ជាតិ
បារាំង នឹងផ្ដល់ថវិកាជាង៤០ម៉ឺនដុល្លារ ដល់កម្ពុជា សម្រាប់ស្រាវជ្រាវលើជំងឺកូវីដ១៩
លោកស្រី អេវ៉ា ង្វៀន ប៊ិញ ឯកអគ្គរដ្ឋទូតបារាំងប្រចាំកម្ពុជា ជួបពិភាក្សាជាមួយលោក ម៉ម ប៊ុន ហេង រដ្ឋមន្ត្រីក្រសួងសុខាភិបាល នៅថ្ងៃទី៨ ឧសភា ឆ្នាំ២០២០
×![]()
ដោយ: ថ្មីៗ
ភ្នំពេញ៖ បារាំង នឹងផ្ដល់ថវិកាជាង៤០ម៉ឺនអឺរ៉ូ (ជាង៤៣ម៉ឺនដុល្លារ) ដល់កម្ពុជា សម្រាប់ស្រាវជ្រាវលើជំងឺកូវីដ១៩។ នេះបើតាមលោកស្រី អេវ៉ា ង្វៀន ប៊ិញ ឯកអគ្គរដ្ឋទូតបារាំងប្រចាំកម្ពុជា ដែលបានបញ្ជាក់ក្នុងជំនួបពិភាក្សាជាមួយលោក ម៉ម ប៊ុន ហេង រដ្ឋមន្ត្រីក្រសួងសុខាភិបាល នៅថ្ងៃទី៨ ឧសភា។
លោកស្រី អេវ៉ា ង្វៀន ប៊ិញ បានបញ្ជាក់ថា ជំនួយរបស់បារាំងដែលមានទឹកប្រាក់ជាង៤០ម៉ឺនដុល្លារនេះ ផផ្ដល់ឱ្យទៅគម្រោងស្រាវជ្រាវចំនួន៣នៅកម្ពុជា ។ បើតាមឯកអគ្គរដ្ឋទូតបារាំងរូបនេះ ទីភ្នាក់ងារអភិវឌ្ឍន៍បារាំង ក៏ត្រៀមផ្តល់ជំនួយឥតសំណងចំនួន២លានអឺរ៉ូ (ជាង២លានដុល្លារ) ដើម្បីផ្តល់ការគាំទ្រដល់មន្ទីរពិសោធន៍ឈានមុខគេនានា ក្នុងតំបន់អាស៊ីអាគ្នេយ៍ក្នុងការប្រយុទ្ធប្រឆាំងនឹងជំងឺកូវីដ១៩ ដែលក្នុងនោះក៏មានវិទ្យាស្ថានប៉ាស្ទ័រកម្ពុជាផងដែរ (ជាវិទ្យាស្ថានកម្ពុជាដែលមានកិច្ចសហប្រតិបត្តិការដ៏ស្អិតល្មួតជាមួយប្រទេសបារាំង)។
អះអាងពីបែបនេះហើយ លោកស្រី អេវ៉ា ង្វៀន ប៊ិញ ក៏បានអរគុណមន្ត្រី និងស្ថាប័នពាក់ព័ន្ធទាំងអស់ ដែលបានយកចិត្តទុកដាក់ព្យាបាលជនជាតិបារាំង ដែលមានជំងឺកូវីដ១៩ទាំង៤០នាក់នៅកម្ពុជាឱ្យបានជាសះស្បើយ។ «ស្ថានភាព(កូវីដ១៩)នៅកម្ពុជាមានភាពល្អប្រសើរ ប៉ុន្តែយើងគួរបន្តការប្រុងប្រយ័ត្ន»។ នេះជាការបញ្ជាក់របស់លោកស្រី អេវ៉ា ង្វៀន ប៊ិញ។
គួរបញ្ជាក់ថា ចាប់តាំងពីឆ្នាំ១៩៩១មក កម្ពុជា-បារាំង បានសហប្រតិបត្តិការគ្នា ស្ទើរគ្រប់វិស័យ រួមទាំងការបណ្តុះបណ្តាល ការស្រាវជ្រាវ និងផ្ដល់សម្ភារបរិក្ខារជាដើម។
គិតត្រឹមថ្ងៃទី៨ ឧសភា កម្ពុជា នៅសល់តែអ្នកជំងឺកូវីដ១៩ ចំនួន២នាក់ប៉ុណ្ណោះ ដែលកំពុងសម្រាកព្យាបាលជំងឺ ខណៈមនុស្ស១២០នាក់ទៀត បានជាសះស្បើយ។ អ្នកជំងឺកូវីដ-១៩ (COVID-19) ពីរនាក់នៅខេត្តបន្ទាយមានជ័យ និងកំពង់ឆ្នាំង ដែលមិនទានជាសះស្បើយនោះ គឺដោយសារពួកគាត់មានជំងឺប្រចាំកាយ និងបញ្ហាផ្លូវចិត្ត។សភាពទូទៅរបស់អ្នកជំងឺទាំងពីរគឺមិនធ្ងន់ធ្ងរទេ តែវីរុសនៅមានក្នុងខ្លួនពួកគាត់នៅឡើយ ។ ពួកគាត់ត្រូវបានបញ្ជូនមកសម្រាកនៅមន្ទីរពេទ្យរាជធានីភ្នំពេញផងដែរ។ នេះបើតាមលោកស្រី ឱ វណ្ណឌីន រដ្ឋលេខាធិការក្រសួងសុខាភិបាល៕
© រក្សាសិទ្ធិដោយ thmeythmey.com
