តំណាងសាកលវិទ្យាល័យជាង៦០ ចែករំលែកពីការទទួលបានអាហារូបករណ៍សិក្សានៅសហរដ្ឋអាមេរិក

ជាតិ

សង្គមជាតិ

តំណាងសាកលវិទ្យាល័យជាង៦០ ចែករំលែកពីការទទួលបានអាហារូបករណ៍សិក្សានៅសហរដ្ឋអាមេរិក

21, Sep 2019 , 2:16 pm

រូបភាព

សិស្សានុសិស្សនៅតាមបណ្តាសាលានៅរាជធានីភ្នំពេញ ចូលរួមនៅក្នុងកម្មវិធី«ពិព័រណ៍ការសិក្សានៅសហរដ្ឋអាមេរិក» នៅសណ្ឋាគារសុខាភ្នំពេញ នាថ្ងៃទី២០ ខែកញ្ញា ឆ្នាំ២០១៩

ដោយ:

ភ្នំពេញ៖ តំណាងសាកលវិទ្យាល័យជាង៦០ ដែលនៅសហរដ្ឋអាមេរិក បានមកចែករំលែកពីរបៀបទទួលបានអាហារូបករណ៍សិក្សានៅសហរដ្ឋអាមេរិក នាថ្ងៃទី២០ ខែកញ្ញា នៅក្នុងកម្មវិធី«ពិព័រណ៍ការសិក្សានៃសហរដ្ឋអាមេរិក» ។ នៅក្នុងកម្មវិធីនេះមានការចូលរួមពីបណ្តាសិស្សនៅតាមសាលារៀនទូទៅនៅរាជធានីភ្នំពេញ។

កញ្ញា Linnette Franco មន្ត្រីកិច្ចការវប្បធម៌នៅសា្ថនទូតអាមេរិក បានបញ្ជាក់ពីគោលបំណងដែលស្ថានទូតរៀបចំកម្មវិធីនេះឡើង ដើម្បីឲ្យសិស្សានុសិស្ស និងនិស្សិតកម្ពុជាទទួលបានព័ត៌មានពីការអប់រំនៅតាមសកលវិទ្យាល័យ នៅសហរដ្ឋអាមេរិក។ ជាពិសេសយល់ដឹងពីរបៀបទទួលបានអាហារូបករណ៍ និងរបៀបដាក់ពាក្យដើម្បីជាប់អាហារូបករណ៍លើជំនាញដែលពួកគេពេញចិត្ត និងសម្រាប់ផ្តល់ឱកាសឲ្យសិស្សមានអាស្រ័យទាក់ទងផ្ទាល់ជាមួយអ្នកតំណាងនៅតាមសាកលវិទ្យាល័យនៅសហរដ្ឋអាមេរិក។

«ពិព័រណ៍ការសិក្សានៃសហរដ្ឋអាមេរិក»ធ្លាប់បានរៀបចំជាច្រើនលើកមកហើយនៅរាជធានីភ្នំពេញ និងនៅខេត្តសៀមរាប ដើម្បីឲ្យសិស្ស និងនិស្សិត និងមាតាបិតាបានជួបពិភាក្សាជាមួយតំណាងសាលាជាច្រើននៅសហរដ្ឋអាមេរិក។ តាមរយៈតាំងពិព័រណ៍នេះ បណ្តាសិស្សទូទាំងកម្ពុជាបានយល់ដឹងច្រើនពីសាកលវិទ្យាល័យដែលខ្លួនមានបំណងនឹងសិក្សានៅពេលអនាគត។ នេះបើតាមកញ្ញា Linnette Franco មន្ត្រីកិច្ចការវប្បធម៌នៅសា្ថនទូតអាមេរិក។

