អន្តរជាតិ
របាយការណ៍៖ ប្រធានាធិបតីឥណ្ឌូណេស៊ីមានជោគជ័យក្នុងការអភិរក្សព្រៃឈើ តែបរាជ័យក្នុងការគ្រប់គ្រងរ៉ែ
រូបភាព the Straits Times
×![]()
ប្រធានាធិបតីឥណ្ឌូណេស៊ី ចូកូវី ដូដូ ទទួលបានការសរសើរ និងលើកទឹកចិត្តចំពោះការអនុវត្តគោលនយោបាយដើម្បីអភិរក្សព្រៃឈើ និងទប់ស្កាត់បញ្ហាភ្លើងឆេះព្រៃ ក៏ប៉ុន្តែក៏រងការរិះគន់ខ្លាំងពីក្រុមអង្គការពាក់ព័ន្ធបរិស្ថានជុំវិញការបណ្តែតបណ្តោយឲ្យធនធានធម្មជាតិរ៉ែ ត្រូវបានបំផ្លាញដែរ។ រដ្ឋាភិបាលក៏ពាក់ព័ន្ធនឹងការរឹតត្បឹតខ្លាំងទៅលើក្រុមសកម្មជន និងអ្នកតស៊ូមតិលើបញ្ហាធនធានរ៉ែដែរ។
វេទិកាអ្នកឃ្លាំមើលបរិស្ថានឥណ្ឌូណេស៊ី ថ្មីៗនេះ បានធ្វើរបាយការណ៍មួយដោយបញ្ជាក់ថា រដ្ឋបាលរបស់លោកប្រធានាធិបតី ចូកូវី ដូដូ បានធ្វើឲ្យភាពល្អប្រសើរច្រើនពាក់ព័ន្ធនឹងកិច្ចការអភិរក្ស និងថែរក្សាព្រៃឈើ បើប្រៀបធៀបជាមួយនឹងរដ្ឋបាលដឹកនាំរបស់ប្រធានាធិបតីអាណត្តិមុន។ នេះបើយោងតាមការចុះផ្សាយរបស់សារព័ត៌មានឥណ្ឌូណេស៊ី Jakarta Post។
ក៏ប៉ុន្តែតាមប្រភពព័ត៌មានដដែលនោះ ក្រុមអ្នកឃ្លាំមើលបរិស្ថានឥណ្ឌូណេស៊ី មិនអាចទទួលយកបានឡើយចំពោះចំណាត់ការរបស់រដ្ឋបាលលោកចូកូវី ទៅលើសកម្មជន និងអ្នកតស៊ូមតិពាក់ព័ន្ធនឹងបរិស្ថាន ទំនាស់ដីធ្លី និងបញ្ហារ៉ែ។ ក្រុមអ្នកឃ្លាំមើល បានចោទប្រកាន់ថា ប្រធានាធិបតីរូបនេះមិនបានគោរពតាមការសន្យា ដែលបានធ្វើឡើងក្នុងអំឡុងពេលបោះឆ្នោតឆ្នាំ២០១៤ ពាក់ព័ន្ធនឹងដំណោះស្រាយបញ្ហារ៉ែឡើយ។
តាមរបាយការណ៍របស់ក្រុមអ្នកឃ្លាំមើល ក្នុងអំឡុងពេលបួនឆ្នាំក្រោមការគ្រប់គ្រងរបស់លោកប្រធានធិបតីជិតផុតអាណត្តិរូបនេះ មានសកម្មជនបរិស្ថានជាង ៨០ នាក់ ទូទាំងប្រទេស ត្រូវបានកាត់ទោសដោយសារតែពួកគេ ចូលរួមតស៊ូមតិពាក់ព័ន្ធនឹងការរំលោភបំពានលើធនធានរ៉ែមាស និងធ្យូងថ្ម។
គួរជម្រាបផងដែរថា លោក ចូកូ វីដូដូ បានឡើងកាន់អំណាចជាប្រធានាធិបតីឥណ្ឌូណេស៊ី នៅក្នុងឆ្នាំ២០១៤ ហើយ លោក ក៏កំពុងតែស្ថិតនៅក្នុងដំណាក់កាលនៃការឃោសនារកសំឡេងគាំទ្រ ដើម្បីបើកផ្លូវឲ្យលោក ទៅដល់ការកាន់អំណាចជាថ្មី ក្នុងអាណត្តិទីពីរ ដែលជាអាណត្តិចុងក្រោយរបស់លោកផងដែរ៕
Tag:
ឥណ្ឌូណេស៊ី
អាស៊ាន
© រក្សាសិទ្ធិដោយ thmeythmey.com
