ជាតិ
កាំភ្លើងបាញ់ទឹក «Not Made in Cambodia» ជាទំនិញដ៏ត្រូវប៉ាន់ពេលចូលឆ្នាំខ្មែរ
រូបថត AFP
×![]()
ដោយ: ឡាយ សុភាវតី &
៥ដុល្លារ ៦ដុល្លារ ១០ដុល្លារ រហូតដល់ទៅ៣០ដុល្លារអាមេរិក! ទាំងនេះជាតម្លៃកាំំភ្លើងបាញ់ទឹក ដែលបានបម្រើភាពសប្បាយរីករាយនាឱកាសបុណ្យចូលឆ្នាំថ្មីប្រពៃណីជាតិ កាលពីពេលថ្មីៗកន្លងមកនេះ។ ទំនិញឱកាសនិយមទាំងនោះ នាំចូលពីវៀតណាម ថៃ និងចិន។
លោក រតនា ម្ចាស់ហាងទំនិញមួយកន្លែងក្នុងរាជធានីភ្នំពេញ បានប្រាប់ ThmeyThmey ថា មួយខែមុនពិធីបុណ្យចូលឆ្នាំថ្មី លោកបានបញ្ជាទិញកាំភ្លើងបាញ់ទឹកពីចិន ជាច្រើនរយដើម ដើម្បីយកមកលក់បន្ត។ «ខ្ញុំលក់ដាច់អស់ហើយ បន្ថែមពីលើនេះទៀត ខ្ញុំក៏បានបោះដុំឲ្យដៃគូលក់នៅថៃផងដែរ»។ នេះជាការបញ្ជាក់របស់លោក រតនា ដោយអះអាងថា លោកមិនយកទំនិញពីថៃ ឬវៀតណាម ឡើយ ព្រោះលោកដឹងថា ប្រទេសជិតខាងទាំងពីរក៏នាំចូលកាំភ្លើងបាញ់ទឹកពីចិនផងដែរ។
លោក ចូអី ម្ចាស់ហាងមួយកន្លែងទៀត បានកត់សម្គាល់ថា ឆ្នាំមុន មានការនិយមលេងកាំភ្លើងបាញ់ទឹកច្រើន ទើបឆ្នាំនេះ លោកសម្រេចបញ្ជាទិញកាំភ្លើងបាញ់ទឹកពីប្រទសចិននិងវៀតណាម។ លោកយកកាំភ្លើងពីចិនប្រមាណជាង៥០០ដើម វៀតណាមត្រឹមតែជាង២០០ដើមប៉ុណ្ណោះ។ ជុំវិញនឹងការយកមកពីចិននិងវៀតណាម លោក ចូអី ថាភាគច្រើនកាំភ្លើងគេច្រើនយកមកពីចិន ដោយសារលោក មានអ្នកស្គាល់នៅទាំងនៅចិននិងវៀតណាម។
ដោយឡែក កញ្ញា ឆរ លីង បានយកកាំភ្លើងបាញ់ទឹកពីប្រទេសថៃប្រមាណជាង៧០ដើម មកលក់ក្នុងឱកាសចូលឆ្នាំខ្មែរ។ កញ្ញា ធ្លាប់តែនាំទំនិញចូលពីប្រទេសថៃ ដូច្នេះក៏យកកាំភ្លើងបាញ់ទឹកពីប្រទេសថៃមកលក់តែម្តង ព្រោះគាត់ថា ជាទំនិញត្រូវប៉ាន់។
សម្រាប់តម្លៃកាំភ្លើងបាញ់ទឹកមានចាប់ពី៥ដុលា្លរ ដល់ជាង៣០ដុល្លារ ទៅតាមប្រភេទតូច ឬធំ អ្នកលក់ជាច្រើនបានអះអាងថា អតិថិជនហាក់ដូចជាមិនសូវសូញសាញឡើយ ព្រោះពួកគាត់ប្រញាប់កម្សាន្តសប្បាយជាមួយគ្រួសារមិត្តភក្តិ និងអ្នកដែលចូលរួមក្នុងពិធីសង្ក្រាន្តផ្សេងៗទៀត។
ទាក់ទងនឹងការប្រើកាំភ្លើងបាញ់ទឹកនេះ យុវជនម្នាក់ឈ្មោះ ស្រ៊ួរ ឆៃហេង ជាអ្នកលេងកាំភ្លើង អះអាងថា ដោយសារមានភាពងាយស្រួលយកតាមខ្លួន ហើយមិនខ្ជះខ្ជាយទឹកច្រើនដូចការជះទឹក ទើបទិញកាំភ្លើងបាញ់នេះ។ ចំពោះកាំភ្លើងបាញ់ទឹកនាំចូលមកពីខាងណា លោកមិនបានដឹងឲ្យប្រាកដនោះទេ គ្រាន់តែដឹងតាមអ្នកលក់ ប្រាប់ថារបស់ថៃ។
នៅកំពង់ចាម ក៏ដូចជាតាមបណ្តាខេត្តនានា ក្រៅពីការដាក់លក់នៅតាមហាងទំនិញ អាជីវករខ្លះក៏បានដឹកកាំភ្លើងទៅលក់នៅកន្លែងប្រារព្ធពិធីបាញ់ទឹកផងដែរ។ ក្រៅពីកាំភ្លើងបាញ់ ថង់ច្រកទូរសព្ទ និងសម្ភារផ្សេងៗ ក៏លក់ដាច់ផងដែរ។
ឱកាសចូលឆ្នាំលើកក្រោយ បើមានការបើកទូលាយចំពោះការលេងកាំភ្លើងបាញ់ទឹក តើកម្ពុជាគួរផលិតទំនិញទាំងនេះដោយខ្លួនឯងបានដែរទេ?
Tag:
កាំភ្លើងបាញ់ទឹក
សង្ក្រាន្ត
© រក្សាសិទ្ធិដោយ thmeythmey.com
