សម្ដេច ហ៊ុន សែន ប្រកាសលើកលែងពន្ធភាពយន្ត៥ឆ្នាំ

ជាតិ

សិល្បះ

សម្ដេច ហ៊ុន សែន ប្រកាសលើកលែងពន្ធភាពយន្ត៥ឆ្នាំ

07, Mar 2019 , 9:59 pm

រូបភាព

រូបពីក្រសួងវប្បធម៌

ដោយ: ប៉ូ សាគុន

ភ្នំពេញ៖ ដើម្បីលើកទឹកចិត្តនិងលើកស្ទួយវិស័យភាពយន្តខ្មែរ រាជរដ្ឋាភិបាលបានសម្រេចអនុគ្រោះពន្ធដារយៈពេល៥ឆ្នាំ ដល់ដាច់ឆ្នាំ២០២៣។ នេះបើតាមសម្ដេចនាយករដ្ឋមន្ត្រី ហ៊ុន សែន ។

ថ្លែងក្នុងពិធីបិទមហោស្រពសិល្បៈយុវជនទូទាំងប្រទេសឆ្នាំទី៥ និងពិធីជួបជុំសិល្បករទូទាំងប្រទេសលើកទី២ សម្ដេច ហ៊ុន សែន បានបញ្ជាក់ដូច្នេះថា ៖« ដើម្បីជាការលើកទឹកចិត្តនិងលើកស្ទួយវិស័យសិល្បៈ និងការផលិតភាពយន្តខ្មែរ រាជរដ្ឋាភិបាលបានសម្រេចអនុគ្រោះពន្ធដារយៈពេល៥ឆ្នាំបន្តទៀត។ ការបោះឆ្នោតឆ្នាំ២០២៣ បើសិនជាប្រជាពលរដ្ឋកម្ពុជា សិល្បករសិល្បការិនី បន្តការគាំទ្រគណបក្សប្រជាជនកម្ពុជា បន្តគាំទ្រខ្ញុំធ្វើនាយករដ្ឋមន្ត្រីបន្តទៀត មានន័យថាពេលណា ហ៊ុន សែន នៅវត្តមានជានាយករដ្ឋមន្ត្រី ពេលនោះពន្ធមិនត្រូវបានដាក់បន្ទុក ទៅលើសិល្បៈនោះទេ»។

សូមស្តាប់ប្រសាសន៍ជាសំឡេងរបស់សម្តេចខាងក្រោម៖

ផ្នែកភាពយន្តដែលត្រូវលើកលែងពន្ធរួមមាន ទី១អនុញ្ញាតព្យួរពន្ធកាត់ទុក១៥ភាគរយ សម្រាប់ការផ្ដល់សិទ្ធិបញ្ចាំងក្នុងស្រុក។ ទី២ អនុញ្ញាតឱ្យព្យួរពន្ធលើប្រាក់ចំណូលជូនក្រុមហ៊ុនផលិតកម្មភាពយន្តខ្មែរ និងទី៣ អនុញ្ញាតព្យួរទុកការអនុវត្តអាករពិសេសលើសេវាលំហែកម្សាន្ត១០ភាគរយ ជូនដល់សិល្បៈសៀកហ្វាពន្លឺសិល្បៈខេត្តសៀមរាប។

សហគ្រាសផលិតភាពយន្ត និងសៀកត្រូវបំពេញកាតព្វកិច្ចពន្ធដារ កត់ត្រា និងកាន់កាប់បញ្ជីគណនេយ្យ ដាក់លិខិតប្រកាសពន្ធប្រចាំខែ និងប្រចាំឆ្នាំ ព្រមទាំងបំពេញកាតព្វកិច្ចពន្ធដារផ្សេងទៀត ឱ្យបានត្រឹមត្រូវដូចក្រុមពន្ធអាជីវកម្មផ្សេងទៀត ដើម្បីជាការរួមចំណែក ពង្រឹងអនុលោមភាពសារពើពន្ធ និងវប្បធម៌ពន្ធ នៅកម្ពុជា។ សម្តេច ហ៊ុន សែន ក៏បានបញ្ជាក់ថា ការលើកលែងពន្ធភាពយន្តនឹងបន្តទៅក្រោយឆ្នាំ២០២៣ ប្រសិនបើសម្តេចជាប់ឆ្នោត នៅអាណត្តិក្រោយទៀត៕