នាយករដ្ឋមន្ត្រី ចាត់ទុកកិច្ចការបរទេស ជារឿងដ៏សំខាន់ក្នុងការពង្រីកទំនាក់ទំនងជាមួយអន្តរជាតិ

ជាតិ

នយោបាយជាតិ

នាយករដ្ឋមន្ត្រី ចាត់ទុកកិច្ចការបរទេស ជារឿងដ៏សំខាន់ក្នុងការពង្រីកទំនាក់ទំនងជាមួយអន្តរជាតិ

07, Mar 2019 , 12:59 pm

រូបភាព

សម្តេច ហ៊ុន សែន ថ្លែងក្នុងពិធីបិទសន្និបាតបូកសរុបការងាររបស់ក្រសួងការបរទេស នៅព្រឹកថ្ងៃទី៧ ខែមីនា ឆ្នាំ២០១៩

ដោយ: ថ្មីៗ

«កិច្ចការបរទេស គឺជារឿងដ៏សំខាន់របស់កម្ពុជា ក្នុងការពង្រីកទំនាក់ទំនងនិងកិច្ចសហប្រតិបត្តិការរបស់ខ្លួនទៅកាន់ឆាកអន្តរជាតិ»។ សម្តេចនាយករដ្ឋមន្ត្រី ហ៊ុន សែន ថ្លែងដូច្នេះ ក្នុងពិធីបិទសន្និបាតបូកសរុបលទ្ធផលការងារឆ្នាំ២០១៨របស់ក្រសួងការបរទេស នៅព្រឹកថ្ងៃទី៧ ខែមីនា ឆ្នាំ២០១៩នេះ។

ទំព័រហ្វេសប៊ុករបស់សម្តេច ហ៊ុន សែន បានសរសេរថា សម្តេច ហ៊ុន សែន បានផ្តល់បទពិសោធ និងអនុសាសន៍មួយចំនូន ដល់មន្ត្រីការទូតកម្ពុជា។ បើតាមសំណេរលើទំព័រហ្វេសប៊ុក សម្តេច ហ៊ុន សែន ដែលធ្លាប់ធ្វើជារដ្ឋមន្ត្រីការបរទេសដែរនោះ បានវាយតម្លៃថា អង្គសន្និបាតរបស់ក្រសួងការបរទេសរយៈពេលពីរថ្ងៃនេះ បានរួមចំណែកយ៉ាងសំខាន់ក្នុងការជំរុញ និងការអភិវឌ្ឍទៅលើកិច្ចសហប្រតិបត្តិការសំខាន់ៗជាមួយបណ្ដាប្រទេសនានា ក្នុងការពង្រឹង និងកសាងទំនាក់ទំនង ដើម្បីទទួលបានផលប្រយោជន៍រួមដល់ការអភិវឌ្ឍប្រទេស ឲ្យមានការរីកចម្រើន។

របាយការណ៍ ដែលត្រូវបានផ្សព្វផ្សាយក្នុងសន្និបាត បង្ហាញថា បច្ចុប្បន្ន កម្ពុជា មានទំនាក់ទំនងការទូតជាមួយប្រទេសជាមិត្ដចំនួន១៧២ នៅលើពិភពលោក ហើយក្នុងចំណោមប្រទេសទាំង១៧២នោះ មានប្រទេស៦០ ដែលកម្ពុជា មានស្ថានតំណាងរបស់ខ្លួន៕