អត្ថបទពាណិជ្ជកម្ម
សន្និបាតសហគ្រិនស្ត្រីឆ្នាំ២០២០របស់ SHE បានជោគជ័យដ៏ធំធេង ជាមួយវត្តមានសហគ្រិនស្ត្រីឆ្នើមប្រមាណ៣៥០នាក់
×![]()
ដោយ: ថ្មីៗ
ភ្នំពេញ៖ ទិវាសិទ្ធិនារីអន្តរជាតិឆ្នាំ២០២០នេះ គឺជាពេលវេលាដ៏ល្អមួយសម្រាប់ សហគ្រាសសង្គម ស៊ីអ៊ិនវេសមិន (SHE Investments) ប្រារព្ធនិងអបអរសាទរ មិនត្រឹមតែសមភាពយេនឌ័រ ប៉ុន្តែជាការប្រារព្ធខួប៥ឆ្នាំ និងអបអរសមិទ្ធផលវិជ្ជមាននានា របស់ពួកយើងក្នុងពេលជាមួយគ្នានេះ។ សន្និបាតសហគ្រិនស្ត្រីឆ្នាំនេះ រៀបចំក្រោមប្រធានបទ៖ «ការវិនិយោគជាមួយស្ត្រីត្រូវបានមើលឃើញជាឱកាសមិនមែនជំនួយសប្បុរសធម៌»។
កាលពីថ្ងៃទី០៦ ខែមីនា កន្លងទៅ សហគ្រាសសង្គម ស៊ីអ៊ិនវេសមិន បានរៀបចំសន្និបាតប្រចាំឆ្នាំរបស់ខ្លួន ដែលសន្និបាតនេះត្រូវបានរៀបចំតាំងពី ស៊ីអ៊ិនវេសមិន (SHE Investments) កកើតឡើងដំបូងនៅឆ្នាំ២០១៥មកម្លេះ។ ស៊ីអ៊ិនវេសមិន អះអាងថា៖ «ឥឡូវនេះ ៥ឆ្នាំក្រោយមក អ៊ិនវេសមិន ពិតជាមានសេចក្ដីសោមន្សរីករាយ ដែលសន្និបាតនេះ ទទួលបានការចូលរួមពីសហគ្រិនស្ត្រីកម្ពុជា និងអ្នកចូលរួមដទៃទៀតប្រមាណ ៣៥០នាក់ ដើម្បីអបអរសាទរ និងគាំទ្រដល់សហគ្រិនភាព និងភាពជាអ្នកដឹកនាំរបស់ស្ត្រីខ្មែរ ជាមួយនឹងប្រធានបទ៖ ការវិនិយោគជាមួយស្ត្រីត្រូវបានមើលឃើញជាឱកាសមិនមែនជំនួយសប្បុរសធម៌ ព្រមទាំងសមិទ្ធផលវិជ្ជមានផ្សេងៗទៀត ដែលពួកយើងបានបង្កើតឡើងជាមួយគ្នាក្នុងសហគមន៍»។
អ៊ិនវេសមិន ពិតជារំភើបយ៉ាងក្រៃលែង ដែលបានរៀបចំកម្មវិធី ប្រគល់ពានរង្វាន់សហគ្រិនស្ត្រីប្រចាំឆ្នាំ២០២០ ស្របពេលសន្និបាតឆ្នាំនេះផងដែរ ហើយក្នុងនោះមានសហគ្រិនស្ត្រីមកពី៦អាជីវកម្មផ្សេងៗគ្នាទទួលបានពានរង្វាន់ទាំង៦ប្រភេទ រួមមាន ពានរង្វាន់អាជីវកម្មទើបចាប់ផ្ដើម បានទៅលើ លោកស្រី តាន់ ស្រីពៅ ស្ថាបនិក អាហ្គាប៉េ កាហ្វេ, ពានរង្វាន់អាជីវកម្មសុចរិតភាព បានទៅលើ លោកស្រី ម៉ៅ គន្ធា សហស្ថាបនិក តស៊ូ, ពានរង្វាន់អាជីវកម្មបៃតង បានទៅលើ កញ្ញា វត្ថា វិច្ឆិកា ស្ថាបនិក ដៃខ្មែរ, ពានរង្វាន់អាជីវកម្មរីកចំរើនលឿនបំផុត បានទៅលើ លោកស្រី ហាំ សុឡារ៉ូ ស្ថាបនិក ដៃម៉ែបោកអ៊ុតទំនើប, ពានរង្វាន់អាជីវកម្មផ្ដល់ផលវិជ្ជមានដល់សង្គម បានទៅលើ លោកស្រី ណោម ប៊ុនណាក់ ស្ថាបនិក ភូមិសិប្បកម្ម និងពានរង្វាន់អាជីវកម្មបច្ចេកវិទ្យា បានទៅលើ លោកស្រី ខៀវ ធីតា ស្ថាបនិក សូឡាហ្គ្រីនអ៊ិននើជីកម្ពុជា។
សហគ្រាសសង្គម ស៊ីអ៊ិនវេសមិន សូមថ្លែងអំណរគុណដល់ គម្រោងទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ USAID តាមរយៈគម្រោង WE Act និង ធនាគារ ប្រ៊េដប៊ែង កម្ពុជា (Bred Bank Cambodia) ព្រមទាំងធនាគារ ភីភីស៊ីប៊ែង (PPCBank) ដែលបានជួយគាំទ្រដល់សន្និបាតឆ្នាំនេះ អោយប្រព្រឹត្តទៅបានយ៉ាងរលូន និងបញ្ចប់ទៅដោយស្នាមញញឹមគ្រប់គ្នា៕
© រក្សាសិទ្ធិដោយ thmeythmey.com
