ជាតិ
កម្ពុជា និងហ្វីលីពីន នឹងមានជើងហោះហើរត្រង់លើកដំបូង នាដើមខែមេសា
× ភ្នំពេញ៖ កម្ពុជា និងហ្វីលីពីន នឹងមានជើងហោះហើរត្រង់លើកដំបូង ពីរដ្ឋធានីម៉ានីល-រាជធានីភ្នំពេញ នៅដើមខែមេសាខាងមុខ ។ កម្ពុជារំពឹងថា ការភ្ជាប់ជើងហោះហើរត្រង់នេះ នឹងជួយជំរុញកំណើនភ្ញៀវទេសចរនៅកម្ពុជា។
ការហោះហើរត្រង់ទៅវិញទៅមកនេះ ប្រើពេលតែប្រមាណជាង ២ម៉ោងប៉ុណ្ណោះ។ ត្រង់ចំណុចក្រសួងទេសចរណ៍ មានសុទិដ្ឋិនិយមថា ការតភ្ជាប់ជើងហោះហើរត្រង់នេះ គឺនឹងជួយជំរុញកំណើនទេសចរពីហ្វីលីពីន និងប្រទេសទី៣ មកកាន់កម្ពុជាកាន់តែច្រើន ខណៈបច្ចុប្បន្នភ្ញៀវទេសចរហ្វីលីពីនដែលមកទស្សនាកម្ពុជា ក្នុងឆ្នាំ២០១៨ មានប្រមាណតែជាង ៩ម៉ឺននាក់។
បច្ចុប្បន្ន ក្រុមហ៊ុនអាកាសចរមួយរបស់ហ្វីលីពីន ក៏បានហោះហើរត្រង់ពីទីក្រុងសេប៊ូ (ទីក្រុងមួយនៅលើកោះសេប៊ូ នៃប្រទេសហ្វីលីពីន) មកក្រុងសៀមរាបផងដែរ ដោយក្នុងមួយសប្ដាហ៍ហោះហើរបានចំនួន៤ជើង។
ការតភ្ជាប់ជើងហោះហើរត្រង់ម៉ានីល-ភ្នំពេញនេះ គឺជាប្រវត្តិសាស្ត្រលើកដំបូងរបស់កម្ពុជា ពីព្រោះតាំងពីឆ្នាំ១៩៧០មក កម្ពុជាមិនទាន់មានជើងហោះហើរត្រង់ណាមួយ ពីភ្នំពេញទៅមកម៉ានីលឡើយ។ ប៉ុន្តែដោយសារកម្ពុជាមានការអភិវឌ្ឍ ទើបក្រុមហ៊ុនអាកាសចរ Philippines Airline ក៏ដូចជាក្រុមហ៊ុនអាកាសចរក្រៅប្រទេសដទៃទៀត ពង្រីកការតភ្ជាប់ជើងហោះហើរត្រង់បែបនេះ។ ម្យ៉ាងវិញទៀត និន្ននាការរបស់ភ្ញៀវទេសចរបច្ចុប្បន្ន និយមចូលចិត្តការហោះហើរត្រង់ ដែលវាផ្ដល់ភាពងាយស្រួល និងប្រើពេលខ្លីឆាប់ដល់គោលដៅ។ នេះជាការលើកឡើងរបស់ក្រសួងទេសចរណ៍៕
Tag:
Airline
អាកាសចរ
ហ្វីលីពីន
© រក្សាសិទ្ធិដោយ thmeythmey.com