COVID-19
អន្តរជាតិ
រូបភាព៖ Reuters
×![]()
ដោយ: ធៀន ភារិន្ទ
យេម៉ែន នាថ្ងៃទី១០ ខែមេសា បានរកឃើញអ្នកផ្ទុកជំងឺរលាកសួត ដែលបង្កដោយកូរ៉ូណាវីរុស (COVID-19) ជាលើកដំបូងនៅក្នុងប្រទេស។ ការរកឃើញនេះ បានបង្កឲ្យមានការព្រួយបារម្ភជាខ្លាំង ដោយសារតែសង្គ្រាមហែកហួរនៅក្នុងប្រទេសមួយនេះ បានបំផ្លាញប្រព័ន្ធសុខាភិបាល បញ្ហាអត់ឃ្លាន និងជំងឺរាំរ៉ៃផ្សេងទៀតជាច្រើន។ 
តាមរយៈគណនី Twitter របស់គណកម្មាធិការប្រកាសអាសន្នជាន់ខ្ពស់របស់យេមែន អ្នកជំងឺ COVID-19 គឺរស់នៅតំបន់ Hadhramout ដែលជាកន្លែងផលិតប្រេងដ៏សំខាន់មួយរបស់យេម៉ែន។ ស្ថានភាពសុខភាពរបសអ្នកជំងឺមានភាពល្អប្រសើរ និងបានទទួលការព្យាបាលយ៉ាងយកចិត្តទុកដាក់។
បើតាមអាជ្ញាធរថ្នាក់មូលដ្ឋានបានប្រាប់សារព័ត៌មាន Reuters អ្នកជំងឺ គឺធ្វើការនៅក្នុងកំពង់ផែ Ash Shihr ក្នុងតំបន់ Hadhramout ។
ការរកឃើញករណីដំបូងនេះ គឺធ្វើឡើងបន្ទាប់ពីក្រុមសម្ធន្ពមិត្ត ដែលដឹកនាំដោយអារ៉ាប៊ីសាអូឌីត បានប្រកាសផ្អាកការប្រយុទ្ធគ្នាជាមួយចលនាហ៊ូធី នាថ្ងៃទី៩ ខែមេសា ក្នុងរយៈពេលពីរសប្តាហ៍ ប៉ុន្តែចលនាហ៊ូធី មិនទាន់បានបញ្ជាក់ពីការយល់ព្រមនៅឡើយទេ។
សូមបញ្ជាក់ថា យេម៉ែន គឺជាប្រទេសមួយ ដែលរងគ្រោះដោយសារសង្គ្រាមរ៉ាំរ៉ៃចាប់តាំងពីចុងឆ្នាំ២០១៤មកម្ល៉េះ ពោលគឺចាប់តាំងពីចលនាហ៊ូធី ធ្វើបដិវត្តផ្តួលរលំរដ្ឋាភិបាលទីក្រុងសាណា។ ជាសង្គ្រាមដែលអូសបន្លាយជាច្រើនឆ្នាំ វាបានបង្កឲ្យមានផលវិបាកជាច្រើនដូចជា មនុស្សជាច្រើនរស់នៅក្នុងភាពអត់ឃ្លាន ប្រព័ន្ធសុខាភិបាលចុះខ្សោយ ជំងឺរ៉ាំរ៉ៃ និងប្រជាជនរស់នៅក្នុងភាពក្រីក្រជាដើម៕
Tag:
យេម៉េន
COVID-19
© រក្សាសិទ្ធិដោយ thmeythmey.com
