COVID-19
អន្តរជាតិ
ប្រមុខWHO ៖ COVID-19 ជាសត្រូវប្រឆាំងមនុស្សជាតិ
×
ដោយ៖ គយ រតនបុរិន្ទ
អគ្គនាយកអង្គការសុខភាពពិភពលោក (WHO) លោក Tedros Adhanom Ghebreyesus នៅថ្ងៃទី ១៨ ខែមីនា បានហៅជំងឺឆ្លង COVID-19 ជា «សត្រូវប្រឆាំងមនុស្សជាតិ»។ លោកនិយាយបែបនេះ ខណៈអ្នកឆ្លងជំងឺថ្មីនេះមានចំនួនដល់ ២សែននាក់នៅជុំវិញពិភពលោក ពិសេសនៅតំបន់អឺរ៉ុប និងអាស៊ីប៉ែកអាគ្នេយ៍ដែលមានករណីឆ្លងប្រចាំថ្ងៃកើនឡើង។
នៅក្នុងសន្និសីទសារព័ត៍មាន លោក Tedros Adhanom Ghebreyesus បានលើកឡើងថា វីរ៉ុសកូរ៉ូណាបានបង្ហាញពីការគម្រាមកំហែងដែលមិនធ្លាប់មានពីមុន។ ត្រង់ចំណុចនេះ លោក Tedros បានបន្ថែមថា៖ «ប្រទេសទាំងអស់ត្រូវរូបរួមគ្នា ប្រយុទ្ធនឹងសត្រូវរួម៖ សត្រូវប្រឆាំងមនុស្សជាតិ»។
ចាប់តាំងតែពីការផ្ទុះឡើងនៃជម្ងឺនេះក្នុងខែធ្នូ ២០១៩នៅប្រទេសចិន COVID-19 បានប្រល័យជិវិតមនុស្សលើសពី ៨ពាន់នាក់ ខណៈការស្លាប់នៅអឺរ៉ុបកំពុងបន្តកើនឡើង។ អ៊ីតាលីជាប្រទេសរងគ្រោះធ្ងន់ធ្ងរជាងគេនៅអឺរ៉ុប ដោយករណីស្លាប់កើនដល់មាន ២,៥០៥ ករណី និងមានករណីឆ្លងចំនួន ៣១,៥០៦ ករណី។ នៅអ៊ីរ៉ង់វិញមានករណីស្លាប់ចំនួន ៩៨៨ ករណី និងឆ្លងចំនួន ១៦,១៦៩ករណី។ រដ្ឋអាស៊ីអាគ្នេយ៍ដូចជា ម៉ាឡេស៊ី សិង្ហបុរី និងថៃជាដើម សុទ្ធតែមានករណីឆ្លងច្រើន។
រីឯនៅបណ្តាប្រទេសអាហ្វ្រិកវិញ ដ្បិតមានករណីឆ្លងមិនសូវច្រើនក្ដី ប៉ុន្តែប្រទេសនៅទ្វីបមួយនេះក៏មានការឆ្លងច្រើនដែរ។ ករណីឆ្លងនៅទ្វីបនេះមានប្រមាណ ២៣៣ករណី និង៤ករណីស្លាប់ប៉ុណ្ណោះគិតត្រឹមថ្ងៃទី១៨ ខែមីនា។ ប៉ុន្តែ WHO ក៏បានរំលឹកផងផងដែរថាស្ថានការណ៍អាចនឹងប្រែប្រួលយ៉ាងឆាប់រហ័ស។
ទាក់ទងវិធានការវិញ លោកអគ្គនាយកអង្គការ WHO បានសង្កត់ធ្ងន់ថា ដើម្បីគ្រប់គ្រងការរីកសាយនៃ COVID-19 នេះបានប្រទេសទាំងអស់ត្រូវ «នៅឲ្យដាច់ពីគេ ធ្វើតេស្ត ព្យាបាល និងរកតម្រុយ» នៃការឆ្លងរបស់ជំងឺ។ លោក Tedros បានសសើរពីការចាប់ផ្តើមពិសោធរបស់វា និងបាននិយាយថា ជាសមិទ្ធផលដែលមិនគួរឲ្យជឿ។ ចំពោះការព្យាបាលវិញ WHO បានដាក់ចេញនូវកម្មវិធី «ពិសោធន៍រួម» ដោយទទួលយក វិធីសាស្ត្រព្យាបាលចំនួន៥ ពីប្រទេសចំនួន ១០ និងពិនិត្យមើលវិធីសាស្ត្រណាមួយដែលមានប្រសិទ្ធភាពជាងគេ។
ចំពោះការឆ្លងវិញ ប្រមុខWHOក៏បានព្រមានផងដែរថា គេមិនគួរមើលស្រាលជំងឺ ដោយគិតថាវាមិនឆ្លងមកមនុស្សវ័យជំទង់ និងកុមារដូចមនុស្សចាស់ឡើយ។ នេះក៏ព្រោះតែមនុស្សវ័យជំទង់ និងកុមារជាច្រើននាក់បានឆ្លងរួចមក ហើយមិនមានអការៈធ្ងន់ធ្ងរផងដែរ បើទោះបីជាមិនមានរោគសញ្ញាក៏ដោយ។
© រក្សាសិទ្ធិដោយ thmeythmey.com