អន្តរជាតិ
សភាសិង្ហបុរី សួររដ្ឋមន្ត្រីការបរទេសខ្លួន៖ «ហេតុអ្វីសិង្ហបុរី ឬអាស៊ានមិនអាចកំណត់ពេលបញ្ជូនជនភៀសខ្លួនរ៉ូហ៊ីងយ៉ាបាន?»
× រដ្ឋមន្ត្រីការបរទេសសិង្ហបុរី លោក Vivian Balakrishnan បានចេញមុខបកស្រាយចំពោះមុខសភារបស់ខ្លួនពាក់ដំណើការវិវត្តន៍នៃបញ្ហាជនភៀសខ្លួនរ៉ូហ៊ីងយ៉ារបស់មីយ៉ាន់ម៉ា។ លោករដ្ឋមន្ត្រី បានអះអាងថា ទាំងសិង្ហបុរី ឬទាំងអាស៊ាន មិនអាចដើរតួជំនួសមុខមីយ៉ាន់ម៉ាលើបញ្ហានេះបានឡើយ ក៏ប៉ុន្តែសិង្ហបុរី ឬអាស៊ាន បានត្រៀមខ្លួនរួចជាស្រេចដើម្បីគាំទ្រ និងជ្រោមជ្រែងដំណើការនេះ។
សភាសិង្ហបុរី នៅថ្ងៃទី១៣ កុម្ភៈ បានកោះហៅរដ្ឋមន្ត្រីការបរទេសរបស់ខ្លួន គឺលោក Vivian Balakrishnan ដើម្បីបំភឺ្លពីការវិវត្តនៃវិបត្តិជនភៀសខ្លួនមីយ៉ាន់ម៉ា ជាមួយនឹងសំណួរថាតើ «ហេតុអ្វីបានជា សិង្ហបុរី ឬអាស៊ាន មិនអាចដាក់ពេលកំណត់សម្រាប់ដំណើការនៃការបញ្ជូនជនភៀសខ្លួនរ៉ូហ៊ីងយ៉ាទៅកាន់ទីកន្លែងដើមរបស់ពួកគេបាន?»
តាមការចុះផ្សាយរបស់សារព័ត៌មានសិង្ហបុរី The Strait Times លោករដ្ឋមន្ត្រី Vivian បានបំភ្លឺថា វិបត្តិជនភៀសខ្លួនរ៉ូហ៊ីងយ៉ា មានចរិកលក្ខណៈស្មុគស្មាញ ហើយមានបញ្ហាជាច្រើនដែលអាស៊ាន មិនអាចសម្រេច និងពិភាក្សាបាន និងតម្រូវឲ្យមីយ៉ាន់ម៉ាខ្លួនឯងផ្ទាល់ ត្រូវដោះស្រាយតាមគោលនយោបាយរបស់ខ្លួន។
រដ្ឋមន្ត្រីការបរទេសរូបនេះ បន្តទៀតថា បញ្ហាដែលលំបាក និងប្រឈមខ្លាំងក្នុងរឿងនេះ គឺការផ្តល់សិទ្ធិជាពលរដ្ឋស្របច្បាប់ និងសិទ្ធិនយោបាយ ដែលរឿងទាំងនេះ ត្រូវស្ថិតនៅក្រោមសិទ្ធិ និងការសម្រេចចិត្តរបស់រដ្ឋអធិបតេយ្យ ហើយអាស៊ាន ឬប្រទេសដទៃ ក៏មិនអាចលើកយកទៅជជែកក្នុងតុមូលរបស់ខ្លួនបានផងដែរ ។
យ៉ាងណាក៏ដោយ ប្រមុខការទូតសិង្ហបុរី ក៏បានបង្ហាញពីការយកចិត្តទុកដាក់របស់រដ្ឋាភិបាលសិង្ហបុរី ក៏ដូចជាអាស៊ាន នៅក្នុងដំណើការនៃបញ្ហានេះផងដែរ។ លោក បញ្ជាក់ថា អាស៊ាន បានត្រៀមខ្លួនរួចជាស្រេចហើយសម្រាប់គាំទ្រជនភៀសខ្លួន តាមរយៈការផ្តល់ និងជួយលើសម្ភារៈថែទាំសុខភាព និងអប់រំ និងកិច្ចសន្ទនារវាងភាគីពាក់ព័ន្ធឲ្យបានរលូត និងអាចជឿទុកចិត្តបាន។
គួរជម្រាបថា សិង្ហបុរី គឺជាប្រទេសអភិវឌ្ឍបំផុតមួយក្នុងតំបន់ និងពិភពលោក ដែលស្ថានភាពទោះចង់ ឬមិនចង់ សិង្ហបុរី ត្រូវតែនាំមុខក្នុងការដោះស្រាយបញ្ហា ដើម្បីបង្ហាញពីការទទួលខុសត្រូវលើការឆ្លើយតបទៅនឹងបញ្ហាចម្បងរបស់ពិភពលោក និងតំបន់។
តែយ៉ាងណាសម្រាប់វិបត្តិជនភៀសខ្លួនរ៉ូហ៊ីងយ៉ា ដែលផ្ទុះចេញពីការប៉ះទង្គិចគ្នារវាងក្រុមឧទ្ទាម និងកងកម្លាំងរដ្ឋាភិបាលមីយ៉ាន់ម៉ានៅក្នុងរដ្ឋ រ៉ាខាន ( Rakhine) និងបណ្តាលឲ្យប្រជាជនជាងកន្លះលាននាក់ បង្ខំចិត្តចាកចេញពីលំនៅឋាន មិនមែនជារឿងងាយឡើយ។ មិនមែនជារឿងងាយនោះក៏ព្រោះតែ វាជាប់ពាក់ព័ន្ធនឹងការគោលនយោបាយបង្រួបបង្រួមជាតិផង ខណៈនៅមីយ៉ាន់ម៉ា មានប្រជាជនចម្រុះជាតិសាសន៍ច្រើន ហើយក៏មានក្រុមជនជាតិមួយភាគ មានទាំងទាហានឯករាជ្យរបស់ខ្លួនទៀត៕
Tag:
មីយ៉ាន់ម៉ា
អាស៊ាន
សិង្ហបុរី
© រក្សាសិទ្ធិដោយ thmeythmey.com