រដ្ឋាភិបាលវៀតណាម នៅថ្ងៃទី២២ ខែមេសា បានប្រកាសថា ខ្លួននឹងចាប់ផ្ដើមដកហូតបទបញ្ជាបិទប្រទេស លើកលែងតែតំបន់ខ្លះក្នុងទីក្រុងហាណូយ ក្រោយគ្មានករណី COVID-19 ថ្មីបន្ថែម ត្រូវបានរាយការណ៍ក្នុងប្រទេសក្នុងពេល៧ថ្ងៃជាប់គ្នា។ ការប្រកាសនេះធ្វើឡើងខណៈបណ្ដាប្រទេសក្នុងតំបន់អាស៊ីអាគ្នេយ៍ភាគច្រើន ស្ថិតក្នុងសភាពរឹតបន្តឹងសកម្មភាពប្រជាជននៅឡើយ ។
ការរឹតត្បិតលើសកម្មភាពអាជីវកម្ម និងការចល័តដទៃទៀតដែលបានដាក់ចេញកាលពីថ្ងៃទី១ ខែមេសា នឹងត្រូវបន្ធូរបន្ថយមួយផ្នែកធំ ចាប់ពីថ្ងៃទី២៣ ខែមេសាតទៅ។ នេះបើតាមគណៈកម្មាធិការជាតិវៀតណាមទទួលបន្ទុកកិច្ចការ COVID-19។
ក្នុងសេចក្តីថ្លែងការណ៍មួយ នាយករដ្ឋមន្ត្រីវៀតណាម ង្វៀន ស៊ួនហ្វុក អះអាងថា បច្ចុប្បន្ន គ្មានខេត្តណាមួយក្នុងប្រទេសវៀតណាម ត្រូវបានចាត់ទុកជាតំបន់រងគ្រោះខ្លាំងដោយសារជំងឺរាតត្បាតសាកល COVID-19 ឡើយ។ ទោះបីជាបែបនេះក្តី ប្រមុខរដ្ឋាភិបាលរូបនេះ សង្កត់ធ្ងន់ថា អាជីវកម្មដែលពុំបាច់ខ្លះ នឹងរក្សាបិទទ្វារដដែល។
តាមការចុះផ្សាយរបស់ទីភ្នាក់ងារព័ត៌មាន Reuters លោកនាយករដ្ឋមន្ត្រីវៀតណាម លើកឡើងថា សង្គមវៀតណាម ត្រូវតែទទួលយក «បែបបទរស់នៅថ្មី » ដោយទទូចឲ្យពលរដ្ឋពាក់ម៉ាស់នៅទីសាធារណៈ, រក្សាគម្លាតសុវត្ថិភាព និងបញ្ចៀសការប្រមូលផ្ដុំមនុស្សកុះករ។
«ខណៈការបង្ការ និងការប្រយុទ្ធប្រឆាំងCOVID-19 ទទួលជោគជ័យដោយប្រើវិធានការគម្លាតសុវត្ថិភាព យើងក៏នៅតែត្រូវធានាឲ្យបាននូវការធ្វើពាណិជ្ជកម្មទំនិញ, ការបង្កើតការងារ ក៏ដូចជាការអភិវឌ្ឍសេដ្ឋកិច្ចសង្គមផងដែរ»។ លោកនាយករដ្ឋមន្ត្រីសង្កត់ធ្ងន់បែបនេះ។
យ៉ាងណាមិញ ទីក្រុងហាណូយ, ក្រុង ហូជីមិញ និងខេត្ត២ទៀត នឹងរក្សាការរឹតត្បិតសកម្មភាពខ្លះ។ តួយ៉ាង ផ្នែកខ្លះក្នុងទីក្រុង ហាណូយ ដែលត្រូវបានចាត់ទុកជាតំបន់មាន «ហានិភ័យខ្ពស់» នឹងត្រូវរក្សាចំណាត់ការគម្លាតសុវត្ថិភាពពេញលេញ រហូតដល់ថ្ងៃទី៣០ ខែមេសា ។
យោងតាមទិន្នន័យរបស់ក្រសួងសុខាភិបាលវៀតណាម នៅថ្ងៃទី២២ ខែមេសា ប្រទេសនេះបានធ្វើតេស្តមនុស្សសរុប១៨ម៉ឺនាក់ ហើយបានរកឃើញករណីឆ្លងCOVID-19ត្រឹម២៦៨ករណី។ ក្នុងនោះ អ្នកជំងឺ ៨៣ភាគរយបានជាសះស្បើយ ហើយគ្មានករណីស្លាប់ឡើយ។
មែនទែនទៅ ការរឹតត្បិតការចល័ត នៅត្រូវបានអនុវត្តក្នុងបណ្ដាប្រទេសភាគច្រើនក្នុងតំបន់អាស៊ីអាគ្នេយ៍ ដែលជំងឺ COVID-19 សម្លាប់មនុស្សជាង១២០០នាក់ និងឆ្លងជាង៣៣០០០នាក់ហើយ។ សិង្ហបុរីដែលដំបូងឡើយទប់ស្កាត់ការរីករាលដាលនេះជោគជ័យ បែរជារងគ្រោះជាថ្មីដោយករណីឆ្លងក្នុងចំណោមពលករបរទេស ហើយ បានសម្រេចលើកពេលការបិទប្រទេសផ្នែកខ្លះរហូតដល់ថ្ងៃទី១ ខែមិថុនា។
ក្នុងប្រទេសថៃ ទីដែលបទបញ្ជាដាក់ប្រទេសក្នុងគ្រាអាសន្នគ្រោងនឹងអស់សុពលភាពនាដំណាច់ខែមេសា ក្រសួងសុខាភិបាល បានលើកឡើងថា ចំណាត់ការរឹតត្បិតការដើរហើរនឹងត្រូវដកហូតក្នុងខេត្តនានាដែលគ្មានរកឃើញករណីឆ្លងថ្មីសម្រាប់ពេល២សប្តាហ៍ជាប់គ្នា។
ដោយឡែកម៉ាឡេស៊ី ពុំទាន់សម្រេចលើរឿងពន្យារឬដកហូតវិធានការគម្លាតសុវត្ថិភាពឡើយ ក៏ប៉ុន្តែប្រភពពីមន្ត្រីជាន់ខ្ពស់ម៉ាឡេស៊ី បានបង្ហើបថា រដ្ឋាភិបាលនឹងគិតគូរផែនការអនុញ្ញាតឲ្យពលរដ្ឋដែលចាកចេញពីទីប្រជុំជនវិលត្រលប់មកវិញ។ ក្នុងប្រទេសឥណ្ឌូណេស៊ី ដែលមានករណីស្លាប់COVID-19 សរុប៦៥៣នាក់ ខ្ពស់បំផុតក្នុងតំបន់អាស៊ីអាគ្នេយ៍ រដ្ឋធានី ហ្សាការតា បានប្រកាសពន្យារពេលចំណាត់ការគម្លាតសុវត្ថិភាពរហូតដល់ថ្ងៃទី២២ ខែឧសភា៕