អន្តរជាតិ
អត្រាកំណើតទារកនៅជប៉ុន ធ្លាក់ចុះដល់កំណត់មិនធ្លាប់មានពីមុនមក រូបភាព AFP
× ក្រសួងសុខុមាលភាពជប៉ុន នៅថ្ងៃទី ២៤ ខែធ្នូ បានបញ្ចេញរបាយការណ៍ឲ្យដឹងថា កំណើតទារកបានធ្លាក់ចុះក្នុងរង្វង់ប្រមាណជា ៥,៩ភាគរយ ក្នុងឆ្នាំ២០១៩ ។ ការណ៍នេះ ត្រូវបានគេមើលឃើញថា គឺជាការថយចុះនៃអត្រាកំណើតទាបបំផុត ចាប់តាំងពីរដ្ឋាភិបាលជប៉ុន បានចាប់ផ្តើមប្រមូលទិន្នន័យទាក់ទងនឹងអត្រាកើតតាំងពីឆ្នាំ ១៨៩៩ មក។
អត្រាកំណើត នៅក្នុងប្រទេសជប៉ុន បានធ្លាក់យ៉ាងគំហុក។ ពោលគឺចំនួនទារក ដែលបានកើតទាំងអស់មានត្រឹមតែជាង ៨៤ម៉ឺននាក់តែប៉ុណ្ណោះ ក្នុងឆ្នាំ ២០១៩ ខណៈពេល ឆ្នាំ ២០១៨ មានចំនួនជាង ៩១ម៉ឺននាក់។ បើតាមក្រសួងទទួលបន្ទុកក្នុងការប្រមូលទិន្នន័យ អត្រាកំណើតនេះ គឺជាការធ្លាក់ចុះធំបំផុតចាប់តាំងពីឆ្នាំ ១៩៧៥ ដែលបណ្តាលមកពីស្ត្រី ដែលមានអាយុចាប់ពី២៥ឆ្នាំ ដល់ ៣៩ឆ្នាំ គឺមានចំនួនតិច។
ក្រៅពីអត្រាកំណើតធ្លាក់ចុះខ្ពស់ អត្រាមរណភាពរបស់ប្រជាជនជប៉ុន ក៏បានកើនឡើងខ្ពស់ជាងមុនដែរ។ ជាក់ស្តែង ក្នុងឆ្នាំ ២០១៩ ប្រជាជនជប៉ុន បានទទួលមរណភាពជាង ៥១ម៉ឺននាក់ ដែលអត្រានេះកើនខ្ពស់ជាលើកទីមួយ លើសពីចំនួន ៥០ម៉ឺននាក់។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
សូមបញ្ជាក់ថា រដ្ឋាភិបាលជប៉ុន សង្ឃឹមថា អត្រាកំណើតនឹងមាន១,៨ភាគរយ ដែលជាតួលេខដ៏ពិបាកមួយ ខណៈពេលឆ្នាំ២០១៨ មានត្រឹមតែ ១,៤ភាគរយតែប៉ុណ្ណោះ។ ប្រសិនបើអត្រាកំណើតនៅតែធ្លាក់ចុះ ហើយអត្រាមរណភាពនៅតែកើនខ្ពស់បែបនេះ វាអាចធ្វើឲ្យប៉ះពាល់ដល់កំណើនសេដ្ឋកិច្ចជប៉ុនទៅថ្ងៃខាងមុខ៕
© រក្សាសិទ្ធិដោយ thmeythmey.com