អន្តរជាតិ
លោក ស៊ី ប្រាប់គ្រូបង្រៀនជួយសាបព្រោះគោលការណ៍បក្សកុម្មុយនីស្ត តែត្រូវប្រឆាំងផ្នត់គំនិត«លោកខាងលិច»
×![]()
ប្រធានាធិបតីចិន ស៊ី ជិនភីង បានស្នើឲ្យមានការរឹតបន្តឹងលើគោលគំនិត ឬមនោគមវិជ្ជានយោបាយក្នុងគ្រឹះស្ថានអប់រំគ្រប់កម្រិតថ្នាក់ ដោយទាមទារឲ្យគ្រូបង្រៀនជួយសាបព្រោះគោលការណ៍បក្សកុម្មយនិស្ត តែត្រូវប្រឆាំងទៅនឹង «ផ្នត់គំនិតមិនត្រឹមត្រូវ»។ ក្នុងន័យនេះ បក្សកុម្មុយនិស្តចិនចង់សំដៅលើ ផ្នត់គំនិត »លោកខាងលិច» រួមមាន លទ្ធិប្រជាធិបតេយ្យ និងសិទ្ធិមនុស្សជាដើម។
ការលើកឡើងរបស់លោកស៊ី ជីនភីង គឺធ្វើឡើងនៅក្នុងសិក្ខាសាលាមួយក្នុងរដ្ឋធានីប៉េកាំងកាលពីថ្ងៃទី១៨ ខែមីនា ដែលគ្រូបង្រៀនចិននៅទូទាំងប្រទេសបានចូលរួម។ បើតាមទីភ្នាក់ងារព័ត៌មានចិន Xinhua លោក ស៊ី ជិនភីង គូសបញ្ជាក់ថា ប្រជាជាតិចិន មានតួនាទីចាំបាច់ក្នុងការបណ្តុះបណ្តាលធនធានមនុស្សខ្លួនពីមួយជំនាន់ទៅមួយជំនាន់ ជាពិសេសយុវជន ដែលគាំទ្រគោលការណ៍បក្សកុម្មុយនីស្ត និងប្រព័ន្ធសង្គមនិយមរបស់ចិន។
មេដឹកនាំចិនដ៏មានឥទ្ធិពលរូបនេះ ក៏បានស្នើឲ្យស្ថាប័នអប់រំទាំងអស់របស់ចិន អនុវត្តគំនិតផ្តួចផ្តើមសាបព្រោះស្មារតីស្នេហាជាតិនិយមទៅដល់យុវជន និងច្រាលចោលនូវមនោគមវិជ្ជា និងផ្នត់គំនិតដែលបក្សកុម្មុយនីស្តចិនចាត់ទុកថា «ពុំត្រឹមត្រូវ»។ ត្រង់ចំណុចនេះ លោក ស៊ី បន្តថា គន្លឹះដើម្បីពង្រឹងការអប់រំនយោបាយនិងមនោគមវិជ្ជានោះគឺគ្រូបង្រៀន ដ្បិតពួកគេគួរមានទំនួលខុសត្រូវក្នុងការសាបព្រោះមនោគមវិជ្ជាដែលបក្សកុម្មុយនីស្តអនុវត្ត។
«យើងត្រូវតែសាបព្រោះមនោគមវិជ្ជាជាមូលដ្ឋានរបស់បក្សកុម្មុយនីស្តចិន និងទប់ទល់ដោយផ្ទាល់ជាមួយនឹងទស្សនៈ និងមនោគមវិជ្ជាទាំងឡាយណាដែលពុំត្រឹមត្រូវ»។ នេះបើតាមការបញ្ជាក់របស់លោកស៊ី ដោយចង់សំដៅទៅលើឥទ្ធិពលនិងផ្នត់គំនិតរបស់លោកខាងលិច។ លើសពីនេះ លោកនិយាយទៀតថា កាលណាសិស្ស ឬនិស្សិតឈ្វេងយល់ច្បាស់ពីលទ្ធិសង្គមនិយមបែបចិន ព្រមទាំងមានស្មារតីស្នេហាជាតិនិយមផងដែរនោះ ពួកគេនឹងចូលខ្លួនដោយស្ម័គ្រចិត្តក្នុងការកសាងប្រទេសសង្គមនិយមបែបទំនើបដ៏អស្ចារ្យមួយ និងតស៊ូដើម្បីអនុភាពរបស់ប្រជាជាតិចិន។
