ជាតិ
សង្គមជាតិ
ក្រោយមានបញ្ជាពីសម្តេច! ពន្ធនាគារ ឈប់ឲ្យអ្នកជាប់ឃុំទាំងអស់ ប្រើទូរសព្ទ រូបពីហ្វេសប៊ុករបស់លោក នុត សាវនា អ្នកនាំពាក្យពន្ធនាគារ
× លោក ចាន់ គីមសេង អគ្គនាយកនៃអគ្គនាយកដ្ឋានពន្ធនាគារ បានចេញសេចក្តីណែនាំមួយ កាលពីថ្ងៃទី៤ ខែមីនា ឆ្នាំ២០១៩ ស្តីពីការបញ្ឈប់ការប្រើប្រាស់ប្រព័ន្ធទូរសព្ទនៅតាមមណ្ឌលអប់រំកែប្រែ និងពន្ធនាគាររាជធានី-ខេត្ត។ លោក បានហៅការដាក់ចេញវិធានការនេះ ថាជាអនុវត្តតាមអនុសាសន៍របស់សម្តេចនាយករដ្ឋមន្ត្រី ហ៊ុន សែន។
តាមរយៈសេចក្តីណែនាំ លោកអគ្គនាយក បានបញ្ជាទៅមន្ត្រីតាមពន្ធនាគារថា ត្រូវបញ្ឈប់ការប្រើប្រាស់ទូរសព្ទ ដែលធ្លាប់ដាក់ឲ្យជនជាប់ឃុំប្រើប្រាស់កន្លងមក ហើយត្រូវទប់ស្កាត់រាល់ការលួចលាក់នាំចូលទូរសព្ទចល័ត ទៅក្នុងមណ្ឌលអប់រំកែប្រែនិងពន្ធនាគារ។ លោក សង្កត់ធ្ងន់យ៉ាងដូច្នេះថា៖«ករណីរកឃើញទូរសព្ទ ដែលបម្រុងនាំចូល ឬរកឃើញទូរសព្ទក្នុងពន្ធនាគារ ត្រូវដកហូត។ ចំពោះជនណា ដែលប្រព្រឹត្តបទល្មើស ត្រូវមានវិមានការតាមផ្លូវច្បាប់និងតាមបទបញ្ជាផ្ទៃក្នុងពន្ធនាគារ»។
ក្នុងពិធីបើកការដ្ឋានសាងសង់សំណង់ ក្នុងគម្រោងការពារទឹកជំនន់និងកែលម្អប្រព័ន្ធប្រឡាយ-លូ ក្នុងរាជធានីភ្នំពេញ កាលថ្ងៃទី៤ ខែមីនា ឆ្នាំ២០១៩ សម្តេច ហ៊ុន សែន បានប្រាប់ទៅថ្នាក់ដឹកនាំខាងពន្ធនាគារ ឲ្យទប់ស្កាត់កុំឲ្យមានការប្រើទូរសព្ទក្នុងពន្ធនាគារ។ ប្រមុខរដ្ឋាភិបាល ទទួលព័ត៌មានថា មានអ្នកខ្លះ បានលួចទាក់ទងសាច់ញាតិតាមប្រព័ន្ធទូរសព្ទ ដើម្បីឲ្យជួយធានាបានចេញពីពន្ធនាគារ៕
Tag:
ពន្ធនាគារ
អ្នកជាប់ឃុំ
© រក្សាសិទ្ធិដោយ thmeythmey.com