ក្រុមហ៊ុន តូយ៉ូតា លើកទឹកចិត្តកុមារគ្រប់រូបលេងកីឡាដើម្បីសុខភាព និងមានសាមគ្គីភាព

អត្ថបទពាណិជ្ជកម្ម

ក្រុមហ៊ុន តូយ៉ូតា លើកទឹកចិត្តកុមារគ្រប់រូបលេងកីឡាដើម្បីសុខភាព និងមានសាមគ្គីភាព

06, Feb 2020 , 3:50 pm

រូបភាព

ដោយ: ថ្មីៗ

ក្រុមហ៊ុន តូយ៉ូតា (ខេមបូឌា) ដែលជាក្រុមហ៊ុនទទួលសិទ្ធិនាំចូលផ្តាច់មុខ នូវរថយន្ត និងគ្រឿងបន្លាស់ម៉ាក តូយ៉ូតា គ្រប់ប្រភេទ បានសហការជាមួយ Soriya រៀបចំសន្និសីទសារព័ត៌មាន ស្តីអំពីការប្រកួតឆ្នាំ ២០១៩-២០២០ កាលពីថ្ងៃទី៥ ខែកុម្ភៈ ឆ្នាំ២០២០ នៅទីស្នាក់ការកណ្តាលរបស់ក្រុមហ៊ុន តូយ៉ូតា (ខេមបូឌា) សន្និសីទសារព័ត៌មាននេះប្រព្រឹត្តទៅ ក្រោមអធិបតីភាព លោកឧកញ៉ា គង់ នួន ប្រធានក្រុមហ៊ុន តូយ៉ូតា (ខេមបូឌា), លោក កែវ វឌ្ឍនៈ នាយកចាត់ការទូទៅផ្នែកសេវាកម្ម និងលោក ថៃ សៃតូ នាយកគ្រប់គ្រងស្ថាប័ន Soriya ព្រមទាំងវត្ថមាន ថ្នាក់ដឹកនាំ លោកគ្រូៗ និងភ្ញៀវកិត្តិយសជាច្រើនរូបទៀត។

ក្នុងឱកាសនេះ លោក គង់ នួន ប្រធានក្រុមហ៊ុន តូយ៉ូតា (ខេមបូឌា) បានលើកឡើងថា ការលេងកីឡានាំមកនូវសុខភាព និងសាមគ្គីភាពនៅក្នុងក្រុម ក៏ដូចជាក្នុងសហគមន៍ ហើយជាពិសេសកីឡាបាល់ទាត់ក៏មានប្រជាប្រិយភាព និងការគាំទ្រនៅទូទាំងសកលលោកតែម្តង។ លោក គង់ នួន បន្តទៀតថា ក្រុមហ៊ុន តូយ៉ូតា (ខេមបូឌា) ពិតជាមានកិត្តិយស និងមោទកភាព ក្នុងការបន្តការរៀបចំការប្រកួតបាល់ទាត់កុមារ តូយ៉ូតា សម្រាប់ថ្ងៃអនាគតនេះឡើង។ ការប្រកួតនេះ ត្រូវបានធ្វើឡើងចំនួន៥ឆ្នាំជាប់ៗគ្នា ក្រោមកិច្ចសហការយ៉ាងស្អិតល្មួតជាមួយ Soriya។ នេះបើតាម លោកប្រធានក្រុមហ៊ុន តូយ៉ូតា (ខេមបូឌា)។

លោក គង់ នួន បន្តទៀតថា៖««ចាប់តាំងពីការបង្កើតប្រកួតនេះ រហូតមកដល់បច្ចុប្បន្ន យើងពិតជាទទួលបានការគាំទ្រយ៉ាងខ្លាំងគួរឲ្យកត់សម្គាល់ ពីសំណាក់បងប្អូនៗក្រោមអាយុ១២ឆ្នាំ ដែលស្រឡាញ់ និងចូលចិត្តវិស័យ កីឡាបាល់ទាត់»។

ការប្រកួតបាល់ទាត់កុមារ តូយ៉ូតា សម្រាប់ថ្ងៃអនាគត ត្រូវបានផ្តូចផ្ដើមបង្កើតឡើង ដើម្បីជំរុញលើកទឹកចិត្ត និងភាពក្លាហាន ដើម្បីឲ្យកុមារក្លាយខ្លួនទៅជាកីឡាករបាល់ទាត់ដ៏ឆ្នើមប្រចាំប្រទេសនាថ្ងៃអនាគត ខណៈមានរឿងរ៉ាវលំបាក និងឧបសគ្គជាច្រើន ដែលគ្រប់គ្នាបានជួបប្រទះ ហើយធ្លាប់គិតថាមិនអាចធ្វើបាន។ ក្រុមហ៊ុន តូយ៉ូតា សង្ឃឹមយ៉ាងមុតមាំថា ការប្រកួតបាល់ទាត់កុមារ តូយ៉ូតា សម្រាប់ថ្ងៃអនាគត នេះ គឺនឹងធ្វើឲ្យកុមារគ្រប់រូបមានឱកាសស្មើគ្នា ក្នុងការចូលរួមប្រកួត ដើម្បីឲ្យពួកគេ អាចសម្រេចជោគជ័យ និងគោលបំណងរបស់ខ្លួន ក្នុងវិស័យកីឡាបាល់ទាត់តាម រយៈពាក្យស្លោក «អ្នកអាចធ្វើបាន»។

