អន្តរជាតិ
មហាសេដ្ឋីអង់គ្លេស Branson គ្រោងធ្វើដំណើរទៅកាន់អវកាសដោយជិះយានផ្ទាល់ខ្លួន
× មហាសេដ្ឋីជនជាតិអង់គ្លេស លោក Richard Branson ប្រាប់ទីភ្នាក់ងារព័ត៌មាន AFP នៅថ្ងៃទី៧ ខែកុម្ភៈ ថា លោកមានគម្រោងធ្វើដំណើរទៅកាន់អវកាសក្នុងរយៈពេល ៤ ឬ ៥ ខែខាងមុខ ដោយប្រើប្រាស់យានអវកាសរបស់ក្រុមហ៊ុន Virgin Galactic របស់លោកផ្ទាល់តែម្តង។
«សេចក្តីប្រាថ្នារបស់ខ្ញុំគឺចង់ឡើងទៅកាន់អវកាសឲ្យចំថ្ងៃគំរប់ខួបទី៥០ឆ្នាំនៃការចុះចតលើភពព្រះចន្ទ។ យើងកំពុងប្រឹងប្រែងធ្វើការលើរឿងនេះ។ ត្រឹមខែកក្កដា យើងគួរតែអាចបញ្ចប់ការសាកល្បងរួចរាល់»។ លោក Richard Branson ដែលជាប្រធានក្រុមហ៊ុន Virgin និយាយបែបនេះនៅក្រៅព្រឹត្តិការណ៍មួយដើម្បីសាទរដល់ក្រុមហ៊ុន Virgin Galactic នៅឯសារមន្ទីរអវកាសនិងអាកាសក្នុងរដ្ឋធានីវ៉ាស៊ីនតោន។
បេសកកម្ម Apollo ទី១១ របស់អាមេរិក បានចុះចតដោយជោគជ័យលើភពព្រះចន្ទនៅថ្ងៃទី២០ ខែកក្កដា ឆ្នាំ១៩៦៩។ មហាសេដ្ឋីរូបនេះ ទំនងសម្រេចបំណងរបស់ខ្លួនឲ្យទាន់ខែកក្កដាតែម្ដង។ យ៉ាងណាមិញ លោក Branson បាននិយាយថា លោកមិនចង់បង្កើតពាក្យសន្យាណាដែលលោកមិនអាចរក្សាវាបាននោះឡើយ។ ដូច្នេះលោកត្រូវរង់ចាំក្រុមអ្នកវិទ្យាសាស្ត្ររបស់លោកចេញមុខមកបញ្ជាក់ថាពួកគេសម្រេចជោគជ័យ ១០០ ភាគរយសិន។
ម្យ៉ាងវិញទៀត លោក Branson លើកឡើងទៀតថា លោកត្រូវចំណាយលុយ ៣៥ លានដុល្លារជារៀងរាល់ខែលើក្រុមហ៊ុន Virgin Galactic។ កាលពីលើកមុនលោកក៏ធ្លាប់អះអាងថា លោកបានវិនិយោគលុយច្រើនជាងមួយពាន់លានដុល្លារដោយចាប់ដៃជាមួយក្រុមហ៊ុនផ្សេង គិតចាប់ពីដើមឆ្នាំ២០០០មកម្ល៉េះ។
ក្រុមហ៊ុន Virgin Galactic មានបំណងបញ្ជូនអ្នកដំណើរទៅកាន់អវកាស តែក្នុងរយៈពេលខ្លីប៉ុណ្ណោះ។ នេះមានន័យថា ពួកគេនឹងមិនទៅណាឆ្ងាយឡើយពីគន្លងរបស់ផែនដី។ បេសកកម្មនេះនឹងមានរយៈពេលខ្លីជាង និងថោកជាងគម្រោងរបស់ក្រុមហ៊ុន SpaceX របស់លោក Elon Musk ដែលគ្រោងបញ្ជូនមហាសេដ្ឋីជនជាតិជប៉ុនម្នាក់ទៅកាន់ភពព្រះចន្ទនៅដើមឆ្នាំ២០២៣។
សូមបញ្ជាក់ថា យានអវកាសរបស់ក្រុមហ៊ុន Virgin Galactic ធ្លាប់ហោះពីលើផែនដីក្នុងរយៈកម្ពស់ ៨០ គីឡូម៉ែត្រ ដែលអ្នកវិទ្យាសាស្ត្រអាមេរិកចាត់ទុកថាជាផ្នែកចុងបំផុតនៃអវកាស ជាលើកដំបូងបង្អស់ក្នុងខែធ្នូ ឆ្នាំ២០១៨កន្លងទៅ។ សម្រាប់កំណត់ត្រាអន្តរជាតិគឺក្នុងរយៈកម្ពស់ ១០០ គីឡូម៉ែត្រពីផែនដី។ យានអវកកាសរបស់ក្រុមហ៊ុន Virgin Galactic ដែលត្រូវបានគេហៅថា SpaceShipTwo ត្រូវបានបញ្ជាដោយអ្នកបើកបរចំនួន ២ នាក់។ យាននេះនឹងអាចផ្ទុកអ្នកដំណើរចំនួន ៦ នាក់ អមជាមួយនឹងអ្នកបើកបរចំនួន២រូបផងដែរ៕
Tag:
អវកាស
មហាសេដ្ឋីអង់គ្លេស
© រក្សាសិទ្ធិដោយ thmeythmey.com