COVID-19
អន្តរជាតិ
Covid-19៖ មីយ៉ាន់ម៉ា គ្រោងបង្កើតការងារក្នុងវិស័យកសិកម្ម និងសំណង់ជួយពលរដ្ឋដែលគ្មានការងារធ្វើ
× រដ្ឋាភិបាលក្រុងណៃពិដោរ ត្រៀមអនុវត្តគោលនយោបាយសង្គ្រោះមួយដោយផ្តោតលើវិស័យកសិកម្ម និងការអភិវឌ្ឍការងារនៅតាមជនបទ ដើម្បីជាផ្នែកមួយក្នុងការគាំទ្រប្រជាកសិករ ដែលរងផលប៉ះពាល់ដោយសារតែការរីករាលដាលនៃវីរុស Covid-19។
តាមរយៈក្រសួងកសិកម្មរបស់ខ្លួន រដ្ឋាភិបាលមីយ៉ាន់ម៉ា នៅថ្ងៃ១៣ ឧសភា កន្លងទៅ បានប្រាស់ផ្តល់ការងារលើវិស័យកសិកម្ម និងសំណង់ ដល់ប្រជាជនដែលបាត់បង់ការងារដោយសារតែវិបត្តិវីរុស Covid-19។ ចំណាត់ការរបស់រដ្ឋាភិបាលមីយ៉ាន់ម៉ាមួយនេះ ធ្វើឡើងក្រោមផែនការជំនួយសេដ្ឋកិច្ច ដែលបានអនុម័តឡើងក្រោយមានការផ្ទុះវីរុស Covid-19 នៅក្នុងប្រទេស។ នេះបើយោងតាមការចុះផ្សាយរបស់ Myanmar Times។
តាមប្រភពព័ត៌មានដដែល តាមរយៈផែនការសកម្មភាពនេះ រដ្ឋាភិបាលរំពឹងថា នឹងមិនត្រឹមតែអាចជួយរកចំណូលដល់ប្រជាជននៅតាមជនបទ ដែលបាត់បង់ការងារប៉ុណ្ណោះនោះទេ ក៏ប៉ុន្តែ វា ក៏ជួយធានាពីការមិនថយចុះនៃផលិតកម្ម និងការផ្គត់ផ្គង់ស្រូវអង្ករមីយ៉ាន់ម៉ាទៅកាន់ទីផ្សារផងដែរ។
ជាមួយគ្នាដើម្បីធានាពីដំណើរការទៅមុខនៃគម្រោងនេះ ក្រសួងកសិកម្មមីយ៉ាន់ម៉ា បានត្រៀមផ្ទៃដីសម្រាប់ការដាំដុះប្រមាណ ៤០ម៉ឺននាក់ ហិកតា ដោយក្នុងនោះរដ្ឋាភិបាលគ្រោងយកផ្ទៃដីពាក់កណ្តាលសម្រាប់ដាំដុះយកស្រូវពូជ និងពាក់កណ្តាលទៀតសម្រាប់ផលិតជាស្រូវអង្ករផ្គត់ផ្គង់ទៅកាន់ទីផ្សារ។ មូលនិធិអនុវត្តគម្រោងនេះ មានប្រភពពីកញ្ចប់ថវិការដ្ឋផង និងជំនួយអន្តរជាតិផង។
តាមពិតទៅ ក្រោយពេលនៃមានករណីឆ្លងវីរុស Covid-19 នៅក្នុងប្រទេស រដ្ឋាភិបាលមីយ៉ាន់ម៉ា បានប្រកាសទទួលស្គាល់ជាមុនពីផលប៉ះពាល់ខ្លាំងលើសេដ្ឋកិច្ចរបស់ខ្លួន ដែលបញ្ហានេះ មីយ៉ាន់ម៉ា ក៏ត្រៀមទាំងថវិការដ្ឋ ក៏ដូចការកម្ចីពីដៃគូបរទេសមួយចំនួន ជាពិសេសស្ថាប័នហិរញ្ញវត្ថុអន្តរជាតិ ដើម្បីប្រើប្រាស់សម្រាប់ការស្រោចស្រង់ស្ថានភាពសេដ្ឋកិច្ចឲ្យល្អប្រសើរឡើងវិញ៕
© រក្សាសិទ្ធិដោយ thmeythmey.com