យុវតី សាន្ត កិតិកា ក៏មានបំណងបន្តការសិក្សានៅប្រទេសសហរដ្ឋអាមេរិកដែរ។ នៅក្នុងដៃមានកាន់ក្រដាសលិខិតព័ត៌មានសិក្សានៅតាមសកលវិទ្យាល័យនៅសហរដ្ឋអាមេរិក កញ្ញា សាន្ត កិតិកា បានប្រាប់ឲ្យដឹងថា កញ្ញាបានរកឃើញសាកលវិទ្យាល័យដែលត្រូវនឹងជំនាញរបស់ខ្លួនស្រឡាញ់ហើយ បន្ទាប់ពីបានសួរនាំអ្នកតំណាងសកលវិទ្យាល័យជាច្រើនរូប។ នៅពេលដែលនាងបញ្ចប់ថ្នាក់វិទ្យាល័យ នាងមានបំណងចង់រៀនផ្នែក Business ដើម្បីបំពេញបំណងរបស់ឱពុកម្តាយនាងដែលចង់ឲ្យនាងក្លាយជាអ្នករកស៊ី។ មុននឹងសម្រេចបំណងមួយនេះ នាងបេ្តជ្ញាថា នឹងខិតខំរៀនភាសាអង់គ្លេសបានឲ្យល្អសិន ដើម្បីមានឱកាសទទួលបានអាហារូបករណ៍សិក្សានូវជំនាញរបស់ខ្លួននៅសហរដ្ឋអាមេរិក។

ជាសិស្សរៀនភាសាខ្មែរថ្នាក់ទី១១ និងរៀនភាសាអង់គ្លេសថ្នាក់ទី១២ នៅសាលាប៊ែលធី បាននិយាយថា៖«កម្មវិធីនេះពិតជាសំខាន់ណាស់សម្រាប់ឲ្យសិស្សបានដឹងពីគោលបំណងរបស់ខ្លួនថាចង់ចាប់យកជំនាញអី ហើយអាចជ្រើសរើសសាកលវិទ្យល័យណាមួយដែលយើងថានឹងទៅរៀន ហើយធ្វើវាឲ្យបាន។ ប្រសិនខ្ញុំមិនបានមកចូលរួមកម្មវិធីនេះទេ ខ្ញុំប្រហែលជាមិនបានដឹងថាត្រូវរើសសាកលវិទ្យាល័យណាទេ នៅពេលដែលខ្ញុំរៀនចប់ទី១២។ ពេលយើងមកអ៊ីចឹង យើងអាចដឹងពីសាកលវិទ្យាល័យដែលល្បីៗនៅសហរដ្ឋអាមេរិកផងដែរ»។

ដោយឡែកយុវជន ជុន ព្រំនា សិស្សថ្នាក់ទី១១ នៅសាលាមីគីវ៉េ ដែលបានដើរសួរព័ត៌មានអំពីរបៀបដាក់អាហារូបករណ៍ បានបញ្ជាក់ថា ខ្លួនបានយល់ដឹងច្រើនពីគន្លឹះដាក់អាហារូបករណ៍សិក្សាជំនាញវិស្វកម្មដែលខ្លួនពេញចិត្ត ដើម្បីត្រៀមខ្លួនដាក់អាហារូបករណ៍សិក្សានៅប្រទេសសហរដ្ឋអាមេរិក។

បើតាមកញ្ញា Linnette Franco សិស្សកម្ពុជាដែលសិក្សាថ្នាក់ឧត្តមសិក្សានៅសហរដ្ឋអាមេរិកនៅឆ្នាំ២០១៧-២០១៨មានចំនួន៦៥៩នាក់។ មន្ត្រីកិច្ចការវប្បធម៌នៅសា្ថនទូតអាមេរិក បានបញ្ជាក់ថា ជារៀងរាល់ឆ្នាំសិស្សកម្ពុជាដែលសិក្សានៅសហរដ្ឋអាមេរិកមានការកើនឡើង ដោយឡែកនៅឆ្នាំ២០១៨ គឺកើនឡើងដល់៣០ភាគរយ៕