ជាតិ
សង្គមជាតិ
សម្តេច ស ខេង សរសេរលិខិតផ្លូវការអរគុណទូតខ្មែរនៅកូរ៉េខាងត្បូង សម្តេច ស ខេង និង លោក ឡុង ឌីម៉ង់ ថតជាមួយគ្នានៅកូរ៉េខាងត្បូង
× សម្តេចឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានផ្ញើលិខិតផ្លូវការដើម្បីថ្លែងអំណរគុណលោក ឡុង ឌីម៉ង់ ឯកអគ្គរាជទូតកម្ពុជាប្រចាំកូរ៉េខាងត្បូង ដែលបានជួយរៀបចំ និងសម្របសម្រួលការងារដល់ដំណើរទស្សនកិច្ចប្រតិភូជាន់ខ្ពស់ក្រសួងមហាផ្ទៃ ទាំងមុន និងក្នុងអំឡុងពេលនៃការបំពេញទស្សនកិច្ចពីថ្ងៃទី៣០ ខែមេសា ដល់ថ្ងៃទី៣ ខែឧសភា ឆ្នាំ២០១៩។
លោក ឡុង ឌីម៉ង់ បានសរសេរនៅលើហ្វេសប៊ុករបស់ខ្លួនថា៖ «ពិតជាកិត្តិយសដ៏ធំធេងសម្រាប់យើងខ្ញុំជាមន្ត្រីស្ថានទូតកម្ពុជានៅកូរ៉េ ចំពោះកាយវិការថ្លៃថ្លា និងឧត្តុង្គឧត្តមរបស់សម្ដេចក្រឡាហោម ឧបនាយករដ្ឋមន្ត្រី ស ខេង»។
លោក គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្តោប្រវេសន៍ ដែលបានអមដំណើរសម្តេច ស ខេង ទៅបំពេញទស្សនកិច្ចនៅកូរ៉េខាងត្បូង បានប្រាប់សារព័ត៌មានថ្មីៗថា សម្តេច ស ខេង ជាថ្នាក់ដឹកនាំម្នាក់ ដែលមានគោលការណ៍ច្បាស់លាស់ ទាំងការដឹកនាំនិងរបៀបរស់នៅផ្ទាល់ខ្លួន។ លោក លើកឡើងថា ក្នុងកិច្ចប្រជុំនានា សម្តេច តែងអរគុណមន្ត្រីក្រោមឱវាទ។
លោក បន្តថា ដោយសារតែស្ថិតក្នុងលក្ខណៈការទូត ទើបសម្តេចរដ្ឋមន្ត្រី ធ្វើលិខិតថ្លែងអំណរគុណចំពោះលោក ឡុង ឌីម៉ង់។ លោក បញ្ជាក់បែបនេះថា៖«គាត់ជាទូត អ៊ីចឹងធ្វើលិខិតផ្លូវការ គឺមានតម្លៃជាង អរគុណនឹងមាត់»។
នេះត្រូវបានចាត់ទុកជាករណីកម្រដែលថ្នាក់ជាន់ខ្ពស់របស់រដ្ឋាភិបាលសរសេរលិខិតផ្លូវការថ្លែងអំណរគុណដល់មន្ត្រីថ្នាក់ក្រោម៕
© រក្សាសិទ្ធិដោយ thmeythmey.com