COVID-19
កីឡាអន្តរជាតិ
អន្តរជាតិ
Sir Alex អតីតគ្រូ Man Utd សរសើរគ្រូពេទ្យអង់គ្លេសដែលប្រថុយជីវិតប្រឆាំង COVID-19
× Manchester United បានបរិច្ចាគគ្រឿងបរិក្ខារពេទ្យ អាហារ និងអំណោយដល់មណ្ឌលសុខភាពក្នុងតំបន់ ខណៈ Sir Alex Ferguson កោតសរសើរពីកិច្ចខិតខំប្រឹងប្រែងរបស់សេវាសុខាភិបាលជាតិអង់គ្លេស (NHS) ចំពោះការប្រយុទ្ធប្រឆាំងជំងឺឆ្លង COVID-19 ទាំងប្រថុយជីវិត។
ក្លិបរហស្សនាមបិសាចក្រហមក៏នឹងទទួលសំណើបន្ថែមទៀតពី NHS ប្រសិនបើត្រូវការប្រើប្រាស់ទីតាំងកីឡដ្ឋាន Old Trafford របស់ពួកគេដែលបានដាក់ក្នុងបញ្ជីបម្រុងជាមជ្ឈមណ្ឌលផ្តល់ឈាមបណ្តោះអាសន្នរួចហើយនោះ។
យានយន្តចំនួន១៦គ្រឿងដែលជាកម្មសិទ្ធិរបស់ក្លិបក៏អនុញ្ញាតឲ្យសុខាភិបាលប្រើប្រាស់ផងដែរ ហើយអាហារនិងភេសជ្ជៈចំនួន ៣០០០០សម្រាប់ ដែលត្រូវបានរក្សាទុកនៅកីឡដ្ឋានត្រូវបានបញ្ជូនទៅធនាគារស្បៀងអាហារ មន្ទីរពេទ្យ និងសប្បុរសជននានា។
លោក Alex Ferguson អតីតអ្នកចាត់ការទូទៅ Man Utd ដែលធ្លាប់ទទួលការវះកាត់ជាបន្ទាន់បន្ទាប់ពីមានជំងឺសរសៃប្រសាទខួរក្បាលកាលពី ២ ឆ្នាំមុនបានសម្តែងការពេញចិត្តចំពោះសេវាកម្មសុខភាពរបស់អង់គ្លេសនេះ។
លោក Ferguson ដែលសព្វថ្ងៃមានវ័យ ៧៨ឆ្នាំ បានសរសេរលើគេហទំព័រផ្លូវការរបស់បិសាចក្រហមថា៖ «ខ្ញុំពិតជារីករាយដែលឥឡូវនេះយើងបានទទួលស្គាល់ពីសារៈសំខាន់នៃ NHS របស់យើង។ ដូចដែលខ្ញុំធ្លាប់មានបទពិសោធកាលពី ២ ឆ្នាំមុនបន្ទាប់ពីពួកគេបានជួយសង្គ្រោះជីវិតខ្ញុំ។ ការប្រឆាំងនឹងរោគរាតត្បាតដ៏សាហាវនេះពិតជាអស្ចារ្យ និងបានធ្វើឲ្យខ្ញុំមានមោទកភាពចំពោះរបៀបដែលក្លិប និងប្រជាជនអង់គ្លេសបានប្រមូលផ្តុំគ្នាដើម្បីជួយដល់សុខភិបាលអង់គ្លេស»។
តាមពិតទៅ គំនិតផ្តួចផ្តើមក្នុងការបរិច្ចាគនេះដំបូងកើតឡើងពីលោក Ole Gunnar Solskjaer អ្នកចាត់ការទូទៅ Man Utd បច្ចុប្បន្ន។
អ្នកចាត់ការសញ្ជាតិន័រវែសលើកសរសើរពីបុគ្គលិករបស់ NHS និងអ្នកស្ម័គ្រចិត្តប្រយុទ្ធប្រឆាំងនឹង COVID-19 ថាពួកគេប្រឈមនឹងគ្រោះថ្នាក់ដើម្បីរក្សាសុវត្ថិភាពរបស់អ្នករាល់គ្នា និងធ្វើការងារដ៏អស្ចារ្យ។ ពួកគេសមនឹងទទួលបានការដឹងគុណ និងការសរសើរពីអ្នករាល់គ្នាចំពោះការងារនិងការខិតខំរបស់ពួកគេជារៀងរាល់ថ្ងៃនេះ។
មកទល់ពេលនេះ មានអ្នកឆ្លងជំងឺ COVID-19 ជាង៦៥ពាន់នាក់នៅចក្រភពអង់គ្លេស ក្នុងនោះស្លាប់ជិត៨០០០នាក់ និងសះស្បើយពីជំងឺលើស១៣០នាក់៕
Tag:
Manchester United
Sir Alex Ferguson
COVID-19
© រក្សាសិទ្ធិដោយ thmeythmey.com