បើតាមសារព័ត៌មានចិនដដែល ប្រមុខរដ្ឋចិនរូបនេះ ក៏ទទូចឲ្យគ្រូបង្រៀនបង្កើតគំរូល្អៗសម្រាប់សិស្សទាំងក្នុងថ្នាក់រៀន កន្លែងឯកជន និងតាមបណ្តាញសង្គមផងដែរ។ នេះមានន័យថា គ្រូបង្រៀនទាំងអស់នឹងត្រូវទទួលខុសត្រូវចំពោះអ្វីគ្រប់យ៉ាងដែលពួកគេបង្ហោះលើប្រព័ន្ធអនឡាញ។
មែនទែនទៅ សន្ទរកថារបស់លោកស៊ី ជិនភីង គឺធ្វើឡើងក្រោយពីអាជ្ញាធរ កាលពីថ្មីៗនេះ បានបើកការបង្ក្រាបលើបាតុកម្មមួយ ដែលដឹកនាំដោយសកម្មជនក្មេងៗគាំទ្រលទ្ធិម៉ាក្សីស នៅឯសកលវិទ្យាល័យមួយចំនួន ក្នុងទីក្រុងសំខាន់ៗរបស់ប្រទេសចិន។ ការធ្វើបាតកម្មរបស់និស្សិតទាំងនេះ មានគោលបំណងតវ៉ាជុំវិញរឿងពុករលួយនិងវិសមភាពក្នុងសង្គមចិន។
សូមបញ្ជាក់ថា ចាប់តាំងពីលោក ស៊ី ជីនភីង ចូលកាន់តំណែងកាលពីឆ្នាំ២០១២មក បក្សកុម្មុយនីស្តចិន បានព្យាយាមទប់ស្កាត់ការសាបព្រោះ «គុណតម្លៃលោកខាងលិច» ក្នុងទីតាំងអប់រំផ្សេងៗ និងហាមឃាត់សៀវភៅពុម្ពនានា ដែលលើកស្ទួយ «ផ្នត់គំនិតលោកខាងលិច» រួមមាន លទ្ធិប្រជាធិបតេយ្យ និងសិទ្ធិមនុស្សជាដើម។
ក្នុងឆ្នាំ២០១៦ មេដឹកនាំចិនរូបនេះ បានប្តេជ្ញាប្រែក្លាយសកលវិទ្យាល័យទៅជាទីតាំងដើម្បីគាំពារការដឹកនាំរបស់បក្សកុម្មុយនីស្ត និងតម្រូវឲ្យគ្រប់ស្ថាប័នអប់រំទាំងអស់ពង្រឹងលើការបង្ហាត់បង្រៀនលទ្ធិម៉ាក្សីសនិយម។ ជាក់ស្តែង ស្ថាប័នអប់រំឧត្តមសិក្សាមួយចំនួន រួមមាន សកលវិទ្យាល័យ Peking និងសកលវិទ្យាល័យ Renmin បានបង្កើតដេប៉ាតេម៉ង់ថ្មី ដែលបង្រៀនលើ «គោលគំនិត ស៊ី ជិនភីង» ដោយហេតុថា ទ្រឹស្តីនយោបាយរបស់លោកស៊ី នេះ ត្រូវបានដាក់បញ្ចូលនៅក្នុងធម្មនុញបក្សកាលពីឆ្នាំ២០១៧៕
Tag:
ចិន
ស៊ីជិនភីង
មនោគមវិជ្ជានិងគោលគំនិតនយោបាយ
© រក្សាសិទ្ធិដោយ thmeythmey.com
