ម្ចាស់សណ្ឋាគារ GREAT DUKE ព្រមបើកប្រាក់ឈ្នួលឲ្យបុគ្គលិកបន្ទាប់ពីតវ៉ាអស់រយៈពេលមួយព្រឹក

ជាតិ

ម្ចាស់សណ្ឋាគារ GREAT DUKE ព្រមបើកប្រាក់ឈ្នួលឲ្យបុគ្គលិកបន្ទាប់ពីតវ៉ាអស់រយៈពេលមួយព្រឹក

04, Nov 2019 , 4:07 pm

រូបភាព

បុគ្គលិកកំពុងតវ៉ាក្នុងបរិវេនខាងក្នុងមុខសណ្ឋាគារGREAT DUKE នៅព្រឹកថ្ងៃទី៤ វិច្ឆិកា ឆ្នាំ២០១៩(រូបភាពពីបុគ្គលិកទទួលកក់បន្ទប់នៅសណ្ឋាគារ GREAT DUKE )

ដោយ: ឡាយ សុភាវតី

បុគ្គលិកសណ្ឋាគារ ដឺ ហ្ក្រេត ឌ្យូក ភ្នំពេញ (THE GREAT DUKE PHNOM PENH) ប្រមាណ១០០នាក់ បានតវ៉ាសុំប្រើឈ្មួលប្រចាំខែតុលា និងទាមទារឲ្យបើកប្រាក់ឈ្នួលទៀងទាត់សម្រាប់ពួកគេ។ នេះគឺជាលើកទី៤ហើយ ដែលបុគ្គលិកសណ្ឋាគារមួយនេះ នាំគ្នាតវ៉ាដោយសារបញ្ហាបើកប្រាក់ឈ្នួលមិនទៀងទាត់។ បន្ទាប់ពីតវ៉ានៅព្រឹកថ្ងៃទី៤វិច្ឆិកា ម្ចាស់សណ្ឋាគារព្រមពៀងបើកប្រាក់ឈ្នួលនៅរសៀល។

មុខបរិវេណខាងក្នុងសណ្ឋាគារ ដឺ ហ្ក្រេត ឌ្យូក ភ្នំពេញ (THE GREAT DUKE PHNOM PENH) នៅថ្ងៃទី៤វិច្ឆិកា ឆ្នាំ២០១៩នេះ មានការប្រមូលផ្ដុំបុគ្គលិកជាង១០០នាក់ តវ៉ាឲ្យម្ចាស់សណ្ឋាគារបើកប្រាក់ឈ្នួលខែតុលា។ ប្រសិនបើគ្មានដំណោះស្រាយទេ បុគ្គលិកនឹងចេញតវ៉ានៅតាមបណ្ដោយផ្លូវម៉ៅសេទុង និងបន្តតវ៉ាដល់ក្រសួងការងារ និងបណ្ដុះបណ្ដាលវិជ្ជាជីវៈ។ នេះបើតាមលោក ទូច កុសល ប្រធានសហជីពកម្មករនិយោជិតវិស័យទេសចរណ៍នៅសណ្ឋាគារ ដឺ ហ្ក្រេត ឌ្យូក ភ្នំពេញ ។

ថ្លែងប្រាប់សារព័ត៌មានថ្មីៗ នៅថ្ងៃទី៤វិច្ឆិកានេះ លោក ទូច កុសល បាននិយាយដូច្នេះថា៖«យើងបានទាក់ទងទៅក្រសួងការងារ កាលពីថ្ងៃទី១ និងទី២វិច្ឆិកា ហើយក្រសួងថា នឹងជួយដោះស្រាយ ប៉ុន្តែដល់ថ្ងៃទី៤ វិច្ឆិកា នៅតែមិនទាន់ឃើញមានដំណោះស្រាយណាមួយឡើយ។ ដូច្នេះទើបបុគ្គលិក ប្រមូលផ្តុំគ្នាតវ៉ា»។

