COVID-19
អន្តរជាតិ
លោក ម៉ាក្រុង សង្ឃឹមរុស្ស៊ីគាំទ្រសំណើបទឈប់បាញ់UNដើម្បីផ្ដោតលើCOVID-19
× ប្រធានាធិបតីបារាំង លោកអេម៉ានុយអែល ម៉ាក្រុង បញ្ជាក់ថា លោកទទួលបានការគាំទ្រពីសមាជិកអចិន្ត្រៃយ៍ចំនួន៣ របស់ក្រុមប្រឹក្សាសន្តិសុខអង្គការសហប្រជាជាតិ (UNSC) ដើម្បីគាំទ្រសេចក្តីអំពាវនាវបទឈប់បាញ់សាកលរបស់អង្គការសហប្រជាជាតិ ក្នុងគោលដៅផ្តោតអារម្មណ៍លើការប្រយុទ្ធប្រឆាំងជំងឺរាតត្បាតសាកល COVID-19។
កាលពីថ្ងៃទី២៣ ខែមីនា លោកអង់តូនីញ៉ូ ហ្គូតែរ៉េស អគ្គលេខាធិការអង្គការសហប្រជាជាតិបានអំពាវនាវឲ្យមានបទឈប់បាញ់នៅជុំវិញពិភពលោក ដោយព្រមានថាក្នុងប្រទេសដែលកំពុងផុងខ្លួនក្នុងសង្គ្រាម បុគ្គលិកពេទ្យដែលមានចំនួនតិចទៅហើយ ក្លាយជាគោលដៅនៃការវាយប្រហារជារឿយៗ ខណៈប្រព័ន្ធសុខាភិបាលបានដួលរលំបាត់ទៅហើយ។
ទាក់ទិនការលើកឡើងរបស់ប្រមុខUN នេះ លោកប្រធានាធិបតី ម៉ាក្រុង និយាយថា ប្រធានាធិបតីចិន លោក ស៊ី ជិនភីង ប្រធានាធិបតីអាមេរិក លោក ដូណាល់ ត្រាំ និងនាយករដ្ឋមន្ត្រីអង់គ្លេស លោកបូរីស ចនសុន បានបញ្ជាក់ថានឹងគាំទ្រសំណើខាងលើ។
តាមទីភ្នាក់ងារព័ត៌មានReuters លោក ម៉ាក្រុង សង្ឃឹមថាក៏នឹងទទួលបានការគាំទ្រពីប្រធានាធិបតីរុស្ស៊ី លោកពូទីន នាពេលឆាប់ៗខាងមុខផងដែរ។ ត្រងចំណុចនេះលោក អះអាងដូច្នេះថា៖«ខ្ញុំបាននិយាយជាមួយគាត់តាំងតែពីមានគំនិតផ្តួចផ្តើមនេះដំបូង។ ខ្ញុំមិនទាន់និយាយជាមួយគាត់ម្តងទៀត តាំងតែពីខ្ញុំទទួលបានការបញ្ជាក់គាំទ្រពីមេដឹកនាំដទៃ។ ខ្ញុំនឹងនិយាយជាមួយគាត់ នៅប៉ុន្មានម៉ោងខាងមុខ»។
«ខ្ញុំគិតថា លោកប្រធានាធិបតីពូទីន នឹងយល់ព្រម ហើយនៅថ្ងៃដែលគាត់យល់ព្រម យើងនឹងអាចជួបនិយាយតាម videoconference និងផ្សាយការសន្ទនានេះជាឧឡារិក ដោយថាមភាព និងប្រសិទ្ធពល»។ នេះការបញ្ជាក់បន្ថែមរបស់លោកប្រធានាធិបតីបារាំង។
សូមបញ្ជាក់ថា ក្រុមប្រឹក្សាសន្តិសុខអង្គការសហប្រជាជាតិដែលមានសមាជិកចំនួន១៥ បានជួបប្រជុំគ្នាលើកដំបូងនៅថ្ងៃទី៩ ខែដើម្បីពិភាក្សាពីជំងឺរាតត្បាតសកលនេះ ប៉ុន្តែមិនទាន់អាចសម្រេចថាខ្លួនត្រូវចេញសកម្មភាពដែរឫទេ។ សមាជិកដែលមានសិទ្ធវេតូ រួមមានបារាំង សហរដ្ឋអាមេរិក ចិន រុស្ស៊ី និងអង់គ្លេស កំពុងពិភាក្សាលើអត្ថបទសេចក្តីសម្រេចចិត្តព្រាង ដែលស្នើដោយបារាំង៕
© រក្សាសិទ្ធិដោយ thmeythmey.com