«គម្លាតសុវត្ថិភាព» អំឡុងពេល COVID-19 ធ្វើឲ្យអ្នកប្រដាល់ថៃធុញទ្រាន់

COVID-19

កីឡាអន្តរជាតិ

អន្តរជាតិ

«គម្លាតសុវត្ថិភាព» អំឡុងពេល COVID-19 ធ្វើឲ្យអ្នកប្រដាល់ថៃធុញទ្រាន់

18, Apr 2020 , 10:59 am

រូបភាព

ដោយ: ទេព ពិទូរ្យ

ការហ្វឹកហាត់ដោយពាក់ម៉ាស់ និងគម្លាតពីគ្នាពីរម៉ែត្រ អ្នកប្រដាល់អាជីពនៅប្រទេសថៃកំពុងអនុវត្តដើម្បីការពារខ្លួនពីការឆ្លង COVID-19។ ដោយសារតែជំងឺរាតត្បាតនេះ ថៃបានបង្ខំឲ្យសង្វៀនប្រកួតត្រូវបិទទ្វារ ហើយកម្មវិធីទាំអស់ត្រូវលុបចោល។

កីឡាប្រដាល់ Muay Thai ក៏ដូចជាកីឡាប្រដាល់គុនខ្មែរដែរ ដោយប្រើកណ្តាប់ដៃ ជង្គង់ កែង និងបច្ចេកទេសដ៏ទាក់ទាញផ្សេងៗទៀត ដែលទទួលបានការពេញនិយមបំផុតនៅប្រទេសថៃ។

ដោយសារជំងឺរលាកសួតបង្កដោយកូរ៉ូណាវីរុសប្រភេទថ្មី ថៃបានប្រើវិធានការ«គម្លាតសុវត្ថិភាព» ឬ «Social Distancing» ដ៏តឹងរឹងក្នុងប្រទេសខ្លួន ខណៈអ្នកឆ្លងបានកើនដល់ជាងពីពាន់នាក់ និងស្លាប់ជិត៥០នាក់។ ក្នុងករណីនេះ បានធ្វើឲ្យអតីតម្ចាស់ជើងឯកប្រដាល់ពិភពកីឡាករ Sarawut Prohmsut របស់ថៃ អាចហ្វឹកហាត់ជាមួយដៃគូត្រឹមកាយវិកាប៉ុណ្ណោះ ដោយអ្នកម្ងាងទៀតត្រូវនៅឆ្ងាយពីគ្នាដល់ទៅពីរម៉ែត្រ។

Sarawut វ័យ ២៣ ឆ្នាំបានប្រាប់ពីភាពធុញទ្រាន់របស់ខ្លួនទៅទីភ្នាក់ងារព័ត៌មាន AFP នៅកន្លែងហាត់ប្រាណ Luktupfah Muay Thai ក្នុងក្រុងបាងកកថា៖ «តើអ្នកអាចវ៉ៃយ៉ាងម៉េចក្នុងលក្ខខណ្ឌបែបនេះ? យើងលែងមានអារម្មណ៍ស្វាហាប់ដូចមុនទៀតហើយ»។

សង្វៀនប្រដាល់នៅថៃ ត្រូវបង្ខំចិត្តបិទទ្វារទាំងអស់មិនថាព្រឹត្តិការណ៍ធំ ឬតូចឡើយ ដើម្បីគោរពតាមច្បាប់ «គម្លាតសុវត្ថិភាព» ក្នុងន័យមិនឲ្យមានមនុស្សនៅផ្តុំគ្នា និងកៀកគ្នាដើម្បីប្រឆាំងនឹងការឆ្លងជំងឺ COVID-19។

កន្លងមក ថៃធ្លាប់មានករណីឆ្លង COVID-19 នៅក្នុងកម្មវិធីប្រកួតប្រដាល់ Muay Thai ក្នុងខេត្តមួយរួចមកហើយ ដោយក្នុងនោះមានអភិបាលខេត្តរងម្នាក់ឆ្លងផងដែរ។

ខុសពីថៃ កម្ពុជាដែលមានប្រជាជនចូលចិត្តប្រដាល់គុនខ្មែរដែរនោះ បានអនុញ្ញាតឲ្យមានកម្មវិធីប្រកួតលើសង្វៀនដដែល ប៉ុន្តែមិនឲ្យមានអ្នកចូលរួមទស្សនាផ្ទាល់ឡើយ ដោយផ្សាយផ្ទាល់តាមកញ្ចក់ទូរទស្សន៍ប៉ុណ្ណោះ៕