តាមការប៉ាន់ស្មាន តម្លៃកីឡាករក្នុងក្រុមនៅ Premier League បានធ្លាក់ចុះរហូតដល់ចំនួន ១,៦ ពាន់លានផោន (១,៩៩ពាន់លានដុល្លារអាមេរិក) ដោយសារតែវិបត្ដិនៃជំងឺ COVID-19។ នេះបើយោងតាមទិន្នន័យពីគេហទំព័រស្ថិតិកីឡាបាល់ទាត់ Transfermarkt។
Transfermarkt គណនាតម្លៃរបស់កីឡាករដោយប្រើទិន្នន័យផ្សេងៗគ្នា និងការប៉ាន់ស្មានសរុបរបស់អ្នកប្រើប្រាស់លើគេហទំព័រ។ ក្នុងនោះការព្យាករពីការធ្លាក់ចុះ នៃតម្លៃរបស់ក្រុម Manchester City គឺទទួលរងការធ្លាក់ចុះច្រើនជាងគេប្រមាណ ២២៥ លានផោន (២៧៩លានដុល្លារអាមេរិក) ខណៈ Liverpool នៅលេខរៀងទីពីរខែលខាត ២៥៤លានដុល្លារ។
លោក Matthias Seidel ស្ថាបនិក Transfermarkt លើកឡើងថាតម្លៃទីផ្សារភាគហ៊ុនបានធ្លាក់ចុះជាលំដាប់។ ក្លិបជាច្រើនអាចត្រូវគំរាមកំហែងដោយការក្ស័យធនហើយផែនការផ្ទេរកីឡាករបានក្លាយជាឧបសគ្គដោយសារតែភាពមិនប្រាកដប្រជាជាច្រើន។
Transfermarkt បានពិនិត្យមើលលើស្ថិតិជាច្រើន រាប់បញ្ចូលទាំងអាយុរបស់កីឡាករ រយៈពេលនៃកិច្ចសន្យាបច្ចុប្បន្ន និងថ្លៃផ្ទេរពីមុនដែលត្រូវបានបង់។ ស្ថិតិទាំងនោះត្រូវបានពិភាក្សាលម្អិតជាមួយបណ្តាសហគមន៍តាមតំបន់មុនពេលប៉ាន់ស្មានពីតម្លៃ។
ដោយសារតែវិបត្តិជំងឺ COVID-19 ទើបធ្វើឲ្យក្លិបនៅអឺរ៉ុបត្រូវផ្អាកការប្រកួត ដែលនេះនឹងធ្វើឲ្យធ្លាក់ចុះចំណូលដ៏ច្រើន។ ផែនការនៃការផ្ទេរកីឡាកររបស់ក្រុមជាច្រើនត្រូវបានរក្សាទុក ដែលគេជឿជាក់ថានឹងមានការធ្លាក់ចុះលើតម្លៃផ្ទេរ។
ទិន្នន័យខាងលើ ក៏វាយតម្លៃកីឡាករដែលកើតមុនឆ្នាំ ១៩៩៨ ត្រូវខាតថ្លៃខ្លួន ២០ ភាគរយ ហើយអ្នកដែលកើតក្រោយឆ្នាំ ១៩៩៨ ឃើញថាតម្លៃរបស់ពួកគេត្រូវកាត់បន្ថយ ១០ ភាគរយ។ នេះក៏ព្រោះតែតម្លៃរបស់កីឡាករដែលមានអាយុ ២២ឆ្នាំ ឬក្មេងជាងនេះមានភាពរ៉ឹងមាំជាងកីឡាករវ័យចំណាស់ ដូច្នេះក្រុមដែលមានកីឡាករសំខាន់ៗជាច្រើនដែលមានអាយុលើសពី ២២ឆ្នាំ ទំនងជាទទួលរងការធ្លាក់ចុះខ្លាំងជាងគេ។
ក្រុមនៅលីគកំពូលអង់គ្លេសចំនួន១០ ដែលប្រឈមធ្លាក់ថ្លៃច្រើនជាងគេអំឡុងវិបត្តិ COVID-19 មាន Manchester City, Liverpool, Tottenham Hotspur, Chelsea, Manchester United, Arsenal, Everton, Leicester City, Wolves និង West Ham United៕