COVID-19
អន្តរជាតិ
ប្រធានាធិបតីឥណ្ឌូណេស៊ី អំពាវនាវឲ្យពលរដ្ឋរក្សាភាពនឹងធឹង និងបន្តបួងសួងឲ្យប្រទេសឆាប់រួចផុតពីវិបត្តិសុខភាព Covid-19
×![]()
ដោយ: ថ្មីៗ
រដ្ឋាភិបាលឥណ្ឌូណេស៊ី បានអំពាវនាវឲ្យសាធារណជនរក្សាការអត់ធ្មត់ និងស្ងប់ស្ងៀម ខណៈវីរុសរាតត្បាត Covid-19 នៅតែបន្តគំរាមកំហែង និងឆក់យកអាយុជីវិតរបស់ប្រជាជនឥណ្ឌូណេស៊ីទូទាំងប្រទេស។ សេចក្តីថ្លែងការណ៍នេះ ធ្វើឡើងស្របពេលស្ថានភាពនៃការឆ្លង និងរីករាលដាលវីរុស Covid-19 នៅតែមានសភាពធ្ងន់ធ្ងរ ខណៈបណ្តាប្រទេសក្នុងតំបន់ភាគច្រើន បានធូរស្រាលជាបណ្តើរៗហើយនោះ។
តាមរយៈកម្មវិធីសាសនាជាតិដែលរៀបចំដោយក្រសួងធម្មការឥណ្ឌូណេស៊ី នៅថ្ងៃ១៤ ឧសភា កន្លងទៅ លោកប្រធានាធិបតី ចូកូ វីដូដូ បានលើកទឹកចិត្តឲ្យប្រជាជនមានសុទិដ្ឋិនិយម និងបង្ហាញភាពសាមគ្គីតាមរយៈការចូលរួមជួយសង្គ្រោះ អ្នកដែលកំពុងត្រូវការ ក្នុងដំណាក់កាលលំបាកមួយនេះ។ នេះបើយោងតាមការចុះផ្សាយរបស់សារព័ត៌មាន Jakarta Post ។
ជាប្រទេស ដែលមានប្រជាជនគោរពប្រតិបត្តិសាសនាឥស្លាមច្រើនជាងគេរបស់ពិភពលោក លោកប្រធានាធិបតី បានសង្កត់ធ្ងន់ថា ការបួងសួងសុំសេចក្តីសុខ ក៏ជាផ្នែកមួយសំខាន់ក្នុងកិច្ចប្រឹងប្រែងជម្នះវិបត្តិសុខភាពមួយនេះ។
ប្រមុខដឹកនាំកំពូលឥណ្ឌូណេស៊ីរូបនេះ បានផ្តាំផ្ញើដល់ប្រជាជនចូលរួមប្រឈមនឹងបញ្ហា ជាមួយនឹងការអត់ធ្មត់ និងនឹងធឹងបំផុត។ លោក អះអាងថា បើប្រជាជនជ្រើសយកការតក់ស្លុត នោះមានន័យថា ប្រជាជនបានមានជំងឺនោះពាក់កណ្តាលរួចទៅហើយ។ ក៏ប៉ុន្តែបើប្រជាជនធ្វើស្មារតីឲ្យនឹងធឹងវិញនោះ មានន័យថា គេអាចមានលទ្ធភាពជាសះស្បើយពាក់កណ្តាលរួចហើយផងដែរ។
ពាក់ព័ន្ធនឹងបញ្ហាជំនួយសង្គមវិញ លោកប្រធានាធិបតី ថ្លែងថា ការចូលរួមពីសំណាក់ប្រជាជនទាំងអស់គ្នាក្នុងគ្រាលំបាកនេះ គឺជាកម្លាំងចលករដ៏ខ្លាំងក្លាបំផុតមួយ ដែលលោក ជឿជាក់ថា នឹងអាចជម្នះវិបត្តិនេះបាន។ លោក ក៏នៅតែទទូចឲ្យប្រជាជនបន្តអនុវត្តវិធានការការពារ និងទប់ស្កាត់ ដើម្បីធានាពីកម្រិតទាបបំផុតនៃការឆ្លងពីវីរុស។
គួរជម្រាបផងដែរថា ឥណ្ឌូណេស៊ី គឺជាប្រទេសអាស៊ានមួយដែលមានអាត្រាប្រជាជនឆ្លងវីរុស Covid-19 ខ្ពស់ជាងគេក្នុងតំបន់។ គិតត្រឹមថ្ងៃ១៤ ឧសភា នោះ ឥណ្ឌូណេស៊ី បានរកឃើញចំនួនអ្នកឆ្លងសរុប ១៥ ៤៣៨ ករណី ដែលក្នុងនោះ មានករណីស្លាប់ពាក់ព័ន្ធវីរុសនេះសរុបរហូតដល់ ១០២៨ករណី៕
© រក្សាសិទ្ធិដោយ thmeythmey.com
