ភ្នំពេញ ថ្ងៃទី៧ ខែកុម្ភៈ ឆ្នាំ២០២០៖ កម្មវិធីអ្នកច្នៃប្រឌិតវ័យក្មេង SmartStart រដូវកាលទី៣ បានរកឃើញម្ចាស់ជ័យលាភីហើយ កាលពីថ្ងៃ៦ ខែកុម្ភៈ ឆ្នាំ២០២០ ដែលរៀបចំនៅ Impact Hub Phnom Penh។ នៅក្នុងវគ្គផ្ដាច់ព្រ័ត្រ គណៈកម្មការវិនិច្ឆ័យ បានជ្រើសរើសក្រុម STYLE ជាកម្មវិធីផ្ដល់ឲ្យអ្នកប្រើប្រាស់នូវឱកាសផ្សេងៗ ក្នុងការជួលអាវធំ រ៉ូប និងឈុតសំលៀកបំពាក់ប្រពៃណីសម្រាប់ពិធីពិសេសៗ ដោយទទួលស្គាល់ពីការងារ និងការខិតខំប្រឹងប្រែងដ៏អស្ចារ្យរបស់ពួកគេ រយៈពេលប្រាំមួយខែកន្លងមក។
ក្រុមជ័យលាភីនេះ នឹងទទួលបានរង្វាន់ដំណើរទស្សនកិច្ចបច្ចេកវិទ្យា ដែលទទួលបានប្រាក់ឧបត្ថម្ភទាំងស្រុង ដើម្បីធ្វើទស្សនកិច្ចនៅទីស្នាក់ការកណ្តាលក្រុមហ៊ុនបច្ចេកវិទ្យាធំៗដូចជា Facebook Google Microsoft និង LinkedIn នៅប្រទេសសិង្ហបុរី ។
កញ្ញា សូ សម្ផស្ស ពីក្រុម Style បានឲ្យដឹងថា៖«យើងមានក្ដីរំភើបយ៉ាងខ្លាំង ចំពោះដំណើរទស្សនកិច្ចបច្ចេកវិទ្យាទៅកាន់ប្រទេសសិង្ហបុរី។ យើងទន្ទឹងរង់ចាំនូវឱកាសសិក្សាថែមទៀត ពីក្រុមហ៊ុនបច្ចេកវិទ្យាពិភពលោកល្បីៗទាំងនោះ»។
កញ្ញា សម្ផស្ស បានបន្ថែមទៀតថា៖ «កម្មវិធីអ្នកច្នៃប្រឌិតវ័យក្មេង SmartStart គឺជាឱកាសដ៏ល្អសម្រាប់និស្សិតសាកលវិទ្យាល័យដូចជានាងខ្ញុំ ដើម្បីរៀនអំពីគោលការណ៍សំខាន់ៗ នៃគំនិតអាជីវកម្មបច្ចេកវិទ្យា។ យើងសូមថ្លែងអំណរគុណយ៉ាងជ្រាលជ្រៅ ចំពោះក្រុមហ៊ុន Smart និង Impact Hub Phnom Penh និងដៃគូទាំងអស់ ដែលបានបង្កើតកម្មវិធីនេះ និងផ្តល់ឱកាសដល់យើង។ រយៈពេល៩ ខែកន្លងមកនេះ គឺជាបទពិសោធន៍ដ៏អស្ចារ្យមួយ ខ្ញុំសូមណែនាំឱ្យនិស្សិតសាកលវិទ្យាល័យទាំងអស់ ដាក់ពាក្យសុំចូលរួមកម្មវិធី SmartStart នាពេលអនាគត»។
បន្ទាប់ពីការប្រកួតវគ្គផ្ដាច់ព្រ័ត្រនាខែមិថុនា ឆ្នាំ២០១៩មក ក្រុមឆ្នើមចំនួន៥ក្រុម ទទួលបានទឹកប្រាក់ចំនួន ៥,០០០ដុល្លារសហរដ្ឋអាមេរិក រួមជាមួយនិងឱកាសចូលរួមកម្មវិធីបណ្ដុះបណ្ដាលផ្នែកអាជីវកម្ម ដែលមានរយៈពេល៦ខែ ជាមួយ Impact Hub Phnom Penh ដើម្បីជំរុញគំនិតរបស់ពួកគេ និងពង្រីកអាជីវកម្មបច្ចេកវិទ្យាទើបបង្កើតថ្មី របស់ពួកគេបន្ថែមទៀត។
កញ្ញា ចាន់ ពេញល័ក្ខ អ្នកគ្រប់គ្រងផ្នែកសហគមន៍នៃក្រុមហ៊ុន Raintree Development ដែលជាគណៈកម្មការវិនិច្ឆ័យមួយរូប បានមានប្រសាសន៍ថា គណៈកម្មការវិនិច្ឆ័យ មានការលំបាកខ្លាំងណាស់ ក្នុងការជ្រើសរើសជ័យលាភី ដោយសារតែគំនិតអាជីវកម្មពីក្រុមទាំងអស់ សុទ្ធតែអស្ចារ្យ។ កញ្ញា ពេញល័ក្ខ បានមានប្រសាសន៍ថា៖«វាពិតគឺជាការលើកទឹកចិត្តយ៉ាងខ្លាំង ពេលដែលបានឃើញការយកចិត្តទុកដាក់ និងការខិតខំប្រឹងប្រែងយ៉ាងខ្លាំងរបស់ពួកគេ បានបង្ហាញនៅក្នុងបទបង្ហាញរបស់ពួកគេ។ ក្រុមនីមួយៗ បានធ្វើការឥតឈប់ឈរ ក្នុងរយៈពេលប្រាំមួយខែកន្លងមកនេះ ដើម្បីបង្ហាញពីការរីកចម្រើនរបស់ពួកគេ ដល់ពួកយើង។ នាងខ្ញុំសូមលើកលើកទឹកចិត្តឱ្យពួកគេបន្តធ្វើការលើគំនិតអាជីវកម្មទើបបង្កើតថ្មីរបស់ពួកគេនិងចាប់ផ្តើមអាជីវកម្មរបស់ពួកគេជាផ្លូវការ»។