ជាបុគ្គលិកផ្នែកទទួលកក់បន្ទប់ម្នាក់ នៅសណ្ឋាគារ ដឺ ហ្ក្រេត ឌ្យូក ភ្នំពេញ សុំមិនបញ្ចេញឈ្មោះអះអាងថា ការបើកប្រាក់ខែយឺតយ៉ាវ ធ្វើឲ្យពួកគាត់ជួបបញ្ហាជាច្រើន ដូចជា បញ្ហាបង់ថ្លៃផ្ទះ ចំណាយប្រចាំថ្ងៃទាំងខ្លួនឯងនិងកូនៗ ព្រមទាំងបញ្ហាបង់ប្រាក់ជំពាក់ទៅធនាគារមិនទាន់ពេលកំណត់។ បុគ្គលិគជាង១០ឆ្នាំ ផ្នែកទទួលកក់បន្ទប់រូបនេះថា បុគ្គលិកទាំងអស់ ស្នើដល់ក្រសួងការងារជួយដោះស្រាយបញ្ហានេះ។

បន្ទាប់ពីការតវ៉ាពេលព្រឹកនោះ នៅម៉ោង១រសៀលនេះ ក្រសួងការងារបានជួយសម្របសម្រួលជាមួយម្ចាស់សណ្ឋាគារ ដោយព្រមព្រៀមថា បើកប្រាក់ឈ្នួលបុគ្គលិក ដែលមានប្រាក់ឈ្នួលចាប់ពីជាង១០០ទៅ២០០ដុល្លារ នៅម៉ោង២រសៀលក្នុងថ្ងៃទី៤ វិច្ឆិកានេះ។ ចំណែកបុគ្គលិក ដែលមានប្រាក់ឈ្នួលចាប់ពីជាង៣០០ទៅ១០០០ដុល្លារ បើកនៅម៉ោង៤រសៀល។ នេះជាបញ្ជាក់របស់ លោក ទូច កុសល ប្រធានសហជីពកម្មករនិយោជិតវិស័យទេសចរណ៍នៅសណ្ឋាគារ ដឺ ហ្ក្រេត ឌ្យូក ភ្នំពេញ ដោយបានសង្កត់ធ្ងន់ថា បញ្ហាយឺតយ៉ាវប្រាក់ឈ្នួលនេះ ទាល់តែបុគ្គលិកធ្វើការស្នើរសុំឬតវ៉ា ទើបមានដំណោះស្រាយ ហើយម្ចាស់សណ្ឋាគារ តែងតែសន្យានឹងមាត់ អំឡុងពេលសម្របសម្រួល។

កាលពីថ្ងៃទី៣ កញ្ញាកន្លងមក ក្រសួងការងារ ក៏ធ្លាប់បានជួយសម្របសម្រួលការបើកប្រាក់ខែនេះដែរ ហើយថែមទាំងប្រាប់ដល់បុគ្គលិកថា ពេលជួបរឿងប្រាក់ឈ្នួលយឺតយ៉ាវត្រូវទាក់ទងទៅក្រសួងកាងារ ដើម្បីក្រសួងដោះស្រាយជាម្ចាស់សណ្ឋាគារ។

សណ្ឋាគារ ដឺ ហ្គ្រេតឌ្យូក ស្ថិតតាមបណ្ដោយផ្លូវមុនីរ៉េតនិងម្ខាងទៀតតាមបណ្ដោយផ្លូវម៉ៅសេទុង ក្បែរភ្លើងស្តុបផ្សារដើមគ ជាអតីតសណ្ឋាគារ Intercontinental ។ សណ្ឋាគារនេះ បានប្ដូរឈ្មោះ នៅថ្ងៃទី១ មករា ឆ្នាំ២០១៨ ក្រោយពេលបានផ្លាស់ប្ដូរថៅកែ។ ប៉ុន្តែបុគ្គលិកសណ្ឋាគារនេះភាគច្រើន មានអតីតភាពការងារយូរឆ្នាំ តាំងពីនៅជាសណ្ឋាគារ Intercontinental មកម្ល៉េះ។ នេះបើតាមលោក ទូច កុសល ដែលបានបន្ថែមថា បុគ្គលិកសណ្ឋាគារ ដឺ ហ្គ្រេតឌ្យូក មានជាង២០០នាក់ ៕