តែធំ ក្រោយពីមានការប៉ះទង្គិចហិង្សាដែលឈានដល់ការជ្រៀតជ្រៀកពីសំណាក់កងយោធា។ ហេតុការណ៍នេះបានបង្ខំឲ្យរដ្ឋមន្ត្រីច្បាប់របស់ប៉ាគីស្ថានម្នាក់លាលែងពីតំណែង។
វីដេអូជាច្រើនដែលបានបែកធ្លាយលើបណ្តាញសង្គមបានបង្ហាញថា អំឡុងពេលបាតុកម្មជាច្រើនសប្តាហ៍នៅក្នុងរដ្ឋធានី កងទ័ពប៉ាគីស្ថានបានចែកលុយដល់ក្រុមអ្នកបាតុករទាំងនោះ។ សកម្មភាពនេះត្រូវបានគេសង្ស័យថា ពួកគេត្រូវបានគាំទ្រដោយកងទ័ព ក្នុងគោលដៅកេងចំណេញផ្នែកនយោបាយ ដោយចង់ដាក់សម្ពាធលើបក្សកាន់អំណាចរបស់អតីតនាយករដ្ឋមន្ត្រី Nawaz Sharif ។
ម្យ៉ាងវិញទៀត សាលក្រមរបស់តុលាការកំពូលប៉ាគីស្ថានដដែលនេះ ក៏បានលើកឡើងពីភាពរាំងស្ទះនៃសេរីភាពនៃការបញ្ចេញមតិ ដោយព្រមានថាគ្រប់ភ្នាក់ងារសម្ងាត់និងសារព័ត៌មានគាំទ្រយោធាទាំងអស់ពុំត្រូវធ្វើឲ្យហួសព្រំដែនអំណាចរបស់ពួកគេនោះទេ។ ជាក់ស្តែង សារព័ត៌មានក្នុងស្រុកប៉ាគីស្ថានធ្លាប់បានបកស្រាយថា ពួកគេទទួលរងសម្ពាធក្នុងអំឡុងពេលបោះឆ្នោតជាទូទៅកាលពីខែកក្កដា ដែលត្រូវបង្ខំឲ្យចុះផ្សាយតែអត្ថបទគាំទ្រនាយករដ្ឋមន្ត្រីជាប់ឆ្នោតថ្មីរបស់ប៉ាគីស្ថាន គឺលោក Imran Khan ៕
Tag:
ប៉ាគីស្ថាន
នយោបាយ
ប្រព័ន្ធផ្សព្វផ្សាយ
តុលាការកំពូល
© រក្សាសិទ្ធិដោយ thmeythmey.com
