មន្ត្រី៖ ជំរឿន អាចនឹងត្រូវការពេលលើសពី១០ថ្ងៃ

ជាតិ

សង្គមជាតិ

មន្ត្រី៖ ជំរឿន អាចនឹងត្រូវការពេលលើសពី១០ថ្ងៃ

07, Mar 2019 , 8:19 pm

រូបភាព

អ្នកស្រី ហង់ លីណា អគ្គនាយិកាវិទ្យាស្ថានជាតិស្ថិតិនៃក្រសួងផែនការ។ រូបពីក្រសួងព័ត៌មាន

ដោយ: ថ្មីៗ

ការកំណត់ពេល១០ថ្ងៃ ក្នុងការធ្វើជំរឿនប្រជាជនទូទាំងប្រទេស ប្រហែលជាមិនគ្រប់គ្រាន់ឡើយ។ ការធ្វើជំរឿននេះ អាចនឹងត្រូវពន្យារពេល។

តាមការគ្រោងទុក ការធ្វើជំរឿន ដែលបានចាប់ផ្តើមដំណើរការពីថ្ងៃទី៣ ខែមីនាមក នឹងត្រូវបញ្ចប់នៅថ្ងៃទី១៣ ខែមីនា ឆ្នាំ២០១៩។ ប៉ុន្តែ អ្នកស្រី ហង់ លីណា អគ្គនាយិកាវិទ្យាស្ថានជាតិស្ថិតិនៃក្រសួងផែនការ បានលើកឡើងថា ជំរឿននេះ អាចមិនត្រូវបានបញ្ចប់តាមការគ្រោងទុកឡើយ ដោយសារតែជួបបញ្ហាប្រឈមមួយចំនួន ដែលត្រូវដោះស្រាយ។

បើតាមការចុះផ្សាយរសប់ក្រសួងព័ត៌មាន អ្នកស្រី ហង់ លីណា បានអះអាងាថា គម្រោងនេះ នឹងពន្យារពេល២ឬ៣ថ្ងៃបន្ថែមទៀត។ ក្រសួងព័ត៌មាន បានសរសេរពីសម្តីរបស់អ្នកស្រីថា ការពន្យារពេលបន្ថែមទៀតនេះ គឺដោយសារតែចំនួនគ្រួសារ ដែលត្រូវសម្ភាសមានច្រើនខុសពីការគ្រោងទុក ហើយខ្វះមន្ត្រីជាអ្នកសម្ភាស ព្រមទាំងប្រឈមនឹងការខ្វះថវិកា ក្នុងការធ្វើជំរឿនផងដែរ។

អ្នកស្រី បញ្ជាក់ថា តាមការគ្រោងទុក រដ្ឋាភិបាល ត្រូវការមន្ត្រីសម្ភាសតែ៤ម៉ឺននាក់ និងមន្ត្រីត្រួតពិនិត្យតែ១ម៉ឺននាក់ ប៉ុន្តែដល់ពេលអនុវត្តជាក់ស្តែង ក៏ជួបបញ្ហាឈម។ យ៉ាងណា មន្ត្រីជាន់ខ្ពស់របស់ក្រសួងផែនការរូបនេះ បានប្តេជ្ញាថា៖«យើង តែបន្តធ្វើកិច្ចការងារនេះឲ្យបានចប់សព្វគ្រប់ ដោយប្រើប្រាស់លទ្ធភាពដែលយើងមានស្រាប់ក្នុងការដោះស្រាយបញ្ហាទាំងនេះ»។

នេះជាលើកទី៣ហើយ នៃការធ្វើជំរឿនប្រជាជនកម្ពុជា។ រដ្ឋាភិបាលគ្រោងថវិកាជាង៨លានដុល្លារ សម្រាប់ការធ្វើជំរឿនលើកទី៣នេះ៕