អន្តរជាតិ
ថៃ នឹងសាងសង់ខ្សែរថភ្លើងល្បឿនលឿនភ្ជាប់អាកាសយានដ្ឋានសំខាន់៣
×
ដោយ៖ ងួន សុភាវត្តី
ទីបំផុត គម្រោងខ្សែរថភ្លើងល្បឿលលឿនភ្ជាប់អាកាសយានដ្ឋានសំខាន់ៗទាំងបីរបស់ប្រទេសថៃ ឈានដល់ដំណាក់កាលចុះកិច្ចព្រមព្រៀងសាងសង់ហើយ ក្រោយការចរចារាប់ខែ។ គម្រោងខ្សែរថភ្លើង៧,៤ពាន់លានដុល្លារនេះ មានគោលដៅជំរុញវិស័យទេសចរណ៍ឲ្យកាន់តែប្រសើរឡើងថែមទៀត។
រដ្ឋាភិបាលថៃ នៅថ្ងៃទី២៤ ខែតុលា បានប្រកាសពីការចុះកិច្ចព្រមព្រៀងដើម្បីសាងសង់ផ្លូវរថភ្លើងល្បឿនលឿនតភ្ជាប់អាកាសយានដ្ឋានចំនួនបី។ ការចុះហត្ថលេខាធ្វើឡើងរវាងស្ថាប័នអយស្មយានរដ្ឋថៃ ជាមួយភាគីឯកជនដឹកនាំដោយក្រុមហ៊ុន Charoen Pokphand (CP) ។ ក្រុមហ៊ុនChina Railway Construction និងធនាគារជប៉ុនក៏បានយល់ព្រមផ្តល់ជំនួយផ្នែកហិរញ្ញវត្ថុ ក្នុងការសាងសង់ខ្សែរថភ្លើងប្រវែង២២០គីឡូម៉ែត្រដែលគ្រោងបើកដំណើរការក្នុងឆ្នាំ២០២៣ខាងមុខនេះ។
រថភ្លើងល្បឿនលឿននេះនឹងដឹកអ្នកដំណើរពីអាកាសយានដ្ឋាន Suvarnabhumi ក្នុងទីក្រុងបាងកក ទៅកាន់អាកាសយានដ្ឋាន Don Muang ដែលនៅម្ខាងទៀតនៃទីក្រុងបាងកក និងអាកាសយានដ្ឋាន U-Tapao នៅប៉ាតាយ៉ា ដែលមានចម្ងាយធ្វើដំណើររយៈពេលប្រហែលមួយម៉ោង និងមានល្បឿន២៥០គីឡូម៉ែតក្នុងមួយម៉ោង។
ការសាងសង់ ចាប់ផ្ដើមនៅអំឡុង១២ទៅ២៤ខែទៀត។ ក្នុងគម្រោងដ៏ធំនេះ រដ្ឋាភិបាលថៃផ្តល់ទុន៦៥ភាគរយស្មើនឹងទឹកប្រាក់២២៤,៥ពាន់លានបាត។ ចំនួនទឹកប្រាក់ដែលសេសសល់អ្នកវិនិយោគទុននឹងបំពេញបន្ថែម។ ក្នុងកិច្ចព្រមព្រៀងនេះក៏បានលើកឡើងដែលថា ក្នុងរយៈពេល៥០ឆ្នាំក្រោយ ខ្សែរថភ្លើងនេះនឹងត្រូវនៅក្រោមកម្មសិទ្ធរដ្ឋទាំងស្រុង។
តាមពិតទៅ សហគ្រាស CP និងក្រុមហ៊ុន១២ទៀតត្រូវបានជ្រើសរើសដោយរដ្ឋភិបាលថៃអាណត្តិមុន។ ក្រុមហ៊ុនទាំងនេះបានចាប់ផ្តើមចរចាជាមួយភ្នាក់ងាររដ្ឋតាំងពីខែមីនាមកប៉ុន្តែកិច្ចព្រមព្រៀងនេះមិនបានសម្រេចដោយសារមានបញ្ហាពីរឿងទីកន្លែង និងហានិភ័យមួយចំនួនទៀត។
នៅដើមខែតុលានេះ ឧបនាយករដ្ឋមន្ត្រីថៃ លោក Anutin Charnvirankul ដែលទទួលបន្ទុកផ្នែកផលប័ត្រដឹកជញ្ជូនបានដាក់ថ្ងៃកំណត់សំរាប់កិច្ចព្រមព្រៀងចាប់ផ្តើមសាgសង់ និងបានគំរាមដាក់ CP ទៅក្នុងបញ្ជីខ្មៅរបស់រដ្ឋាភិបាលបើបរាជ័យលើកិច្ចព្រមព្រៀងនេះ។ ។លោកឧបនាយករដ្ឋមន្ត្រី Anutin បានបង្ហោះសារលើបណ្តាញសង្គម Facebook ថា គម្រោងនេះនឹងទាក់ទាញបាននូវការវិនិយោគនិងការងារដែលសរុបជាទឹកប្រាក់ប្រមាណជា២០០ពាន់លានបាត៕
© រក្សាសិទ្ធិដោយ thmeythmey.com