អន្តរជាតិ
ចិននៅតែជាប្រទេសមានប្រជាជនច្រើនលំដាប់ទីមួយ ឯឥណ្ឌាទីពីរ អាមេរិកទីបី
×
ដោយ៖ ងួន សុភាវត្តី
ប្រទេសដែលមានប្រជាជនរស់នៅច្រើនដែលជាប់ចំណាត់ថ្នាក់ទីមួយ នៅតែមហាយក្សចិនដដែល។ ឥណ្ឌា ក៏បន្តជាប់ចំណាត់ទីពីរ ស្របពេលដែលកំណើនប្រជាជនបានកើនឡើងរហ័ស ខណៈសហរដ្ឋអាមេរិកជាប់ចំណាត់ថ្នាក់ទីបី។
បើយោងតាមទិន្នន័យរបស់គេហទំព័រ World Population Reviewនិង Worldometers ចិនដែលឈរលើកំពូលតារាងប្រទេសដែលមានប្រជាជនច្រើនជាងគេ មានប្រជាជនសរុបរហូតដល់ទៅជាងមួយពាន់បួនរយលាននាក់ក្នុងឆ្នាំ២០១៩ ។ រីឯប្រទេសដែលជាប់ចំណាត់ថ្នាក់ទី២ឥណ្ឌាវិញមានប្រជាជនរស់នៅសរុបប្រមាណមួយពាន់បីរយលាននាក់។ សហរដ្ឋអាមេរិកដែលជាប្រទេសជាប់ចំណាត់ថ្នាក់ទីបីមានប្រជាជនសរុប ៣២៩លាននាក់ក្នុងឆ្នាំនេះដែរ។
របាយការណ៍ទិន្នន័យនេះក៏បានបង្ហាញផងដែរថា ឥណ្ឌូណេស៊ី និងប៉ាគីស្ថានបានទទួលចំណាត់ថ្នាក់ទី៤ និងទី៥។ ក្នុងនេះប្រជាជនរស់នៅឥណ្ឌូណេស៊ីមានប្រមាណ ២៧១លាននាក់ និងនៅប៉ាគីស្ថានមានជាង២១៧លាននាក់។
ចំណែកឯប្រទេសដែលជាលេខ៦គឺ ប្រទេសអាមេរិកឡាទីនប្រេស៊ីលដែលមានប្រជាជនសរុប២១១លាននាក់។ រដ្ឋអាហ្វ្រិកនីហ្សេរីយ៉ាជាប់ចំណាត់ថ្នាក់ទី៧ ក្នុងបញ្ជីប្រទេសដែលមានប្រជាជនច្រើនបំផុតទាំង១០ ហើយមានប្រជាជនសរុបប្រមាណ២០០លាននាក់។
ចំណាត់ថ្នាក់ទី៨ បានទៅលើបង់ក្លាដែសដែលមានប្រជាជនសរុប១៦៣លាននាក់។ ប្រទរុស្សីនិងម៉ិកស៊ិកបានជាប់ចំណាត់ថ្នាក់ជាមួយប្រជាជនចំនួន ១៤៥លាននាក់ និងម៉ិកស៊ិកនៅទីដប់មានប្រជាជនជាង១២៧លាននាក់។
ក្នុងនេះរបាយការណ៍ដែរក៍បានបង្ហាញពីចំនួនប្រជាជនក្នុងប្រទេសក្នុងតំបន់អាស៊ីអាគ្នេយ៍ផងដែរ។ ប្រទេសវៀតណាមបានទទួលចំណាត់លេខ១៥ ពិភពលោក ដោយមានប្រជាជនចំនួន៩៦លាននាក់ និងថៃជាប់ចំណាត់ថ្នាក់ទី២០មានចំនួនប្រជាជន៦៩លាននាក់។ ចំណែកឯកម្ពុជានិងឡាវទទួលបានចំណាត់ទី៧០និងទី១០៥។ នេះបើយោងតាមគេហទំព័រ World Population Review។
គួររំលឹកផងដែរថា ចំនួនប្រជាជនសរុបក្នុងពិភពលោកសព្វថ្ងៃនេះមានចំនួន៧,៧ពាន់លាននាក់ ដែលមានកើនឡើង ១,០៨ភាគរយ ឬស្មើនឹងជាង៨២លាននាក់បើធៀបនឹងឆ្នាំ២០១៨៕
© រក្សាសិទ្ធិដោយ thmeythmey.com