មនុស្សជំនិតលោកត្រាំ ត្រូវតែងតាំងជាបេក្ខភាពប្រធានធនាគារពិភពលោក

អន្តរជាតិ

មនុស្សជំនិតលោកត្រាំ ត្រូវតែងតាំងជាបេក្ខភាពប្រធានធនាគារពិភពលោក

08, Feb 2019 , 9:59 pm

រូបភាព

ដោយ:

ប្រធានាធិបតីអាមេរិក ដូណាល់ ត្រាំ នៅថ្ងៃទី ៦ ខែកុម្ភៈ បានប្រកាសថា លោកស្នើតែងតាំងលោក David Malpass ជាប្រធានធនាគារពិភពលោកថ្មីជំនួសលោក Jim Yong Kim ។ លោក Malpass ដែលបច្ចុប្បន្នកាន់តំណែងរដ្ឋលេខាធិការក្រសួងរតនាគារទទួលបន្ទុកកិច្ចការអន្តរជាតិ។

ថ្លែងនៅក្នុងបន្ទប់ Roosevelt នៃសេតវិមានអាមេរិកនៅថ្ងៃទី៧ ខែកុម្ភៈ លោក ដូណាល់ ត្រាំ បានបញ្ជាក់ថា រឿងអាទិភាពបំផុតរបស់រដ្ឋបាលលោក គឺធានាឲ្យបានថាលុយពន្ធរបស់ប្រជាជនអាមេរិក ត្រូវបានយកទៅចំណាយដោយមានប្រសិទ្ធភាពនិងឈ្លាសវៃ ក្នុងគោលដៅបម្រើដល់ផលប្រយោជន៍អាមេរិក និងការពារគុណតម្លៃជនជាតិអាមេរិក។ បើតាមទីភ្នាក់ងារព័ត៌មាន AFP ប្រធានាធិបតីអាមេរិកទី ៤៥ រូបនេះអះអាងថា លោក David Malpass នៃបក្សសាធារណរដ្ឋគឺជា «បុរសពិសេស» ដែលមានសមត្ថភាពគ្រប់គ្រាន់សម្រាប់តួនាទីកំពូលមួយនេះ។

ជាមនុស្សជំនិតម្នាក់របស់លោកត្រាំ លោក Malpass ធ្លាប់ធ្វើជាទីប្រឹក្សាសេដ្ឋកិច្ចជាន់ខ្ពស់របស់លោក ត្រាំ អំឡុងយុទ្ធនាការរកសំឡេងឆ្នោតកាលពីឆ្នាំ ២០១៦ ផងដែរ។ ប្រសិនបើលោកឈ្នះការបោះឆ្នោតក្នុងចំណោមអ្នកកាន់ភាគហ៊ុនរបស់ធនាគារពិភពលោកមែននោះ លោកនឹងកាន់តំណែងជំនួសអតីតប្រធានធនាគារពិភពលោកលោក Jim Yong Kim ដែលបានប្រកាសចុះចេញពីតំណែងយ៉ាងភ្ញាក់ផ្អើលបំផុតកាលពីចុងឆ្នាំ ២០១៨ ហើយបានចូលជាធរមានកាលពីថ្ងៃទី ១ ខែកុម្ភៈ។

អត្ថបទទាក់ទង

ប្រធានធនាគារពិភពលោក ប្រកាសលាលែងពីតំណែង

ក្នុងរយៈពេល ២ ឆ្នាំក្នុងតំណែងជារដ្ឋលេខាធិការក្រសួងរតនាគារទទួលបន្ទុកផ្នែកកិច្ចការអន្តរជាតិ លោក David Malpass បានរិះគន់លើការផ្តល់កម្ចីអភិវឌ្ឍន៍ធំៗថា ជាការខ្ជះខ្ជាយលុយនិងគ្មានប្រសិទ្ធភាព ហើយចង់ឲ្យមានការធ្វើកំណែទម្រង់ទៀតផង។ កាលពីឆ្នាំ ២០១៧ លោកធ្លាប់បាននិយាយនៅក្នុងព្រឹទ្ធសភាអាមេរិកថា ស្ថាប័នដូចជាធនាគារពិភពលោកបានចំណាយលុយជាច្រើន ប៉ុន្តែពុំមានប្រសិទ្ធភាពច្រើនសោះ។

«ពួកគេជារឿយៗប្រព្រឹត្តអំពើពុករលួយក្នុងការអនុវត្តលក្ខខណ្ឌផ្តល់កម្ចី និងបរាជ័យក្នុងការផ្តល់ផលប្រយោជន៍ដល់ប្រជាជនដែលរស់នៅក្នុងប្រទេស»។ នេះជាការបញ្ជាក់របស់លោក Malpass ។

សូមបញ្ជាក់ថា ការបោះឆ្នោតជ្រើសរើសប្រធានធនាគារពិភពលោក ត្រូវធ្វើឡើងដោយប្រើប្រាស់នីតិវិធីពិសេសមួយ ដែលសមាជិកទាំង ២៥ ប្រទេសនៃគណៈកម្មការកំពូលមានចំណែកបោះឆ្នោតខុសៗគ្នា។ សហរដ្ឋអាមេរិកដែលមានចំណែកបោះឆ្នោតធំជាងគេចំនួន ១៦ ភាគរយនៃសំឡេងឆ្នោតសរុប មានឥទ្ធិពលខ្លាំងទៅលើការសម្រេចចិត្តនេះ។ ជាប្រពៃណី តំណែងនេះត្រូវជ្រើសរើសដោយរដ្ឋបាលអាមេរិក និងភាគច្រើនជាជនជាតិអាមេរិក។ យ៉ាងណាមិញ ការតែងតាំងបុគ្គលដែលធ្លាប់រិះគន់ដោយបើកចំហទៅលើធនាគារពិភពលោក អាចបង្កជារឿងចម្រូងចម្រាស់នៅក្នុងការបោះឆ្នោត៕