អន្តរជាតិ
រដ្ឋមន្ត្រីហិរញ្ញវត្ថុម៉ាឡេស៊ី៖ ម៉ាឡេស៊ីនឹងក្លាយជាខ្លាអាស៊ីម្តងទៀតក្នុងរយៈពេល៣ឆ្នាំខាងមុខ
រដ្ឋមន្ត្រីក្រសួងហិរញ្ញវត្ថុ លោក Lim Guan Eng (ឆ្វេង) និងទីប្រឹក្សាផ្នែកប្រព័ន្ធផ្សព្វផ្សាយ និងទូរគមនាគមន៍របស់លោក មហាធៀ ក្នុងវេទិកាវិនិយោគម៉ាឡេស៊ី នៅថ្ងៃទី១៩ ខែមីនា ឆ្នាំ២០១៩ (រូបថត៖Bernama)
×![]()
ម៉ាឡេស៊ី នឹងវិលត្រឡប់ក្លាយទៅជា «ខ្លាសេដ្ឋកិច្ចអាស៊ី» ម្តងទៀតនារយៈពេល៣ឆ្នាំខាងមុខ។ នេះបើការបញ្ជាក់របស់រដ្ឋមន្ត្រីហិរញ្ញវត្ថុម៉ាឡេស៊ី លោក Lim Guan Eng នៅថ្ងៃទី១៩ ខែមីនា ដោយលើកអំណះអំណាងមួយចំនួន រួមមាន កំណើននៃការវិនិយោគផ្ទាល់ពីបរទេស និងភាពវិជ្ជមាននៃសម្ទុះសេដ្ឋកិច្ចផងដែរ។
ថ្លែងនៅក្នុងវេទិកាវិនិយោគម៉ាឡេស៊ីឆ្នាំ២០១៩ លោករដ្ឋមន្ត្រី Lim Guan Eng គូសបញ្ជាក់ថា ការវិនិយោគផ្ទាល់ពីបរទេស បានហក់ឡើងចំនួន៤៨ភាគរយ ស្មើនឹង ១៩,៧ពាន់លានដុល្លារ ក្នុងឆ្នាំ២០១៨ បើធៀបនឹងឆ្នាំ២០១៧ ដែលមានចំនួន ១៣,៣ពាន់លានដុល្លារ។ លោក Lim ពន្យល់ថា តួលេខនេះ គឺឆ្លុះបញ្ចាំងពីទំនុកចិត្តរបស់ក្រុមអ្នកវិនិយោគិនលើសុខភាពសេដ្ឋកិច្ចរបស់ម៉ាឡេស៊ី។
បើតាមការចុះផ្សាយរបស់សារព័ត៌មាន Bernama មន្ត្រីជាន់ខ្ពស់រូបនេះ លើកឡើងថា ការវិនិយោគចិន និងជប៉ុននៅម៉ាឡេស៊ី មានកំណើនខ្លាំងគួរឲ្យកត់សម្គាល់។ លោក Lim សង្ឃឹមថា ក្រុមអ្នកវិនិយោគក្នុងស្រុកក៏នឹងយកគំរូតាមនេះដែរ។ ដោយលើកឡើងពីភាពវិជ្ជមាននៃតួលេខសេដ្ឋកិច្ចឆ្នាំ២០១៨ លោករដ្ឋមន្ត្រីហិរញ្ញវត្ថុរូបនេះយល់ឃើញថា សេដ្ឋកិច្ចម៉ាឡេស៊ីកំពុងដំណើរការទៅមុខដោយល្អប្រសើរ។
ទន្ទឹមនឹងគ្នានេះ ក្នុងសេចក្តីថ្លែងការណ៍មួយកាលពីខែកុម្ភៈកន្លងទៅ លោក Lim បានគូសបញ្ជាក់ថា សេដ្ឋកិច្ចរបស់ម៉ាឡេស៊ី កំពុងដើរទៅមុខយ៉ាងខ្លាំងក្លា ហើយផលិតផលក្នុងស្រុកសរុប (GDP) ត្រូវរំពឹងថា កើនឡើងលើសចំនួន ៤,៩ភាគរយក្នុងឆ្នាំ២០១៩នេះ។
បើតាមសេចក្តីថ្លែងការណ៍ដដែលនេះ លោករដ្ឋមន្ត្រី អះអាងថា ការធ្លាក់ចុះនៃសន្ទស្សន៍ថ្លៃទំនិញប្រើប្រាស់ (CPI) បង្ហាញឲ្យឃើញថា គោលនយោបាយរបស់រដ្ឋាភិបាលស្តីពីការលុបចោលពន្ធលើសេវាកម្មនិងទំនិញ (GST) និងជំនួសមកវិញនូវពន្ធលើសេវាកម្មនិងការលក់ (SST) ព្រមទាំងការធ្វើឲ្យតម្លៃប្រេងឥន្ធនៈមានស្ថិរភាពនោះ ផ្តល់ផលចំណេញជាច្រើនដល់ប្រជាជន និងអ្នកជំនួញ៕
Tag:
ម៉ាឡេស៊ី
រដ្ឋមន្ត្រីហិរញ្ញវត្ថុ
ខ្លាអាស៊ី
© រក្សាសិទ្ធិដោយ thmeythmey.com