ក្រុមចំនួន ៤ ផ្សេងទៀត ដែលបានចូលរួមក្នុងវគ្គផ្ដាច់ព្រាតរួមមាន៖
RENTECH ជាកម្មវិធីជួយអ្នកប្រើប្រាស់ជួលកន្លែងស្នាក់នៅ ជាពិសេសអ្នកដែលមកពីខេត្តនានា ដែលមកទីក្រុងចម្បងៗ សម្រាប់ការសិក្សាថ្នាក់ឧត្ដម។
Sers Chborng ជាកម្មវិធីផ្ដល់ការគាំទ្រដល់សិស្ស ដែលចង់ដាក់ពាក្យអាហារូបករណ៍ និង កម្មវិធីផ្លាស់ប្ដូរការសិក្សា និងការចូលរួមការប្រកួតប្រជែងផ្សេងៗ។
PhumCAKE ជាកម្មវិធីផ្ដល់ឲ្យអ្នកគ្រប់គ្នារចនារូបរាង រសជាតិ និងពណ៌នំខេកសម្រាប់ឱកាសពិសេសផ្សេងៗ។
SpeakOut ជាកម្មវិធីជួយអ្នកដែលកំពុងប្រឈមមុខនឹងជំងឺបាក់ទឹកចិត្ត តាមរយៈបណ្ដាញទំនាក់ទំនងអនាមិក ព័ត៌មានការយល់ដឹង និងភ្ជាប់ពួកគេជាមួយពេទ្យចិត្តសាស្ដ្រដ៏ជំនាញ។
នេះជាផ្នែកមួយនៃកិច្ចខិតខំប្រឹងប្រែងរបស់ក្រុមហ៊ុន Smart ដើម្បីលើកកម្ពស់សហគ្រិនភាព និងការច្នៃប្រឌិតបច្ចេកវិទ្យាក្នុងប្រទេសកម្ពុជា កម្មវិធីអ្នកច្នៃប្រឌិតវ័យក្មេង SmartStart មានគោលបំណងគាំទ្រដល់និស្សិតសាកលវិទ្យាល័យរបស់កម្ពុជា ក្នុងការចាប់ផ្តើមអាជីវកម្មបច្ចេកវិទ្យាផ្ទាល់ខ្លួន តាមរយៈការផ្ដល់ការណែនាំ និងការគាំទ្រផ្នែកហិរញ្ញវត្ថុ។ ចាប់តាំងពីឆ្នាំ ២០១៧មក កម្មវិធី SmartStart ទទួលបានការគាំទ្រយ៉ាងពេញទំហឹងពី ក្រសួងអប់រំ យុវជន និងកីឡា និងក្រសួងប្រៃសណីយ៍ និងទូរគមនាគមន៍ រួមទាំងការចូលរួមវិភាគទាន របស់ក្រុមហ៊ុន Smart ទៅក្នុងមូលនិធិនៃការកសាងសមត្ថភាព និងការស្រាវជ្រាវ និងការអភិវឌ្ឍ។
លោក Feiruz Ikhwan អគ្គនាយកហិរញ្ញវត្ថុនៃក្រុមហ៊ុន Smart Axiata បានមានប្រសាសន៍ថា៖ «នេះជាការលើកទឹកចិត្តយ៉ាងខ្លាំង ដែលមានយុវជនកម្ពុជាជាច្រើនឡើង ចូលរួមក្នុងដំណើរជាភាពសហគ្រិនបែបឌីជីថល។ ខ្ញុំសង្ឃឹមថា ជាមួយការប្ដេជ្ញាចិត្ដ និងបំណងប្រាថ្នារបស់ពួកគេ ក្នុងការកសាងអាជីវកម្មឌីជីថល និងចូលរួមចំណែកយ៉ាងច្រើន ដល់សេដ្ឋកិច្ចឌីជីថលនាពេលអានាគត របស់ប្រទេសកម្ពុជា ដែលក្រុមហ៊ុន Smart Axiata បានខិតខំជំរុញ អស់រយៈពេលជាច្រើនឆ្នាំ។ ខ្ញុំសូមអបអរសាទរដល់ក្រុមទាំងអស់ ដែលបានឈានមកដល់វគ្គផ្ដាច់ព្រ័ត្រនេះ ហើយខ្ញុំក៏សង្ឃឹមថា ពួកគេនឹងយកអ្វីដែលពួកគេបានរៀន ពីកម្មវិធី SmartStart ទៅប្រើប្រាស់ ដើម្បីអភិវឌ្ឍខ្លួនគេផ្ទាល់ ក៏ដូចជាការងារអាជីពផងដែរ»។
ពាក្យសុំសម្រាប់វគ្គបន្ទាប់ នៃកម្មវិធី SmartStart នឹងចាប់ផ្ដើមនៅខែមេសា ឆ្នាំ២០២០ខាងមុខនេះ។
(អត្ថបទពាណិជ្ជកម្ម)