អន្តរជាតិ
នាយករដ្ឋមន្ត្រីជប៉ុន៖ ក្នុងក្រសែភ្នែកប្រជាជនជប៉ុន វៀតណាមជារដ្ឋឧស្សាហ៍ ឆ្លាត និងអត់ធ្មត់
×![]()
នាយករដ្ឋមន្ត្រីជប៉ុន ស៊ីនហ្សូ អាបេ បានបង្ហាញពីចក្ខុវិស័យក្នុងការធ្វើសហប្រតិបត្តិការ និងចាប់ដៃគូជាមួយនឹងវៀតណាមដើម្បីកសាងសន្តិភាព និងវិបុលភាពនៅក្នុងតំបន់។ លោកនាយករដ្ឋមន្ត្រី ក៏បានសរសើរ និងទទួលស្គាល់ពីការអភិវឌ្ឍដ៏លេចធ្លោរបស់វៀតណាមផងដែរ។ 
តាមរយៈកិច្ចសម្ភាសន៍ផ្តាច់មុខជាមួយភ្នាក់ងារព័ត៌មានវៀតណាមនៅថ្ងៃ១៦ កុម្ភៈ លោកនាយករដ្ឋមន្ត្រី ស៊ីនហ្សូ អាបេ បានអះអាងថា ជប៉ុន និងវៀតណាម មានទំនាក់ទំនងល្អខ្លាំងទាំងលើផ្នែកកិច្ចសហប្រតិបត្តិការសេដ្ឋកិច្ច និងការផ្លាស់ប្តូររវាងប្រជាជននិងប្រជាជន។ ជប៉ុន ក៏កំពុងសំឡឹងមើលឃើញពីភាពជាដៃគូជាមួយនឹងវៀតណាមក្នុងការដោះស្រាយបញ្ហាការពារ និងសន្តិសុខ, ការអភិវឌ្ឍសេដ្ឋកិច្ច និងបញ្ហាក្នុងតំបន់ផងដែរ។
លោកនាយករដ្ឋមន្ត្រី បានរម្លឹកពីរយៈពេល ២៥ឆ្នាំមុន ដែលជាពេលលោកត្រូវបានជ្រើសរើសជាសមាជិកសភាជប៉ុន ហើយ ក៏ជាពេលលោក និងបណ្តាសមាជិកសភាជប៉ុនផ្សេងទៀត បានបំពេញទស្សនកិច្ចទៅកាន់វៀតណាម ដែលពេលនោះ លោក អះអាងថា វៀតណាម កំពុងតែចាប់ផ្តើមអភិវឌ្ឍ និងអនុវត្តគោលនយោបាយកែទម្រង់។
អ្វីដែលគួរឲ្យកត់សម្គាល់ លោក អាបេ ដែលអះអាងថាធ្លាប់បានបំពេញទស្សនកិច្ចផ្លូវការ៤ដងទៅកាន់វៀតណាមគិតចាប់ពីលោកឡើងកាន់អំណាចជានាយករដ្ឋមន្ត្រីជប៉ុនក្នុងឆ្នាំ២០០៦មកនោះ បានបង្ហាញពីសុទិដ្ឋិនិយម និងទទួលស្គាល់ថា វៀតណាម គឺជាប្រទេសរបស់អាស៊ីអាគ្នេយ៍មួយ ដែលមានការអភិវឌ្ឍយ៉ាងក្លៀវក្លា។
តាមសម្តីរបស់លោកនាយករដ្ឋមន្ត្រីក្នុងកិច្ចសម្ភាសន៍ដដែលនោះ នៅក្នុងក្រសែភ្នែករបស់ប្រជាជនជប៉ុន វៀតណាម គឺជាប្រទេសមួយដែលមានភាពឧស្សាហ៍ព្យាយាម វ័យឆ្លាត និងអត់ធ្មត់ ហើយប្រជាជនវៀតណាម ក៏មានបេះដូងកក់ក្តៅទៀត។
លោកនាយករដ្ឋមន្ត្រី ក៏រំពឹងផងដែរថា នឹងមានប្រជាជនជំនាញរបស់វៀតណាម ទៅធ្វើការនៅក្នុងប្រទេសជប៉ុនកាន់តែច្រើន ស្របតាមគោលនយោបាយថ្មី និងបើកចំហររបស់រដ្ឋាភិបាលជប៉ុនក្នុងការទទួលកម្លាំងពលកម្មបរទេស ដែលនឹងចាប់ផ្តើមអនុវត្តពីថ្ងៃទី១ មេសា តទៅ។
ឆ្លៀតឱកាសផ្តល់សម្ភាសន៍ជាមួយនឹងសារព័ត៌មានវៀតណាមស្រាប់នោះ លោកនាយករដ្ឋមន្ត្រីជប៉ុនរូបនេះ បានបង្ហាញចេតនាដោយប្រយោលទៅកាន់រដ្ឋាភិបាលវៀតណាមក្នុងការធ្វើសហប្រតិបត្តិការជិតស្និទ្ធដើម្បីដោះស្រាយបញ្ហាប្រឈមក្នុងតំបន់ និងសកល ខណៈដែលវៀតណាម នឹងត្រូវធ្វើជាប្រធានវិលជុំនៃកិច្ចប្រជុំអាស៊ាននៅក្នុងឆ្នាំ២០២០ខាងមុខនេះ៕
Tag:
ជប៉ុន
វៀតណាម
អាស៊ាន
© រក្សាសិទ្ធិដោយ thmeythmey.com
