អន្តរជាតិ
លោកWin Myint ប្រធានាធិបតីមីយ៉ាន់ម៉ា និងលោកស្រីអង់សាន ស៊ូជី-AFP
×![]()
ខុទ្ទកាល័យប្រធានាធិបតីមីយ៉ាន់ម៉ា នៅថ្ងៃទី១៧ ខែមេសានេះបានប្រកាសថា មីយ៉ាន់ម៉ានឹងដោះលែងអ្នកទោសជាង២ម៉ឺន៥ពាន់នាក់ក្នុងឳកាសបុណ្យចូលឆ្នាំថ្មី។ ការដោះលែងនេះ ក៏នឹងជួយដល់ការទប់ស្កាត់ជំងឺ COVID-19 ក្នុងពន្ធនាគារដែលមានអ្នកទោសស្អេកស្កះផងដែរ។
លោក Win Myint ប្រធានាធិបតីមីយ៉ាន់ម៉ា និយាយថា អ្នកទោសចំនួន ២៤,៨៩៦នាក់ ដែលក្នុងនោះមានជនបរទេសចំនួន៨៧នាក់ នៅក្នុងពន្ធាគារទូទាំងប្រទេស នឹងត្រូវដោះលែងដោយគ្មានលក្ខខណ្ឌអ្វីទាំងអស់ ដើម្បីនាំភាពសប្បាយរីករាយដល់ពលរដ្ឋមីយ៉ាន់មា ក៏ដូចជាក្រោមហេតុផលមនុស្សធម៍ផងដែរ។ ប៉ុន្តែ លោកប្រធានាធិបតីមិនបាន បញ្ជាក់ពីប្រភេទបទល្មើស របស់អ្នកទោសដែលនឹងត្រូវដោះលែងឡើយ។
នេះយោងតាមទីភ្នាក់ងារព័ត៌មាន Reuters នៅខាងក្រៅពន្ធាគារ Insein ក្នុងតំបន់ពាណិជ្ជកម្មរបស់រដ្ឋធានីយ៉ាំងហ្គោនវិញ គេឃើញមានហ្វូងមនុស្សកកកុញ ដោយសង្ឃឹមថា នឹងបានជួបជុំក្រុមគ្រួសារ បើទោះបីជាមានបម្រាមហាមមិនឲ្យមានការប្រមូលផ្តុំ ក្រោមហេតុផលបង្ការការឆ្លងជំងឺ COVID-19 ក៏ដោយ។ នៅមីយ៉ាន់ម៉ា ករណីឆ្លងCOVID-19 មានចំនួន៨៨ករណី និងស្លាប់ចំនួន៤ករណី។
ទោះជាយ៉ាងណាក្តី គេមិនទាន់ច្បាស់ទេថា ការដោះលែងអ្នកទោសឆ្នាំនេះ នឹងរួមបញ្ចូលអ្នកដែលត្រូវបានចោទប្រកាន់ចំពោះសកម្មភាពប្រឆាំងរដ្ឋាភិបាល។ នាយកដ្ឋានពន្ធនាគារមីយ៉ាន់ម៉ា បានលើកឡើងថា នៅមីយ៉ាន់ម៉ា ពុំមានអ្នកទោសនយោបាយទេ។ ប៉ុន្តែក្រុមអង្គការសិទ្ធមនុស្សនិយាយថា មានមនុស្សរាប់សិបនាក់កំពុងស្ថិតនៅពន្ធនាគារ ដោយសារសកម្មភាពនយោបាយរបស់ពួកគេ។
លោក Aung Myo Kyaw មកពីសមាគមជំនួយអ្នកទោសនយោបាយ បានអះអាងថា រដ្ឋាភិបាលមិនទទួលស្គាល់ថាមានអ្នកទោសនយោបាយទេ ប៉ុន្តែពួកគេបានសុំបញ្ជីឈ្មោះអ្នកទោសដែលអាចចាត់ទុកជាអ្នកទោសនយោបាយ។ បើតាមលោក Aung សមាគមនេះបានបញ្ជូនបញ្ជីឈ្មោះដែលមានមនុស្ស៧០នាក់ ប៉ុន្តែពុំទាន់ដឹងថាអ្នកណាខ្លះត្រូវបានដោះលែងឡើយ។
បើតាមអង្គការសិទ្ធមនុស្ស Athan ក្នុងឆ្នាំ២០១៩ មានមនុស្សច្រើនជាង៣៣១ ត្រូវបានកាត់ទោសក្នុងសំណុំរឿងដែលទាក់ទងនឹងសេរីភាពក្នុងការបញ្ចេញមតិ។ អ្នកដែលត្រូវជាប់ឃុំ មានអ្នកសសេរកំណាព្យចំអករដ្ឋាភិបាល និងសិស្សដែលត្រូវបានឃុំខ្លួនក្នុងបាតុកម្មប្រឆាំងរដ្ឋាភិបាលទាក់ទិននិងការបិទអ៊ីនធឺណិត។
គួររំលឹកផងដែរថា នៅពេលដែលបក្សរបស់លោកស្រី អ៊ុងសាន ស៊ូជី ម្ចាស់រង្វាន់ណូបែលសន្តិភាព ឈ្នះឆ្នោតនៅឆ្នាំ២០១៦ ក្រោយការដឹកនាំច្រើនជា៥០ឆ្នាំរបស់របបយោធា សកម្មភាពដំបូងរបស់លោកស្រី គឺការដោះលែងអ្នកទោសនយោបាយរាប់រយនាក់៕
© រក្សាសិទ្ធិដោយ thmeythmey.com
