ជាតិ
សង្គមជាតិ
ដើមឆ្នាំ២០១៩ គ្រោះអគ្គីភ័យបានកើតជិត១៥០លើក នៅទូទាំងប្រទេស ភាគច្រើនជាករណីភ្លើងឆេះព្រៃ រូបបានពីនាយកដ្ឋានបង្ការ ពន្លត់ និងសង្រ្គោះអគ្គីភ័យ
× ភ្នំពេញ៖ គ្រោះអគ្គីភ័យបានកើតឡើងទូទាំងប្រទេសចំនួន១៤៩លើក នៅដើមឆ្នាំ២០១៩ ។ ក្នុងគ្រោះអគ្គីភ័យនេះ មានមនុស្ស១០នាក់បានស្លាប់ របួស២៤នាក់ ឆេះផ្ទះជាង១០០ខ្នង។ បើតាមលោក នេត វន្ថា ប្រធាននាយកដ្ឋានបង្ការ ពន្លត់ និងសង្គ្រោះអគ្គីភ័យ បានមានប្រសាសន៍ថា គ្រោះអគ្គីភ័យឆ្នាំនេះ មានការកើនឡើងខ្លាំង បណ្តាលមកពីករណីភ្លើងឆេះព្រៃកើតច្រើនជាងរាល់ឆ្នាំ។
លោកបានបន្តប្រាប់សារព័ត៌មានថ្មីៗតាមទូរសព្ទដូច្នេះ ករណីភ្លើងឆេះព្រៃកើតច្រើនជាងរាល់ឆ្នាំព្រោះប្រជាពលរដ្ឋនៅក្នុងតំបន់នីមួយៗមានការធ្វេសប្រហែសច្រើន ក្នុងការដុតព្រៃដើម្បីយកដីធ្វើកសិកម្ម ឬដុតព្រៃដើម្បីរកសត្វជាដើម។ ពិសេសអាកាសធាតុឆ្នាំនេះមានការកើតឡើងកម្តៅខ្លាំងជាងរាល់ឆ្នាំផងនោះ ទើបធ្វើឱ្យមានការកើនឡើងនូវចំនួនអគ្គីភ័យដូច្នេះ។ ក្រៅពីករណីភ្លើងឆេះព្រៃនេះ ក៏មានការកើនឡើងខ្លាំងពីឆ្លងចរន្តអគ្គិសនីច្រើនផងដែរ។
ប្រធាននាយកដ្ឋានរូបនេះ បាននិយាយថា ដើម្បីបង្ការ និងទប់ស្កាត់នូវគ្រោះអគ្គីភ័យទាំងនេះ ចាំបាច់ត្រូវពង្រឹងទៅលើការចូលរួមពីវិស័យអ្នកវិនិយោគ ប្រជាពលរដ្ឋ និងម្ចាស់សំណង់អគារ ជាដើម។ ដោយប្រជាពលរដ្ឋគ្រប់រូប ត្រូវតែមានការចូលរួមឲ្យបានកាន់តែខ្លាំងស្រុះគ្នា គ្រប់រូបភាពក្នុងការទប់ស្កាត់អគ្គីភ័យ ដោយកុំមានគំនិតថាគ្រោះអគ្គីភ័យកើតឡើង ជាភារកិច្ចរបស់មន្ត្រីជំនាញអគ្គីភ័យ ឬក្រុមពន្លត់អគ្គីភ័យ។
លោក នេត វន្ថា បានព្រមានទៅដល់ម្ចាស់ផ្ទះ ឬជនណាដែលបង្កឲ្យកើតមានអគ្គីភ័យ ដោយចេតនា និងអចេតនា នឹងត្រូវទទួលរងការពិន័យនិងប្រឈមផ្លូវច្បាប់ជាធរមាន។ ជាមួយគ្នានេះ លោក បានបញ្ជាក់ថា ការបាញ់ពន្លត់អគ្គីភ័យទាំងឡាយមិនតម្រូវឲ្យប្រជាពលរដ្ឋបង់ប្រាក់ឡើង។ ព្រោះនេះជាភារកិច្ច និងកាព្វកិច្ចរបស់មន្ត្រីនគរបាលផ្តល់សេវាសាធារណៈជូនប្រជាពលរដ្ឋគ្រប់រូប។
យោងតាមរបាយការណ៍ និងលទ្ធផលការងាររបស់នាយកដ្ឋាននគរបាលបង្ការពន្លត់អគ្គីភ័យនិងសង្គ្រោះនៃអគ្គស្នងការដ្ឋាននគរបាលជាតិ រយៈពេលមួយឆ្នាំពេញក្នុងឆ្នាំ២០១៨ អគ្គីភ័យបានកើតឡើងចំនួន៥៣៤លើក គឺកើនឡើងចំនួន២០លើក បើធៀបនឹងឆ្នាំ២០១៧។ អគ្គីភ័យជាង៥០០លើកនេះ បានធ្វើឲ្យមនុស្សស្លាប់១៧នាក់ របួស៥២នាក់ ឆេះផ្ទះអស់៥៥៣ខ្នង និងឆេះតូបអស់ចំនួន៣៩៦តូប នៅទូទាំងប្រទេស ជាមួយទ្រព្យសម្បត្តិរាប់លានដុលា្លរទៀតផង។
មូលហេតុនាំឲ្យកើតមានអគ្គីភ័យភាគច្រើនបណ្តាលមកពីការតចរន្តអគ្គិសនីខុសបច្ចេកទេស និងការធ្វេសប្រហែសភ្លើងចង្ក្រាន ភ្លើងទៀន និងធូប។ល។
ដោយឡែក កាលពីថ្ងៃទី២១ កុម្ភៈ លោក វេង សាខុន រដ្ឋមន្ត្រីក្រសួងកសិកម្ម បានចេញសេចក្តីណែនាំមួយស្តីពីវិធានការការពារ ទប់ស្កាត់ភ្លើងឆេះព្រៃលិចទឹក និងព្រៃកោងកាង និងកិច្ចអន្តរាគមន៍សង្គ្រោះត្រីក្នុងរដូវប្រាំង ឆ្នាំ២០១៩។ ការណែនាំនោះបានបញ្ជាក់ថា កម្ពុជានឹងទទួលរងនូវបាតុភូតអែលនីណូ (El Nino) ដែលបង្កឱ្យអាកាសធាតុនារដូវប្រាំងនេះមានសភាពក្តៅហួតហែងសីតុណ្ហភាពអតិបរមាអាចហក់ឡើងដល់៤០-៤២អង្សាសេ ដែលងាយបង្កឱ្យមានភ្លើងឆេះព្រៃលិចទឹក និងព្រៃកោងកាង៕
© រក្សាសិទ្ធិដោយ thmeythmey.com