កាន់តែពិសេស សម្រាប់ការប្រកួតបាល់ទាត់ កុមារតូយ៉ូតា សម្រាប់ថ្ងៃអនាគតក្នុងឆ្នាំ ២០១៩-២០២០ នេះ គឺយើងបានផ្ដល់ឱកាស ដល់ប្អូនៗកុមារី ក្នុងការចូលរួមប្រកួតកីឡាបាល់ទាត់ នេះផងដែរ ហើយក្រុមហ៊ុន តូយ៉ូតា ជឿជាក់ថា មិនថាកីឡាប្រភេទអ្វីនោះទេ គឺសុទ្ធតែត្រូវបានជំរុញ និងលើកទឹកចិត្ត ឲ្យចូលរួមដើម្បីសម្រេចក្ដីសុបិន និងដើម្បីលុបបំបាត់នូវពាក្យថា កុមារី មិនអាចលេងកីឡាបាល់ទាត់បាន។

ជាក់ស្ដែង នៅក្នុងការប្រកួតបាល់ទាត់កុមារ តូយ៉ូតា សម្រាប់ថ្ងៃអនាគតនាឆ្នាំនេះ គឺមានការចូលរួមប្រកួតពី២៤ក្រុមបាល់ទាត់ ដែលក្នុងនោះក្រុមបាល់ទាត់កុមារា មានចំនួន១៦ក្រុម និងក្រុមបាល់ទាត់កុមារី មានចំនួន៨ក្រុម មកពីសាលារដ្ឋចំនួន១៣ សាលាឯកជនចំនួន៨សាលា និងស្ថាប័នអង្គការចំនួន ៣សាលា។

ក្រុមហ៊ុនតូយ៉ូតា (ខេមបូឌា) និងស្ថាប័ន Soriya បានរៀបចំការប្រកួតបាល់ទាត់តាមសាលាទាំង២៤នេះ ចាប់តាំងពថ្ងៃទី១៦ ខែធ្នូ ឆ្នាំ២០១៩ រហូតដល់ថ្ងៃទី៨ ខែមករា ឆ្នាំ២០២០ មកម្ល៉េះ ហើយការប្រកួតវគ្គពាក់កណ្ដាលផ្ដាចព្រ័ត្រ ត្រូវបានរៀបចំឡើង នៅថ្ងៃទី១៨-១៩ ខែមករា ឆ្នាំ២០២០ នៅសាលាតារាងបាល់ទាត់សាលា American University of Phnom Penh។ ដោយឡែកសម្រាប់ការប្រកួត វគ្គផ្ដាច់ព្រ័ត្រ នឹងប្រព្រឹត្តទៅព្រឹកថ្ងៃអាទិត្យ ទី៩ ខែកុម្ភៈ ឆ្នាំ២០២០នេះ នៅឯពហុកីឡាដ្ឋានជាតិអូឡាំពិក។

លោក គង់ នួន បានសង្កត់ធ្ងន់ថា ការប្រកួតបាល់ទាត់កុមារតូយ៉ូតា សម្រាប់ថ្ងៃអនាគតនេះនឹងជួយប្អូនៗកុមារាកុមារីទាំងអស់ ឲ្យទទួលបាននូវបទពិសោធន៍ និងបច្ចេកទេសថ្មីៗ ពាក់ព័ន្ធនឹងកីឡាបាល់ទាត់ ក៏ដូចជាជួយអភិវឌ្ឍពួកគាត់ ឲ្យក្លាយជាធនធានកីឡាករបាល់ទាត់ ដ៏ឆ្នើម និងប្រកបដោយគុណភាព របស់ប្រទេសកម្ពុជានាថ្ងៃអនាគតផងដែរ។ លោកប្រធានក្រុមហ៊ុនតូយ៉ូតា (ខេមបូឌា) បានអំពាវនាវឲ្យមានការចូលរួមគាំទ្រ កីឡាករបាល់ទាត់កុមារាកុមារី ឲ្យបានច្រើនកុះករ នៅថ្ងៃប្រកួតផ្តាច់ព្រ័ត្រ ទី៩ ខែកុម្ភៈខាងមុខ ដើម្បីលើកទឹកចិត្តដល់កីឡាករ កីឡាការិនីបាល់ទាត់ ក៏ដូចជាលើកស្ទួយវិស័យបាល់ទាត់ នៅក្នុងប្រទេសកម្ពុជាផងដែរ៕