អន្តរជាតិ
កូនប្រុសប្រធានាធិបតីតាហ្ស៊ីគីស្ថាន ត្រូវជ្រើសតាំងជាប្រធានសភាព្រឹទ្ធសភាជាតិ លោក Rustam Emomali ប្រធានព្រឹទ្ធសភា (ខាងឆ្វេង) និយាយជាមួយឪពុករបស់ខ្លួន ដែលជាប្រធានាធបតីតាហ្ស៊ីគីស្ថាន។រូបភាព៖ Azerbaycan 24
× កូនប្រុសច្បងរបស់ប្រធានាធិបតីតាហ្ស៊ីគីស្ថាន ត្រូវបានតែងតែងជាប្រធានព្រឹទ្ធសភា នាថ្ងៃទី១៧ ខែមេសា។ ការតែងតាំង ត្រូវបានគេមើលឃើញថា គឺជាការប្រមូលផ្តុំអំណាចរបស់គ្រួសារលោកប្រធានាធិបតី Emomali Rakhmon នៅក្នុងប្រទេសអាស៊ីកណ្តាលមួយនេះ។
តាមរយៈការិយាល័យព័ត៌មានរបស់ព្រឹទ្ធសភា លោក Rustam Emomali ដែលត្រូវជាកូនប្រុសរបស់លោកប្រធានាធិបតី Emomali Rakhmon និងជាអភិបាលរដ្ឋធានី ឌូស្ហាន់បេផងនោះ ត្រូវបានបោះឆ្នោតជ្រើសតាំងជាប្រធានព្រឹទ្ធសភា ជាឯកច្ឆន្ទ។
ជាមួយនឹងការកាន់តំណែងនៅព្រឹទ្ធសភានេះ គ្រួសារលោក Rakhmon ក្ដាប់អំណាចកាន់តែខ្លាំងថែមទៀត។ លោក Rustam ក៏ត្រូវមើលឃើញថា អាចស្នងតំណែងពីឪពុកផងដែរ។ រដ្ឋធម្មនុញ្ញតាហ្ស៊ីគីស្ថាន បានចែងថា ប្រសិនបើប្រធានាធិបតីទទួលមរណភាព ឬអសមត្ថភាពភាពដឹកនាំប្រទេស ប្រធានព្រឹទ្ធសភា មានសិទ្ធិកាន់តំណែងជំនួសប្រធានាធិបតី។
បានន័យថា ក្នុងករណីអស់ពីលោក Rakhmon ទៅ កូនប្រុសរបស់លោក នឹងបន្តដឹកនាំប្រទេសតាមរបៀបអំណាចប្រមូលផ្ដុំរបស់គ្រួសារប្រធានាធិបតីរូបនេះដដែល។
បើតាមការចុះផ្សាយរបស់ទីភ្នាក់ងារព័ត៌មាន Reuters ក្រៅពីកូនប្រុសច្បងដែលត្រូវបានជ្រើសតាំងជាប្រធានព្រឹទ្ធសភា កូនស្រីរបស់លោកប្រធានាធិបតី គឺលោកស្រី Ozoda Rakhmon ក៏មានតំណែងធំផងដែរ ពោលគឺជាអតីតសមាជិកព្រឹទ្ធសភា ដែលទើបតែចប់អាណត្តិនៅក្នុងខែមីនា ឆ្នាំ ២០២០ នេះ និងជាប្រធានខុទ្ទកាល័យប្រធានាធិបតី។ ចំណែកស្វាមីរបស់លោកស្រី Ozoda វិញ គឺជាមន្ត្រីកាន់តំណែងធំលំដាប់ទី២ នៅក្នុងធនាគាជាតិរបស់តាហ្ស៊ីគីស្ថាន។
សូមបញ្ជាក់ថា លោកប្រធានាធិបតី Rakhmon ដែលមានវ័យ ៦៧ឆ្នាំ បានឡើងកាន់តំណែងកំពូលមួយនេះ តាំងពីឆ្នាំ ១៩៩៤មកម្លេះ ហើយគ្រោងនឹងបញ្ចប់អាណត្តិជាប្រធានាធិបតីនៅក្នុងខែវិច្ឆិកា ខាងមុខនេះ។ ជាមួយគ្នានេះ កូនប្រុសច្បងរបស់លោក ក៏គ្រប់អាយុឈរឈ្មោះជាប្រធានាធិបតីដែរ។ យ៉ាងណាក៏ដោយ គេមិនទាន់ដឹងច្បាស់នៅឡើយទេថា លោកប្រធានាធិបតីនឹងបន្តកាន់តំណែង ឬក៏អត់៕
© រក្សាសិទ្ធិដោយ thmeythmey.com