អន្តរជាតិ
កិច្ចព្រមព្រៀងលក់ទឹករវាងម៉ាឡេស៊ី និងសិង្ហបុរីឡើងកំដៅជាថ្មី ដោយម៉ាឡេស៊ីទារឡើងថ្លៃទៀត
× រដ្ឋមន្ត្រីការបរទេសម៉ាឡេស៊ី លោក Saifuddin Abdullah នឹងដឹកនាំមន្ត្រីមួយក្រុមដើម្បីទៅចរចាតម្លៃទឹកដែលលក់ឲ្យសិង្ហបុរី។ នេះបើតាមការឲ្យដឹងរបស់នាយករដ្ឋមន្ត្រីម៉ាឡេស៊ី មហាធៀ មហាម៉ាត់ នៅថ្ងៃទី ១៧ ខែកុម្ភៈ។ យ៉ាងណាមិញលោកពុំបានបង្ហើបពីទីតាំងឬកាលបរិច្ឆេទនៃជំនួបនេះឡើយ។
ថ្លែងនៅមុខអ្នកសារព័ត៌មានក្នុងព្រឹត្តិការណ៍មួយកាលពីថ្ងៃអាទិត្យទី ១៧ កុម្ភៈ លោក មហាធៀ បានបញ្ជាក់ថា លោកកំពុងពិនិត្យលើតម្លៃលក់ទឹក ៣ សេនម៉ាឡេស៊ី(០,០០៥ដុល្លារ) សម្រាប់បរិមាណទឹក ៣៧៨៥ លីត្រ ដែលត្រូវបានសម្រេចក្នុងឆ្នាំ១៩២៦ ជាមួយភាគីសិង្ហបុរី។
«កាលនោះ តម្លៃ ១ សេន អាចទិញទំនិញបានជាច្រើនមុខ ប៉ុន្តែឥឡូវនេះជាមួយលុយ ១ សេន យើងមិនអាចទិញអ្វីបាននោះទេ ទោះបីជាលុយ ៣សេន ក៏យើងពុំអាចទិញអ្វីបានឡើយ»។ នេះជាការលើកឡើងរបស់លោកមហាធៀ ដោយបន្ថែមទៀតថា៖«ប្រសិនបើអ្នកគិតថាតម្លៃត្រូវកំណត់ក្នុងឆ្នាំ១៩២៦ នៅតែអាចរក្សារហូតដល់ឆ្នាំ៣០០០នោះ…តើវាសមហេតុផលទេ? ខ្ញុំយល់ថាវាមិនសមហេតុផលនោះទេ»។
តាមពិតទៅកិច្ចព្រមព្រៀងទិញលក់ទឹកនេះត្រូវបានបង្កើតឡើងឆ្នាំ ១៩៦២ ដែលវាផ្តល់សិទ្ធិពេញលេញដល់សិង្ហបុរីក្នុងការទាញយកទឹកពីទន្លេ Johor រៀងរាល់ថ្ងៃក្នុងបរិមាណ ៩៤៧ លានលីត្រ។ ចំណែករដ្ឋ Johor មានកាតព្វកិច្ចទិញទឹកដែលច្នៃហើយពីសិង្ហបុរីវិញក្នុងទំហំ ២ភាគរយនៃទឹកសិង្ហបុរីបូមបានសរុប ឬក៏ស្មើ ១៨ លានលីត្រដូចគ្នា។ កិច្ចព្រមព្រៀងនេះនឹងផុតកំណត់នៅក្នុងឆ្នាំ ២០៦១ខាងមុខនេះដែរ។
សម្រាប់ការទាញយកទឹកនេះ សិង្ហបុរីចំណាយលុយ ៣ សេន (០,០០៥ដុល្លារ) សម្រាប់បរិមាណទឹក ៣៧៨៥ លីត្រ ហើយសិង្ហបុរីលក់ទឹកចម្រាញ់រួចទៅឲ្យរដ្ឋ Johor ក្នុងតម្លៃ ៥០ សេន (០,០៩ដុល្លារ) សម្រាប់បរិមាណទឹក ៣៧៨៥ លីត្រ។ នេះបើតាមការចុះផ្សាយរបស់ទីភ្នាក់ងារព័ត៌មានម៉ាឡេស៊ី Bernama ។
កន្លងមកនាយករដ្ឋមន្ត្រីសិង្ហបុរី និងអតីតនាយករដ្ឋមន្ត្រីម៉ាឡេស៊ី ណាជីប រ៉ាហ្សាក់ បានប្តេជ្ញាសហការគ្នាដើម្បីធានាថា ការផ្គត់ផ្គង់ទឹកនេះនឹងអាចធ្វើទៅបានគ្រប់គ្រាន់ និងអាចទុកចិត្តបានអនុលោមតាមកិច្ចព្រមព្រៀងទ្វេភាគីឆ្នាំ ១៩៦២នេះដែរ។
យ៉ាងណាក៏ដោយ ការប្រឈមមុខគ្នាដោយសារទឹកមិនមែនជាលើកទីមួយឡើយសម្រាប់សិង្ហបុរី និងម៉ាឡេស៊ី ព្រោះរដ្ឋាភិបាលម៉ាឡេស៊ីបន្តប្រើប្រាស់កិច្ចព្រមព្រៀងនេះជាឧបករណ៍នយោបាយដាក់សម្ពាធលើសិង្ហបុរី។ គេអាចនៅចាំបានជម្លោះកាលពីឆ្នាំ ១៩៩៨ ព្រោះធ្ងន់ធ្ងរជាងពេលបច្ចុប្បន្នឆ្ងាយណាស់៕
Tag:
ម៉ាឡេស៊ី
សិង្ហបុរី
© រក្សាសិទ្ធិដោយ thmeythmey.com