COVID-19
អន្តរជាតិ
លោក Bill Gates ធ្លាប់ព្យាករពីរជំងឺរាតត្បាតសាកល កាលពីឆ្នាំ២០១៥
× ខណៈ COVID-19 បានរីកសាយភាយនៅទូទាំងសាកលលោក បច្ចុប្បន្នមនុស្សជិត២លាននាក់ហើយបានឆ្លងវីរុសនេះ ខណៈអ្នកស្លាប់មានដល់ជាង១០ម៉ឺននាក់។ មនុស្សទាំងពិភពលោក រួមទាំងអ្នកនយោបាយផងនោះ ភ្ញាក់ផ្អើលត្រង់ថាជំងឺនេះបានបិទសេដ្ឋកិច្ចពិភពលោក និងប៉ះពាល់ធ្ងន់ធ្ងរដល់ជីវភាពប្រជាជនប្រចាំថ្ងៃ។
មហាសេដ្ឋីបច្ចេកវិទ្យា លោក Bill Gates បានព្រមានពីជំងឺរាតត្បាតកាលពី៥ឆ្នាំមុនមកម្ល៉េះ។ ក្នុង TED Talk កាលពីឆ្នាំ២០១៥ មហាសេដ្ឋីអាមេរិក និងសហស្ថាបនិក Microsoft រូបនេះ បានលើកយកមេរៀនពីវិបត្តិវីរុស Ebola ឆ្នាំ២០១៤នៅអាហ្វ្រិកខាងលិច ដោយអះអាងថា សហរដ្ឋអាមេរិក និងបណ្ដាប្រទេសដទៃ ពុំត្រៀមលក្ខណៈគ្រប់គ្រាន់ឡើយសម្រាប់ជំងឺរាតត្បាតសាកល ដែលនឹងកើតឡើងនាពេលខាងមុខ។
«ប្រសិនបើមានអ្វីអាចសម្លាប់មនុស្ស១០លាននាក់ក្នុងប៉ុន្មានទសវត្សរ៍ខាងមុខនោះ វាមានលទ្ធភាពខ្ពស់ដែលទំនងជាវីរុសឆ្លង ច្រើនជាងសង្គ្រាម»។ លោក Gates លើកឡើងបែបនេះ ដោយបន្ថែម វាពុំមែនជាមីស៊ីលឡើយ ប៉ុន្តែជាមេរោគ។
លោក Gates កត់សម្គាល់ថា ប្រទេសជាច្រើន បានធ្វើការរាប់ឆ្នាំលើការកាត់បន្ថយហានិភ័យសង្គ្រាមនុយក្លេអ៊ែរ ហើយពួកគេគួរផ្ដល់សារសំខាន់ដូចគ្នានេះសម្រាប់ការប្រយុទ្ធប្រឆាំងនឹងវីរុសកាចសាហាវ។ ទាក់ទិនរឿងនេះ លោកមហាសេដ្ឋី សង្កត់ធ្ងន់ថា៖ «ជាក់ស្តែងយើងវិនិយោគទុនតិចតួចបំផុតលើប្រព័ន្ធដែលបញ្ឈប់ជំងឺរាតត្បាត។ បច្ចុប្បន្នយើងពុំទាន់ត្រៀមរួចរាល់សម្រាប់ជំងឺរាតត្បាតបន្ទាប់ទៀតឡើយ។»
បរាជ័យក្នុងការត្រៀមលក្ខណៈ អាចអនុញ្ញាតឲ្យជំងឺរាតត្បាតបន្ទាប់នោះមានភាពបំផ្លិចបំផ្លាញខ្លាំងជាង Ebola ទៅទៀត។ លោក Gates បញ្ជាក់បែបនេះ ដោយបន្ថែមថា ឧទាហរណ៍ វីរុសដែលដូចនឹងជំងឺផ្ដាសាយអេស្ប៉ាញឆ្នាំ១៩១៨ នឹងផ្ទុះរាលដាលនៅពាសពេញពិភពលោកយ៉ាងលឿន លឿនរហ័សបំផុត។ លោកសង្កត់ធ្ងន់ដូច្នេះថា៖«ហើយអ្នកអាចឃើញមនុស្ស៣០លាននាក់ស្លាប់ដោយសារជំងឺរាតត្បាតនេះ។ ដូច្នេះវាគឺជាបញ្ហាដ៏ធ្ងន់ធ្ងរបំផុតមួយ ដែលយើងត្រូវព្រួយបារម្ភ»៕
<iframe width="948" height="533" src="https://www.youtube.com/embed/6Af6b_wyiwI" frameborder="0" allow="accelerometer; autoplay; encrypted-media; gyroscope; picture-in-picture" allowfullscreen></iframe>
© រក្សាសិទ្ធិដោយ thmeythmey.com