អន្តរជាតិ
កញ្ចប់លុយការពារជាតិរបស់របបសឹកថៃ កើនដល់៧ពាន់លានដុល្លារក្នុងឆ្នាំ២០១៩
×![]()
ការចំណាយលើវិស័យការពារជាតិរបស់ថៃ បានហក់ឡើងជាគំហុកក្នុងរយៈពេល១០ឆ្នាំចុងក្រោយនេះ ពោលគឺអំឡុងពេលក្រុមយោធាបានដណ្តើមក្តាប់អំណាចចំនួនពីរលើកមកនេះ។ សភាថៃដែលជ្រើសតាំងដោយរបបសឹកបានស្នើលុយចំនួន ៧ពាន់លានដុល្លារសម្រាប់កញ្ចប់ថវិកាការពារជាតិក្នុងឆ្នាំ២០១៩។ ចំនួនថវិកាដែលដាក់ស្នើថ្មីនេះគឺកើនឡើង១ពាន់លានដុល្លារ គិតចាប់ពីរដ្ឋប្រហារឆ្នាំ២០១៤មក។ 
ការបង្កើនខ្ទង់ចំណាយជាបន្តបន្ទាប់ពីសំណាក់ក្រុងបាងកក ជាការពង្រឹងសមត្ថភាពយោធា និងដើម្បីទិញសម្ភារៈយោធាថ្មីទុកប្រើជំនួសយុទ្ធោបករណ៍មួយចំនួនហួសសម័យ។ ក្នុងឆ្នាំ២០១៧ ថៃបានបញ្ជាទិញនាវាមុជទឹកប្រភេទ Yuan-039A ចំនួន៣គ្រឿងពីចិន ដោយមួយគ្រឿងតម្លៃ៣៩៣លានដុល្លារ។ សម្រាប់គោលបំណងនៃការបញ្ជាទិញនេះ របបសឹកថៃបានអះអាងថា ខ្លួនត្រូវការចាំបាច់សម្រាប់ការពារធនធាននៅក្នុងសមុទ្រ Andaman ។ ការចរចារវាងភាគីទាំងពីរក៏នៅតែបន្ត ខណៈថៃចង់ឲ្យចិនសាងសង់ទីតាំងជួសជុលគ្រឿងបន្លាស់យោធាមួយកន្លែងក្នុងប្រទេសខ្លួន។
ដើម្បីជាកាដូរអបអរចូលឆ្នាំថ្មី២០១៩ យោធាថៃបានសម្រេចបញ្ជាទិញរថគ្រោះចម្បាំងចិនប្រភេទ VT-4 ចំនួន១២គ្រឿង ដែលគិតជាទឹកប្រាក់ប្រមាណ ២,២ពាន់លានបាត (៧០លានដុល្លារ) ខណៈក្នុងឆ្នាំ២០១៧ ថៃក៏បានទិញរថគ្រោះចិនប្រភេទ VT-4s ចំនួន១០គ្រឿងដែរ។ ជុំវិញរឿងនេះ រដ្ឋមន្ត្រីក្រសួងការពារជាតិថៃបាននិយាយថា រថគ្រោះប្រភេទ VT-4s នឹងយកទៅប្រើជំនួសរថគ្រោះអាមេរិកប្រភេទ M41 ដែលធ្លាប់ប្រើប្រាស់ចាប់តាំងពីសង្គ្រាមលោកលើកទីពីរមក។
ចិនពុំមែនជាអ្នកផ្គត់ផ្គង់អាវុធតែមួយគត់របស់ថៃនោះទេ។ រដ្ឋាភិបាលក្រុងបាងកក កាលពីឆ្នាំ២០១៧ បានប្រកាសថា កងកម្លាំងជើងអាកាសរបស់ខ្លួននឹងទទួលបានយន្តហោះចម្បាំងដែលផលិតដោយកូរ៉េខាងត្បូងចំនួន ៨គ្រឿង ដែលគិតជាទឹកប្រាក់ចំនួន ២,៦ពាន់លានដុល្លារ។ យន្តហោះស៊េរីទំនើបទាំង៨គ្រឿងនេះនឹងត្រូវទទួឡបានត្រឹមឆ្នាំ២០២០។ កាលពីឆ្នាំ២០១៨កន្លងទៅ ទ័ពជើងអាកាសថៃទើបទទួលបានយន្តហោះចម្បាំងប្រភេទ T-50TH Golden Eagles ចំនួន៤គ្រឿង ដែលស្មើនឹង១១០លានដុល្លារ។
ក្រៅពីចិន និងកូរ៉េខាងត្បូង អាមេរិកក៏ជាដៃគូលើវិស័យយោធាដ៏សំខាន់របស់ថៃដែរ។ អាមេរិកបានលក់គ្រឿងបន្លាស់យោធាសំខាន់ៗក្នុងទំហំទឺកប្រាក់ ៤៣៧លានដុល្លារទៅឲ្យថៃ តាមកម្មវិធី Foreign Military Sales (FMS) គិតចាប់ពីឆ្នាំ២០១៤មក។ ស្ថានទូតអាមេរិកបានប្រាប់ទីភ្នាក់ងារព័ត៌មាន AFP ថា៖«ថៃគឺជាប្រទេសមួយក្នុងចំណោមដៃគូចាស់របស់យើងក្នុងតំបន់អាស៊ី ហើយកិច្ចសហប្រតិបត្តិការដ៏ធំទូលាយរបស់យើងនឹងធ្វើបន្តទៀតលើរាល់បញ្ហា ដែលផ្តល់ផលចំណេញដល់ប្រទេសទាំងពីរ»។
ដូចដឹងស្រាប់ ថៃគឺជាសម្ព័ន្ធមិត្តដ៏យូរអង្វែងមួយរបស់អាមេរិក ប៉ុន្តែចំណងទាក់ទងរវាងប្រទេសទាំងពីរបានធ្លាក់ចុះក្រោយពីរដ្ឋប្រហារឆ្នាំ២០១៤។ យ៉ាងណាមិញ ប្រធានាធិបតីអាមេរិក ដូណាល់ ត្រាំ បានរឹតបន្តឹងទំនាក់ទំនងរវាងប្រទេសទាំងពីរឡើងវិញ នៅពេលដែលលោកបានអញ្ជើញមេដឹកនាំរដ្ឋប្រហារ លោកឧត្តមសេនីយ៍ ប្រាយុទ្ធ ចាន់អូចា ទៅកាន់សេតវិមានអាមេរិកក្នុងខែតុលា ឆ្នាំ២០១៧៕
Tag:
ថៃ
វិស័យការពារជាតិ
© រក្សាសិទ្ធិដោយ thmeythmey.com
