COVID-19
អន្តរជាតិ
រដ្ឋមន្ត្រីសុខាភិបាលប្រេស៊ីលLuiz Henrique Mandetta-AFP
×![]()
នៅថ្ងៃទី៧ ខែមេសា ឯកអគ្គរដ្ឋទូតអាមេរិកប្រចាំប្រទេសប្រេស៊ីល បានច្រានចោលរបាយការណ៍ដែលថារដ្ឋាភិបាលអាមេរិក ដណ្តើមបរិក្ខាពេទ្យផលិតដោយចិន ហើយដែលបញ្ជាទិញដោយប្រេស៊ីល។ នេះយោងតាមទីភ្នាក់ងារព័ត៌មាន Reuters ។
សារព័ត៌មានក្នុងស្រុកប្រេស៊ីលមួយ បានចុះផ្សាយថា បរិក្ខារពេទ្យ ដែលដឹកតាមនាវាសំដៅមករដ្ឋ Bahia របស់ប្រេស៊ីល ត្រូវបានបង្វែរទៅកាន់សហរដ្ឋអាមេរិកវិញ បន្ទាប់ពីចូលចតនៅទីក្រុងMiami ក្រោយពេលអ្នកផ្គត់ផ្គង់សម្ភារ ត្រូវបានគេឲ្យតម្លៃខ្ពស់ជាង។ កាលពីសប្តាហ៍មុនលោក Luiz Henrique Mandetta រដ្ឋមន្ត្រីសុខាភិបាលប្រេស៊ីល ក៏អះអាងថា ចិនបានទាត់ចោលការបញ្ជាទិញឧបករណ៍បរិក្ខារពេទ្យរបស់ប្រេស៊ីលមួយចំនួន បន្ទាប់ពីអាមេរិកបញ្ជូនយន្តហោះដឹកទំនិញ២៣គ្រឿង សំដៅទៅចិនដើម្បីទិញឧបករណ៍បរិក្ខារពេទ្យទាំងនោះ។
រដ្ឋមន្ត្រីសុខាភិបាលរូបនេះ បញ្ជាក់ទៀតថា បណ្តារដ្ឋនៅប្រេស៊ីលមានឧបករណ៍ស្តុកទុកគ្រប់គ្រាន់ហើយ ប៉ុន្តែប្រេស៊ីលត្រូវស្វែងរកប្រទេសជាច្រើន ដើម្បីទិញឧបករណ៍បរិក្ខារពេទ្យបំពេញស្តុក មុននឹងស្វែងរកប្រទេសចិន ដែលខ្លួនត្រូវចំណាយ ២២៨លានដុល្លារ។
ក្នុងសន្និសីទសារព័ត៌មានមួយ លោក Todd Chapman ឯកអគ្គរដ្ឋទូតអាមេរិក បានទាត់ ចោលការរាយការណ៍ខាងលើ។ លោកនិយាយថា៖ « រដ្ឋាភិបាលអាមេរិក មិនបានទិញ ឬ រាំងខ្ទប់សម្ភារ បរិក្ខារដែលសំដៅមកប្រេស៊ីលឡើយ។ អ្វីដែលបានលើកឡើងជារបាយការណ៍ ក្លែងក្លាយ។ យើងបានបើកការស៊ើបអង្កេតរួចហើយ»។
លោក Chapman បន្ថែមថា អ្នកផ្គត់ផ្គង់នៅទូទាំងពិភពលោក កំពុងតែឆ្លៀតឱកាសយក ចំណេញពីតម្រូវការយ៉ាងគំហុក នូវឧបករណ៍បរិក្ខារពេទ្យដូចជា សម្ភារការពារខ្លួន ស្រោមដៃ និងម៉ាស់ជាដើម។
រដ្ឋមន្ត្រីក្រសួងអប់រំប្រេស៊ីលវិញ បានចោទអ្នកផ្គត់ផ្គង់ឧបករណ៍បរិក្ខារពេទ្យចិនថា កំពុងកើបផលចំណេញ ពីជំងឺរាតត្បាតសកលនេះ។ លោកបន្ថែមថា លោកនឹងសុំទោសដរាបណា ចិនសន្យាលក់ឧបករណ៍ជំនួយផ្លូវដង្ហើម១,០០០ គ្រឿងមកឲ្យប្រេស៊ីល។
គិតមកដល់ពេលនេះ ប្រេស៊ីលមានអ្នកឆ្លងចំនួន ១២,០៥៦នាក់ និងករណីស្លាប់ ៥៥៣នាក់ ចំនួនដែលកើនឡើងទ្វេដង ក្នុងរយៈពេល៦ថ្ងៃ។
គួរបញ្ជាក់ផងដែរថា នេះមិនមែនជាលើកទី១ទេ ដែលអាមេរិករងការចោទប្រកាន់បែបនេះ កាលពីសប្តាហ៍កន្លងទៅ ក៏មានផងដែរ ការចោទប្រកាន់ថា អាមេរិកស្ទាក់ និងដណ្តើមទិញ ម៉ាស់ពីបារាំង និងអាល្លឺម៉ង់។ ខណៈកាលពីថ្ងៃទី៧ ខែមេសា អភិបាលខេត្ត Ontario របស់កាណាដា បាននិយាយថាអាមេរិករាំងខ្ទប់ ការដឹកជញ្ជូនម៉ាស់ ៣លានសន្លឹក៕
© រក្សាសិទ្ធិដោយ thmeythmey.com
